অসমত বান পৰিস্থিতিৰ অৱনতি; মৃতকৰ সংখ্যা ৫লৈ বৃদ্ধি, ৫৭ হাজাৰৰো অধিক লোক ক্ষতিগ্ৰস্ত

ধাৰাসাৰ বৰষুণ আৰু বানপানীৰ মাজতে ৰাজ্যত সৃষ্টি হৈছে অধিক সংকটজনক পৰিস্থিতি। এজন লোকৰ মৃত্যু হোৱাৰ পিছতে এইবাৰৰ বানত মৃতকৰ সংখ্যা ৫জনলৈ বৃদ্ধি পাইছে। আনহাতে সাতখন জিলাত ক্ষতিগ্ৰস্ত লোকৰ সংখ্যা ৫৭ হাজাৰ অতিক্ৰম কৰিছে।

অসম ৰাজ্যিক দুৰ্যোগ ব্যৱস্থাপনা প্ৰাধিকৰণে প্ৰকাশ কৰা দৈনিক বান প্ৰতিবেদন অনুসৰি, শেহতীয়া মৃত্যুৰ ঘটনা সংঘটিত হৈছে শিৱসাগৰ জিলাত। বান পৰিস্থিতিৰ অৱনতি ঘটাৰ প্ৰতি লক্ষ্য ৰাখি ৰাজ্য চৰকাৰে উদ্ধাৰ আৰু স্থানান্তৰ অভিযানৰ বাবে ভাৰতীয় সেনা আৰু বায়ুসেনাক সাজু হৈ থাকিবলৈ অনুৰোধ জনাইছে।

বৰ্তমান চৰাইদেউ, ধেমাজি, ডিব্ৰুগড়, যোৰহাট, শিৱসাগৰ, তিনিচুকীয়া আৰু ওদালগুৰি জিলাত বানৰ প্ৰভাৱ পৰিছে। এই জিলাসমূহত মুঠ ৫৭ হাজাৰ ১০০ৰো অধিক লোক বানত ক্ষতিগ্ৰস্ত হৈছে।

চৰাইদেউ জিলাত বানৰ প্ৰভাৱ সৰ্বাধিক দেখা গৈছে। জিলাখনত প্ৰায় ২৪ হাজাৰ লোক ক্ষতিগ্ৰস্ত হৈছে। ইয়াৰ পিছতে ধেমাজিত প্ৰায় ২২ হাজাৰ আৰু ডিব্ৰুগড়ত ৪ হাজাৰৰো অধিক লোক বানৰ কবলত পৰিছে।

ইফালে, চৰাইদেউ জিলাৰ বিভিন্ন স্থানৰ পৰা ৰাজ্যিক দুৰ্যোগ সঁহাৰি বাহিনীয়ে ১০জন লোকক উদ্ধাৰ কৰে। ৰাজ্যৰ বিভিন্ন প্ৰান্তত বানৰ পানীয়ে ২৯৮খন গাঁও বুৰাই পেলোৱাৰ লগতে ৩ হাজাৰ ৮৭৪.৮৪ হেক্টৰ কৃষিভূমি ক্ষতিগ্ৰস্ত কৰিছে।

বানৰ ফলত কেইবাখনো জিলাত মথাউৰি, পথ, দলং আৰু অন্যান্য ৰাজহুৱা আন্তঃগাঁথনিৰ ক্ষতি হৈছে। ডিব্ৰুগড় জিলাৰ খোৱাং অঞ্চলৰ চেনিমাৰীত বুঢ়ীদিহিং নৈ এতিয়াও বিপদ সীমাৰ ওপৰেৰে বৈ থকাৰ বাবে নতুনকৈ অঞ্চল প্লাৱিত হোৱাৰ আশংকা বৃদ্ধি পাইছে।

অসম ৰাজ্যিক দুৰ্যোগ ব্যৱস্থাপনা প্ৰাধিকৰণে জানিবলৈ দিয়া মতে, বৰ্তমান চাৰিখন জিলাত ১৪টা সাহায্য শিবিৰ আৰু সাহায্য বিতৰণ কেন্দ্ৰ চলি আছে। এই শিবিৰসমূহত ৪৪০জন স্থানচ্যুত লোকে আশ্ৰয় লৈছে।

যোৱা ২৪ ঘণ্টাত বানাক্ৰান্ত পৰিয়ালসমূহৰ মাজত ৫৮.১৭ কুইণ্টল চাউল, ১০.৮৯ কুইণ্টল দাইল, ৩.২৬ কুইণ্টল নিমখ আৰু ৩২৬.৮৮ লিটাৰ সৰিয়হ তেল বিতৰণ কৰা হৈছে।

বানত ৰাজ্যজুৰি ৩৭ হাজাৰ ৫৫৮টাতকৈ অধিক ঘৰচীয়া জন্তু আৰু হাঁহ-কুকুৰাও ক্ষতিগ্ৰস্ত হৈছে বুলি দুৰ্যোগ ব্যৱস্থাপনা প্ৰাধিকৰণে সদৰী কৰিছে।

মুখ্যমন্ত্ৰী হিমন্ত বিশ্ব শৰ্মাই সামাজিক মাধ্যমযোগে জানিবলৈ দিয়ে যে, শিৱসাগৰ, চৰাইদেউ আৰু যোৰহাট জিলাৰ বান পৰিস্থিতিৰ অধিক অৱনতি ঘটিলে উদ্ধাৰ আৰু স্থানান্তৰ অভিযানত সহায়ৰ বাবে ভাৰতীয় সেনা আৰু বায়ুসেনাক সাজু হৈ থাকিবলৈ অনুৰোধ জনোৱা হৈছে।

মুখ্যমন্ত্ৰীয়ে লগতে বানপীড়িত জিলাসমূহৰ পৰিস্থিতি পৰ্যবেক্ষণ আৰু সাহায্য অভিযান তদাৰকৰ বাবে চাৰিগৰাকী মন্ত্ৰী অজন্তা নেওগ, বিমল বৰা, কেশৱ মহন্ত আৰু সুশান্ত বৰগোহাঁইক সংশ্লিষ্ট অঞ্চললৈ প্ৰেৰণ কৰিছে।

তেওঁ কয় যে, প্ৰতিটো ক্ষতিগ্ৰস্ত পৰিয়ালৰ ওচৰলৈ সময়মতে সাহায্য পোৱাটো নিশ্চিত কৰিবলৈ চৰকাৰে পদক্ষেপ গ্ৰহণ কৰিছে আৰু পৰিস্থিতিৰ ওপৰত ২৪ ঘণ্টাই নজৰ ৰখা হৈছে।