মণিপুৰৰ পাঁচ জিলাত মোবাইল ইণ্টাৰনেট সেৱা কৰ্তনৰ সময়সীমা পুনৰ বৃদ্ধি

মণিপুৰত অব্যাহত থকা উত্তপ্ত পৰিস্থিতিৰ প্ৰতি লক্ষ্য ৰাখি পাঁচখন জিলাত মোবাইল ইণ্টাৰনেট সেৱা কৰ্তনৰ সময়সীমা পুনৰ বৃদ্ধি কৰিছে ৰাজ্য চৰকাৰে। ইম্ফল পশ্চিম, ইম্ফল পূব, থৌবাল, কাকচিং আৰু বিষ্ণুপুৰ জিলাত ১৪ এপ্ৰিলৰ বিয়লি ২ বজাৰ পৰা কাৰ্যকৰী হোৱাকৈ এই নিষেধাজ্ঞা অতিৰিক্ত দুদিনৰ বাবে বৃদ্ধি কৰা হয়। ৰাজ্য চৰকাৰে জাৰি কৰা চৰকাৰী নিৰ্দেশনা অনুসৰি, উৰাবাতৰি আৰু বিভ্ৰান্তিকৰ তথ্য প্ৰচাৰ ৰোধ কৰি জনসাধাৰণৰ সুৰক্ষা নিশ্চিত কৰিবলৈকে এই পদক্ষেপ গ্ৰহণ কৰা হৈছে। উল্লেখযোগ্য যে, যোৱা ৭ এপ্ৰিলৰ পৰাই এই জিলাসমূহত সাময়িকভাৱে ইণ্টাৰনেট আৰু মোবাইল ডাটা সেৱা বন্ধ কৰি ৰখা হৈছিল।

মোবাইল ইণ্টাৰনেটৰ লগতে ভিপিএন ব্যৱহাৰৰ ওপৰতো চৰকাৰে কঠোৰ নিষেধাজ্ঞা আৰোপ কৰিছে। বিশেষকৈ হোৱাটছএপ, ফেচবুক, ইনষ্টাগ্ৰাম আৰু এক্সৰ দৰে ছচিয়েল মিডিয়া প্লেটফৰ্মৰ জৰিয়তে যিকোনো ধৰণৰ উচতনিমূলক বাৰ্তা বিয়পোৱা ৰোধ কৰাই হৈছে প্ৰশাসনৰ মূল লক্ষ্য। চৰকাৰী সূত্ৰই জনোৱা মতে, মোবাইল ডাটা ট্ৰেফিক নিয়ন্ত্ৰণ কৰিবলৈ বৰ্তমানৰ ব্যৱস্থা পৰ্যাপ্ত নোহোৱাৰ বাবেই এই সেৱা কৰ্তনৰ সময়সীমা বৃদ্ধি কৰাটো জৰুৰী হৈ পৰিছিল। যোৱা ৮ এপ্ৰিলত ব্ৰডবেণ্ড সেৱা কিছু পৰিমাণে মুকলি কৰি দিয়া হয় যদিও মোবাইল ডাটাৰ ক্ষেত্ৰত এতিয়াও কঢ়া স্থিতি বাহাল ৰাখিছে চৰকাৰে।

টেলিকমিউনিকেচন চাৰ্ভিচ ৰুলছ ২০২৪-ৰ ৩ নম্বৰ নিয়মৰ অধীনত জৰুৰীকালীনভাৱে এই নিৰ্দেশনা জাৰি কৰিছে মণিপুৰ চৰকাৰে। যিকোনো ধৰণৰ হিংসাত্মক কাৰ্যকলাপ, অগ্নিকাণ্ড আৰু ৰাজহুৱা সম্পত্তিৰ ক্ষয়-ক্ষতি ৰোধ কৰিবলৈ এই সিদ্ধান্ত গ্ৰহণ কৰা হৈছে বুলি নিৰ্দেশনাটোত উল্লেখ কৰা হয়। প্ৰশাসনে সঁকীয়াই দিছে যে কোনো ব্যক্তিয়ে এই বাধা-নিষেধ উলংঘা কৰিলে তেওঁৰ বিৰুদ্ধে কঠোৰ আইনী ব্যৱস্থা গ্ৰহণ কৰা হ’ব। এই গুৰুত্বপূৰ্ণ ঘোষণাৰ বিষয়ে সজাগতা সৃষ্টিৰ বাবে ইতিমধ্যে সংবাদ মাধ্যমৰ জৰিয়তে ব্যাপক প্ৰচাৰ চলোৱা হৈছে।