ইন্ধনৰ মূল্য বৃদ্ধি: পেট্ৰ’ল-ডিজেল ৯০ পইচাকৈ চৰক

মঙলবাৰে পেট্ৰ’ল আৰু ডিজেলৰ দাম প্ৰতি লিটাৰত প্ৰায় ৯০ পইচাকৈ বৃদ্ধি কৰা হৈছে — এসপ্তাহৰ ভিতৰত এয়া দ্বিতীয়টো মূল্যবৃদ্ধি। ইৰাণ সংঘাতৰ বাবে গোলকীয় বজাৰত খাৰুৱা তেলৰ মূল্য হঠাত বৃদ্ধি পোৱাৰ ফলত হোৱা ক্ৰমাগত লোকচান হ্ৰাস কৰাৰ বাবে ৰাষ্ট্ৰীয়কৃত ইন্ধন খুচুৰা বিক্ৰেতাসকলে এই পদক্ষেপ গ্ৰহণ কৰিছে।
উদ্যোগ খণ্ডৰ সূত্ৰ অনুসৰি, নতুন দিল্লীত পেট্ৰ’লৰ মূল্য ৯৭.৭৭ টকাৰ পৰা বৃদ্ধি পাই প্ৰতি লিটাৰত ৯৮.৬৪ টকা হৈছেগৈ। আনহাতে ডিজেলৰ মূল্য প্ৰতি লিটাৰত ৯০.৬৭ টকাৰ পৰা ৯১.৫৮ টকালৈ বৃদ্ধি পাইছে।
শেহতীয়া এই মূল্যবৃদ্ধি যোৱা শুকুৰবাৰে হোৱা প্ৰতি লিটাৰত ৩ টকাৰ মূল্যবৃদ্ধিৰ পাছতেই আহিছে, যিটো আছিল যোৱা চাৰি বছৰতকৈও অধিক সময়ৰ ভিতৰত ইন্ধনৰ প্ৰথমটো মূল্য সংশোধন।
বিগত ফেব্ৰুৱাৰী মাহৰ শেষৰ পিনে ইৰাণৰ ওপৰত আমেৰিকা-ইজৰাইলৰ আক্ৰমণ আৰু গোলকীয় তেল পৰিবহনৰ গুৰুত্বপূৰ্ণ পথ হৰমুজ প্ৰণালী (Strait of Hormuz)ৰ জৰিয়তে জাহাজ চলাচল ব্যাহত হোৱাৰ পাছত গোলকীয় খাৰুৱা তেলৰ মূল্য ৫০ শতাংশতকৈও অধিক বৃদ্ধি পোৱাৰ বাবেই এই একেলেথাৰিয়ে মূল্যবৃদ্ধি ঘটিছে।স্থানীয় কৰৰ বাবে বিভিন্ন ৰাজ্যত ইন্ধনৰ মূল্য বেলেগ বেলেগ হয়। মুম্বাইত বৰ্তমান পেট্ৰ’লৰ মূল্য প্ৰতি লিটাৰত ১০৭.৫৯ টকা আৰু ডিজেলৰ মূল্য ৯৪.০৮ টকা। আনহাতে কলকাতাত ইয়াৰ মূল্য ক্ৰমে ১০৯.৭০ টকা আৰু ৯৬.০৭ টকালৈ বৃদ্ধি পাইছে। চেন্নাইত পেট্ৰ’লৰ মূল্য ১০৪.৪৯ টকা আৰু ডিজেলৰ মূল্য ৯৬.১১ টকা নিৰ্ধাৰণ কৰা হৈছে।
ভাৰতৰ তেল আমদানিৰ ব্যয় নিয়ন্ত্ৰণ আৰু ইন্ধনৰ ব্যৱহাৰ হ্ৰাস কৰাৰ বাবে চৰকাৰে গ্ৰহণ কৰা ব্যাপক প্ৰচেষ্টাৰ মাজতে এই ইন্ধনৰ মূল্যবৃদ্ধি ঘটিছে।
প্ৰধানমন্ত্ৰী নৰেন্দ্ৰ মোদীয়ে যোৱা সপ্তাহত নাগৰিক আৰু চৰকাৰী বিভাগসমূহক ইন্ধন সংৰক্ষণ কৰিবলৈ, দূৰৱৰ্তী স্থানৰ পৰা কাম কৰা (remote working) পদ্ধতিক উৎসাহিত কৰিবলৈ আৰু অপ্ৰয়োজনীয় ভ্ৰমণ হ্ৰাস কৰিবলৈ আহ্বান জনাইছিল। কিয়নো শক্তিৰ ক্ৰমবৰ্ধমান মূল্যই বৈদেশিক মুদ্ৰাৰ ভাণ্ডাৰৰ ওপৰত চাপ সৃষ্টি কৰিছে |