‘মুখ্যমন্ত্ৰীৰ জ্যেষ্ঠ ভাতৃ’ বুলি চিনাক্ত কৰাত আপত্তি; পৰিচয় সংকটৰ কথা তুলিলে দিগন্ত বিশ্ব শৰ্মাই

পাৰিবাৰিক পৰিচয়ৰ আৱৰ্তত নিজৰ স্বতন্ত্ৰ সত্তা বিলীন হোৱাক কেন্দ্ৰ কৰি শনিবাৰে তীব্ৰ অসন্তুষ্টি প্ৰকাশ কৰে বিশিষ্ট কবি তথা অনুবাদক দিগন্ত বিশ্ব শৰ্মাই। মুখ্যমন্ত্ৰী হিমন্ত বিশ্ব শৰ্মাৰ জ্যেষ্ঠ ভাতৃ হিচাপে সমাজত থকা পৰিচয়টো তেওঁৰ বাবে অত্যন্ত যন্ত্ৰণাদায়ক আৰু দুৰ্ভাগ্যজনক বুলি এক আৱেগিক ফেচবুক পোষ্টযোগে তেওঁ ৰাজহুৱা কৰে। এগৰাকী প্ৰজ্ঞা সাধক হিচাপে নিজৰ সুকীয়া পৰিচয় থকাৰ পাছতো কেৱল ভাতৃৰ ৰাজনৈতিক স্থিতিৰ বাবে তেওঁক দিয়া বিশেষ লেবেলটোক লৈ তেওঁ গভীৰ দুখ প্ৰকাশ কৰে।

দিগন্ত বিশ্ব শৰ্মাই সামাজিক মাধ্যমত লিখা এটা পোষ্টত পিতৃৰ এষাৰ কথা স্মৰণ কৰি কয়, “দেউতাই কৈছিল যে মন্ত্ৰীপদ এক দায়িত্বহে, ইয়াৰ কোনো পিতৃ-মাতৃ বা ভাতৃ নাথাকে। তথাপিও এই কলিযুগত মোক কেৱল ‘মুখ্যমন্ত্ৰীৰ জ্যেষ্ঠ ভাতৃ’ বুলি অভিহিত কৰা হয়।” ঈশ্বৰৰ ওচৰত প্ৰাৰ্থনা জনাই তেওঁ কয় যে ভাৰতবৰ্ষত পুনৰ জন্ম ল’বলৈ তেওঁ সাজু, কিন্তু যাতে কেতিয়াও এনে পৰিচয়ৰে জীয়াই থাকিবলগীয়া নহয়। নিজৰ স্থিতি স্পষ্ট কৰি তেওঁ লগতে জনায় যে ব্যক্তিগত জীৱনত পৰিয়ালৰ প্ৰতি থকা মৰম আৰু সন্মান অটুট থাকিলেও সামাজিক জীৱনত তেওঁ এজন স্বাধীন নাগৰিক আৰু নিজা আদৰ্শৰে পৰিচালিত ব্যক্তি।

শেহতীয়াকৈ কংগ্ৰেছ নেতা গৌৰৱ গগৈৰ বিৰুদ্ধে মুখ্যমন্ত্ৰীয়ে কৰা কিছু মন্তব্যক ৰাজহুৱাকৈ সমৰ্থন কৰাৰ বাবে দিগন্ত বিশ্ব শৰ্মা একাংশৰ সমালোচনাৰ সন্মুখীন হৈছিল। ইয়াৰ প্ৰত্যুত্তৰত তেওঁ কয় যে এগৰাকী মুখ্যমন্ত্ৰীয়ে দেশৰ সেৱা কৰিবলৈ ওলাই আহিলে তেওঁৰ পৰিয়ালৰ নাগৰিকত্বক লৈ প্ৰশ্ন উঠাটো স্বাভাৱিক। এই সন্দৰ্ভত অধিক জানিবলৈ সংবাদ মাধ্যমে যোগাযোগ কৰাত তেওঁ কোনো অতিৰিক্ত মন্তব্য কৰাৰ পৰা বিৰত থাকে আৰু কয় যে ফেচবুকত তেওঁ যি লিখিছে সেয়াই তেওঁৰ অন্তিম বক্তব্য।