২০২৭ত একেলগে অনুষ্ঠিত হ’ব পিএছএল-আইপিএল

২০২৭ চনত ধাৰাবাহিকভাৱে তৃতীয়টো বছৰৰ বাবে পাকিস্তান ছুপাৰ লীগ আৰু ইণ্ডিয়ান প্ৰিমিয়াৰ লীগ মুখামুখি হ’বলৈ সাজু হৈছে। পিএছএলৰ ১২ সংখ্যক সংস্কৰণ অহা ২০২৭ চনৰ ১৮ মাৰ্চৰ পৰা ২ মে’লৈ অনুষ্ঠিত কৰাৰ সূচী নিৰ্ধাৰণ কৰা হৈছে। ২০১৬ চনত আৰম্ভ হোৱাৰে পৰা পিএছএল সাধাৰণতে ফেব্ৰুৱাৰী আৰু মাৰ্চ মাহৰ ভিতৰত অনুষ্ঠিত হৈ আহিছিল। কিন্তু ২০২৫ চনৰ পৰা একাধিক আইচিচি প্ৰতিযোগিতাৰ সময়সূচীৰ বাবে লীগখন পিছুৱাই দিবলগীয়া হৈছে। ২০২৯ চনলৈ পিএছএলৰ সম্প্ৰচাৰ স্বত্ব লাভ কৰা ওৱালী টেকন’ল’জীছে বৰ্তমানৰ সময়সূচীক লৈ অসন্তুষ্টি প্ৰকাশ কৰিছে। ৰমজান মাহ পাৰ হোৱাৰ পিছত সম্প্ৰচাৰৰ পৰা লাভ কৰা ৰাজহ যথেষ্ট হ্ৰাস পোৱাক লৈ কোম্পানীটোৱে উদ্বেগ প্ৰকাশ কৰিছে।

তেওঁলোকৰ যুক্তি অনুসৰি, বেছিভাগ বিজ্ঞাপনদাতাই ৰমজান মাহতে নিজৰ বাজেট ব্যয় কৰে, যাৰ বাবে পৰৱৰ্তী মাহবোৰত সম্প্ৰচাৰকসকলৰ বাবে বিত্তীয় ক্ষতি হয়। পিএছএলৰ শেষৰ দুটা সংস্কৰণ ৰমজানৰ পিছত অনুষ্ঠিত হৈছিল আৰু অহা বছৰৰ সংস্কৰণতো একে নিয়মে বাহাল থাকিব। সাধাৰণতে ছিজনটো ফেব্ৰুৱাৰীৰ আৰম্ভণিৰ পৰা মাৰ্চৰ আৰম্ভণিলৈ চলোৱাৰ পৰিকল্পনা কৰা হয়। ক্ৰিকইনফ’ৰ প্ৰতিবেদন অনুসৰি, জানুৱাৰী-ফেব্ৰুৱাৰী মাহৰ সময়ছোৱাক উপযোগী হিচাপে ধৰা হোৱা নাই। কাৰণ পিএছএলৰ চাৰিখন পৰম্পৰাগত খেলপথাৰৰ ভিতৰত তিনিখন থকা পঞ্জাব ৰাজ্যত এই সময়ছোৱাত প্ৰচণ্ড শীত আৰু ঘন কুঁৱলীৰ বাবে দৃশ্যমানতা তীব্ৰভাৱে প্ৰভাৱিত হয়। শেহতীয়া পৰিচালনা পৰিষদৰ বৈঠকত জানুৱাৰী-ফেব্ৰুৱাৰী মাহৰ সময়ছোৱা অনুপযোগী বুলি বিবেচিত হয়, কাৰণ ইয়াৰ বাবে প্ৰতিযোগিতাখনৰ মূল পৰ্যায় বা শেষৰ খেলসমূহ ৰমজানৰ সৈতে মিলি পৰে।

অৱশ্যে ২০২৪ চনৰ সংস্কৰণতো একেটা ঘটনাই ঘটিছিল। পিচিবি-য়ে সম্প্ৰতি খেলপথাৰসমূহৰ নাম আনুষ্ঠানিকভাৱে প্ৰকাশ কৰা নাই যদিও ২০২০ চনত ইউ এ ইৰ পৰা সমগ্ৰ প্ৰতিযোগিতাখন পাকিস্তানলৈ ঘূৰাই অনাৰ পিছত মূলতঃ কৰাচী, লাহোৰ, মুলতান আৰু ৰাৱালপিণ্ডিতেই খেলসমূহ অনুষ্ঠিত হৈ আহিছে। উল্লেখযোগ্য যে ২০২৭ চনৰ আইপিএল সংস্কৰণো মাৰ্চ আৰু মে’ মাহৰ ভিতৰতে অনুষ্ঠিত হ’ব। যদিও মূল সময়সূচী এতিয়ালৈকে ঘোষণা কৰা হোৱা নাই, ইয়াৰ পূৰ্বে গোৱাত এক মিনি-নিলাম অনুষ্ঠিত হ’ব।