মহানগৰীত ড্ৰাগছ মাফিয়াৰ বিৰুদ্ধে আৰক্ষীৰ বৃহৎ সফলতা; বশিষ্ঠত হেৰ’ইন আৰু নগদ ধনসহ জালত ‘হনুমান’

ৰাজ্যজুৰি অব্যাহত থকা নিষিদ্ধ ড্ৰাগছৰ অবাধ বেহাৰ মাজতে এইবাৰ এক বৃহৎ সফলতা লাভ কৰিবলৈ সক্ষম হৈছে মহানগৰ আৰক্ষীয়ে। গোপন সূত্ৰৰ পম খেদি বশিষ্ঠ আৰক্ষীৰ এটা দলে কালিবাৰী পথত এক বিশেষ অভিযান চলায়। বেংগলী বস্তিৰ এটা গোপন আস্থানত আৰক্ষীয়ে চলোৱা এই আকস্মিক তালাচীত ড্ৰাগছ মাফিয়াৰ এক শক্তিশালী নেটৱৰ্ক ধ্বংস কৰিবলৈ সক্ষম হয় আৰক্ষীয়ে।

অভিযানৰ কালছোৱাত আৰক্ষীয়ে ৰণঞ্জয় মণ্ডল ওৰফে হনুমান (৪৮) নামৰ এজন কুখ্যাত সৰবৰাহকাৰীক আটক কৰে। চাবোনৰ বাকচত অতি কৌশলেৰে লুকুৱাই থোৱা অৱস্থাত আৰক্ষীৰ দলটোৱে প্ৰায় ২৫ গ্ৰাম হেৰ’ইন উদ্ধাৰ কৰে। কেৱল ড্ৰাগছেই নহয়, অভিযুক্তৰ জিম্মাৰ পৰা ড্ৰাগছ বিক্ৰীৰ নগদ ২,০৩,২৫০ টকা আৰু দুটা ম’বাইল ফোনো জব্দ কৰা হৈছে। প্ৰাথমিক তদন্তত পোহৰলৈ অহা অনুসৰি, দীৰ্ঘদিন ধৰি আৰক্ষীৰ চকুত ধূলি দি ‘হনুমান’য়ে এই অবৈধ কাৰবাৰ চলাই আহিছিল।

বশিষ্ঠ আৰক্ষীয়ে ইতিমধ্যে ধৃত সৰবৰাহকাৰীজনৰ বিৰুদ্ধে এক গোচৰ ৰুজু কৰি আইনী প্ৰক্ৰিয়া আৰম্ভ কৰিছে। এই চক্ৰটোৰ সৈতে মহানগৰীৰ আৰু কোন কোন লোক জড়িত আছে, সেই সন্দৰ্ভত তথ্য লাভ কৰিবলৈ আৰক্ষীয়ে অভিযুক্তক জেৰা অব্যাহত ৰাখিছে। আৰক্ষীৰ এই তৎপৰতাই এতিয়া নিচামুক্ত মহানগৰী গঢ়াৰ প্ৰচেষ্টাক এক নতুন মাত্ৰা প্ৰদান কৰিছে।