অৰুণাচলৰ বিজ্ঞানীয়ে স্থানীয় ডেকাং/ডিকা গছৰ পৰা প্ৰাকৃতিক হেণ্ডৱাছ আৱিষ্কাৰ কৰিলে

আৰুণাচল প্ৰদেশে দেখুৱাইছে যে জৈৱ বৈচিত্ৰ্য আৰু জনজাতীয় জ্ঞানে কেনেকৈ বহনক্ষম উদ্ভাৱনৰ পথ মুকলি কৰিব পাৰে। পূৱ চিয়াং জিলাৰ পাছিঘাটস্থিত জৱাহৰলাল নেহৰু মহাবিদ্যালয়ৰ উদ্ভিদ বিজ্ঞানৰ সহকাৰী অধ্যাপক ড° টেমিন পয়ুম আৰু তেওঁৰ গৱেষণা দলটোৱে স্থানীয় গছ ডেকাং/ডিকা Gymnocladus burmanicus ৰ পৰা প্ৰাকৃতিক হেণ্ডৱাছ সফলতাৰে বিকাশ কৰিছে।
এই পৰিৱেশ-বান্ধৱ ফৰ্মুলেচনে কৃত্ৰিম হেণ্ডৱাছৰ বাবে এটা বহনক্ষম বিকল্প আগবঢ়ায়। ডেকাং/ডিকা গছৰ নির্যাস ব্যৱহাৰ কৰা হৈছে, যাক স্থানীয় সম্প্রদায়ে বহু আগৰে পৰা পৰিষ্কাৰক গুণৰ বাবে জানে। এই আৱিষ্কাৰে পৰম্পৰাগত জ্ঞান আৰু আধুনিক বৈজ্ঞানিক গৱেষণাৰ মাজত সেতু বন্ধন কৰিছে।

ডেকাং/ডিকাৰ শুঁটিৰ পৰা জলীয়, ইথানল আৰু দ্রাৱক পদ্ধতিৰে নির্যাস প্ৰস্তুত কৰা হৈছে। পৰীক্ষাগাৰত তিনিওটা ভেৰিয়েন্টে শক্তিশালী পৰিষ্কাৰক গুণ, প্ৰাকৃতিক ফেন আৰু ৬.৩ৰ পৰা ৭.২ লৈকে pH দেখুৱাইছে, যি ছালৰ বাবে সম্পূৰ্ণ সুৰক্ষিত। ফেনৰ পৰিমাণ ২০–২৫ মিলি পোৱা গৈছিল। কোনো কৃত্ৰিম সংৰক্ষক বা চাৰ্ফেকটেণ্ট নথকাকৈও নমুনাসমূহ দুই সপ্তাহলৈ অণুজীৱ মুক্ত আছিল।

১৫ জন স্বেচ্ছাসেৱকৰ ওপৰত কৰা অন্ধ পৰীক্ষাতো একেই ফল পোৱা গ’ল। অংশগ্ৰহণকাৰীসকলে কয় যে হেণ্ডৱাছখনে ভালদৰে পৰিষ্কাৰ কৰে, ছাল কোমল ৰাখে আৰু কোনো খজুৱতি নহয়। সামগ্ৰিকভাৱে ইয়াক বজাৰত পোৱা সাধাৰণ হেণ্ডৱাছৰ সৈতে তুলনীয় বুলি বিবেচনা কৰা হ’ল, যদিও ই সম্পূৰ্ণৰূপে প্ৰাকৃতিক উপাদানৰে তৈয়াৰী।

গৱেষকসকলৰ মতে এই ফৰ্মুলা সহজে কাষ্টমাইজ কৰিব পাৰি। নিম, এল’ভেৰা, পছতী Vitex negundo, গ্লিচাৰিন, অত্যাৱশ্যকীয় তেল আৰু উদ্ভিদৰ পৰা পোৱা ৰং আদি মিহলাই মইশ্বৰাইজিং, গোন্ধ আৰু ৰূপ বৃদ্ধি কৰিব পাৰি। ইয়াৰ ফলত বাঢ়ি অহা ভেষজ আৰু বহনক্ষম পৰিষ্কাৰ-পৰিচ্ছন্নতাৰ বজাৰত ইয়াৰ স্থান সুদৃঢ় হ’ব।

ডেকাং/ডিকা গছ নিজেই এক ডাঙৰ সম্পদ। ই ৩৫০–৭০ মিটাৰ উচ্চতাত বৃদ্ধি পায় আৰু দীঘলীয়া বাদামী শুঁটি দিয়ে, য’ত চেপ’নিন থাকে — ফেনৰ বাবে দায়ী প্ৰাকৃতিক যৌগ। এটা পূৰ্ণবয়স্ক গছে বছৰি ১০ কেজিতকৈও অধিক শুঁটি দিব পাৰে। ইয়াৰ ফলত গাঁও পৰ্যায়ত শুঁটি সংগ্ৰহ, স্থানীয় প্ৰক্ৰিয়াকৰণ আৰু গাঁও-ভিত্তিক উদ্যোগৰ বাবে নতুন সুযোগৰ সৃষ্টি হ’ব।

এই আৱিষ্কাৰে গ্ৰাম্য উদ্যোগ, স্থানীয় জৈৱ-সম্পদৰ মূল্য সংযোজন, জৈৱ বৈচিত্ৰ্য সংৰক্ষণ আৰু সম্প্রদায়ৰ জীৱিকাৰ বাবে নতুন দুৱাৰ মুকলি কৰিছে। ই দেখুৱাইছে যে কেনেকৈ স্থানীয় উদ্ভিদক বজাৰ-সম্ভাৱনাযুক্ত সেউজীয়া সামগ্ৰীত পৰিণত কৰিব পাৰি।

উল্লেখযোগ্য যে ড° টেমিন পয়ুমে ২০২৪ চনত ‘ভেষজ হিলিং চাহ’ও প্ৰস্তুত কৰিছিল, যি বহু ৰোগ নিৰাময়ত সহায়ক বুলি কোৱা হয়।