২০৪৮ কোটি টকাৰে সৰ্বাধিক উপাৰ্জনকাৰী চেলিব্ৰিটিৰ শীৰ্ষত বিৰাট কোহলি

টেষ্ট আৰু টি-২০ ক্ৰিকেটৰ পৰা অৱসৰ লোৱা টিম ইণ্ডিয়াৰ কিংবদন্তি বেটছমেন বিৰাট কোহলিৰ উপাৰ্জন হ্ৰাস পোৱা নাই। কিংবদন্তি বেটছমেন শচীন তেণ্ডুলকাৰ আৰু প্ৰাক্তন অধিনায়ক মহেন্দ্ৰ সিং ধোনীক অতিক্ৰম কৰি তেওঁ সৰ্বাধিক উপাৰ্জনকাৰী বেটছমেন হৈয়ে আছে। এই তালিকাত পঞ্চম স্থানত আছে শচীন তেণ্ডুলকাৰ। ইণ্ডিয়ান প্ৰিমিয়াৰ লীগ (আই পি এল) ২০২৫ৰ সময়ত টেষ্ট ক্ৰিকেটৰ পৰা অৱসৰ লোৱা বিৰাট কোহলীয়ে এতিয়া কেৱল এদিনীয়া খেলহে খেলিব। ইয়াৰ পিছতো তেওঁ বিজ্ঞাপন জগতত বিশিষ্ট হৈয়েই আছে। দ্য ক্ৰ’ল চেলিব্ৰিটি ব্ৰেণ্ড ভেলুৱেশ্যন ২০২৪ৰ প্ৰতিবেদন অনুসৰি, ছ’চিয়েল মিডিয়াত তেওঁৰ উপস্থিতিৰ বাবেই ভাৰতীয় প্ৰাক্তন অধিনায়ক বিৰাট কোহলী ২৩১.১ মিলিয়ন ডলাৰ (প্ৰায় ২০৪৮ কোটি টকা) ব্ৰেণ্ড মূল্যৰ সৈতে ভাৰতৰ আটাইতকৈ মূল্যৱান চেলিব্ৰিটি হৈয়েই আছে। এই প্ৰতিবেদনত শীৰ্ষ ২৫ গৰাকী মূল্যৱান চেলিব্ৰিটিৰ স্থান দিয়া হৈছে।

দ্বিতীয় স্থানত আছে বলীউডৰ অভিনেতা ৰণবীৰ সিঙৰ ব্ৰেণ্ড মূল্য ১৭০.৭ মিলিয়ন ডলাৰ (প্ৰায় ১৫১২ কোটি টকা)। অৱশ্যে এইবাৰ তেওঁৰ ব্ৰেণ্ড মূল্য হ্ৰাস পাইছে। এই তালিকাত তৃতীয় স্থানত আছে বলীউডৰ কিং শ্বাহৰুখ খান। তেওঁৰ ব্ৰেণ্ড মূল্য ২১ শতাংশ বৃদ্ধি পাই ১৪৫.৭ মিলিয়ন ডলাৰ (প্ৰায় ১,২৯১ কোটি টকা) হৈছে। চতুৰ্থ স্থানত আছে বলীউডৰ অভিনেত্ৰী আলিয়া ভাট। তেওঁৰ ১১৬.৪ মিলিয়ন ডলাৰ (প্ৰায় ১,০৩১ কোটি টকা) মূল্যৰ আটাইতকৈ মূল্যৱান মহিলা চেলিব্ৰিটি হিচাপে পৰিগণিত হৈছে। কিংবদন্তি বেটছমেন শচীন টেণ্ডুলকাৰৰ ব্ৰেণ্ড ভেলুও এইবাৰ বৃদ্ধি পাইছে। ২০২৩ চনত তেওঁ এই তালিকাত অষ্টম স্থান লাভ কৰিছিল যদিও এইবাৰ তেওঁ শীৰ্ষ পাঁচটা স্থানত স্থান লাভ কৰিছে। তেওঁৰ ব্ৰেণ্ডৰ মূল্য ১১২.২ মিলিয়ন ডলাৰ (প্ৰায় ৯৯৪ কোটি টকা)। ভাৰতৰ প্ৰাক্তন অধিনায়ক মহেন্দ্ৰ সিং ধোনীও এই তালিকাৰ শীৰ্ষ ১০ ৰ ভিতৰত আছে।

দ্য ক্ৰলৰ পৰিচালন সঞ্চালক উমাকান্ত পানীগ্ৰহীয়ে কয় যে বিৰাট কোহলী কেৱল ক্ৰীড়া কিংবদন্তি নহয়, এজন স্মাৰ্ট ব্যৱসায়ীও। ইয়াৰ ফলত তেওঁ এটা শক্তিশালী ব্ৰেণ্ড হৈ পৰিছে। তেওঁ কয় যে কোহলীৰ ছ’চিয়েল মিডিয়াৰ অনুৰাগী প্ৰায় ৩৮.৭ কোটি। পানীগ্ৰহীয়ে উল্লেখ কৰে যে ২০২৩ চনৰ তুলনাত ২০২৪ চনত কোহলীৰ বিজ্ঞাপনৰ মাচুল বিশেষভাৱে বৃদ্ধি হোৱা নাছিল।কোহলীৰ বিজ্ঞাপনৰ মাচুল ১০ৰ পৰা ১১ কোটি টকা। তেওঁ লগতে উল্লেখ কৰে যে ভাৰতীয় প্ৰাক্তন ক্ৰিকেটাৰ শচীন টেণ্ডুলকাৰৰ ছ’চিয়েল মিডিয়া অনুৰাগীৰ সংখ্যাও ৫ শতাংশ বৃদ্ধি পাইছে। পানীগ্ৰহীয়ে কয় যে ভাৰতৰ শীৰ্ষ ২৫ চেলিব্ৰিটিৰ মুঠ ব্ৰেণ্ড ভেলুত বলীউডৰ তাৰকাৰ অংশ ৬৫ শতাংশ, আনহাতে ক্ৰীড়া তাৰকাৰ অংশ ২৮.৪ শতাংশ।