বৰষুণ বিঘ্নিত ছেমিফাইনেলত তিনিচুকীয়াৰ বিৰুদ্ধে গুৱাহাটীৰ স্থিতি মজবুত

মঙলবাৰে উমৰাংচুত অৱস্থিত ACA ক্ৰিকেট ষ্টেডিয়ামত অনুষ্ঠিত নুরুদ্দিন আহমেদ ট্ৰফী ছিনিয়ৰ আন্তঃজিলা ক্ৰিকেট প্ৰতিযোগিতা ২০২৬-২৭ ৰ ইলিট গ্ৰুপৰ ছেমিফাইনেলৰ দ্বিতীয় দিনা তিনিচুকীয়াৰ বিৰুদ্ধে গুৱাহাটীয়ে শক্তিশালী নিয়ন্ত্ৰণ সাব্যস্ত কৰে।
প্ৰথম দিনা বৰষুণে খেলাত ব্যাঘাত জন্মোৱাৰ পিছত, তিনিচুকীয়াই ৯৩ ৰাণত ৬ উইকেট হেৰুৱাই তেওঁলোকৰ প্ৰথম ইনিংছ পুনৰ আৰম্ভ কৰে আৰু ৪১.১ অভাৰত ৯৮ ৰাণত অল আউট হয়।ৰাজ আগৰৱালাই সৰ্বাধিক ২৯ ৰাণ আৰু প্ৰবীৰ চাংমাইয়ে ১৪ ৰাণ কৰে। গুৱাহাটীৰ হৈ কুণাল শৰ্মা আৰু আয়ুষ্মান মালাকাৰে চমকপ্ৰদ বলিং কৰি প্ৰতিজনে চাৰিটাকৈ উইকেট দখল কৰে। কুণালে ১৫ ৰাণত ৪ টা আৰু আয়ুষ্মানে ২৮ ৰাণত ৪ টা উইকেট লাভ কৰে। প্ৰত্যুত্তৰত গুৱাহাটীয়ে প্ৰথম ইনিংছত ৬২.৩ অভাৰত ২৪৭ ৰাণ সংগ্ৰহ কৰি ১৪৯ ৰাণৰ এক বৃহৎ অগ্ৰগতি লাভ কৰে। প্ৰদ্যুন শইকীয়াই সুন্দৰ ৯১ ৰাণ আৰু আকাশ সেনগুপ্তই ৩৬ ৰাণৰ অৱদান আগবঢ়ায়। তিনিচুকীয়াৰ হৈ ৰাজ আগৰৱালাই ১০১ ৰাণত ৬ টা আৰু শুভম কুমাৰ গুপ্তাই ২৭ ৰাণত ২ টা উইকেট লাভ কৰে। তিনিচুকীয়াই দ্বিতীয় ইনিংছ সাৱধানে আৰম্ভ কৰিছে আৰু দিনৰ শেষলৈকে ৫ অভাৰত এজন উইকেট হেৰুৱাই ৮ ৰাণ সংগ্ৰহ কৰিছে। তেওঁলোক এতিয়াও ১৪১ ৰাণত পিছ পৰি আছে। কম পোহৰৰ বাবে বিয়লি ৪.৪০ বজাত খেল বন্ধ কৰা হয় আৰু দ্বিতীয় দিনাৰ সমাপ্তি ঘোষণা কৰা হয়।