দিল্লীত ককৰোচ জনতা পাৰ্টীৰ প্ৰতিবাদ; ৪২ দিনীয়া অনশনৰ হুংকাৰ সোণম ৱাংচুকৰ

দেশৰ শিক্ষা ব্যৱস্থাত সংঘটিত হোৱা ব্যাপক খেলিমেলিক কেন্দ্ৰ কৰি ৰাষ্ট্ৰীয় ৰাজধানীৰ জন্তৰ মন্তৰত সৃষ্টি হৈছে তীব্ৰ প্ৰতিবাদী উত্তাল পৰিস্থিতি। ককৰোচ জনতা পাৰ্টীৰ উদ্যোগত আৰু প্ৰতিষ্ঠাপক অভিজিত দিপকেৰ নেতৃত্বত চলোৱা এই প্ৰতিবাদী কাৰ্যসূচীলৈ মুকলি সমৰ্থন আগবঢ়াইছে প্ৰখ্যাত পৰিৱেশ কৰ্মী সোনম ৱাংচুকে। কেৱল সমৰ্থন আগবঢ়োৱাই নহয়, অভিজিত দিপকে অথবা আন কোনো প্ৰতিবাদকাৰীক আৰক্ষীয়ে গ্ৰেপ্তাৰ কৰিলে ৪২ দিনীয়া অনশন কাৰ্যসূচী ৰূপায়ণ কৰিব বুলিও চৰকাৰক এক গুৰুতৰ সকীয়নি প্ৰদান কৰে ৱাংচুকে।

উল্লেখ্য যে, ৰাষ্ট্ৰীয় পৰ্যায়ৰ গুৰুত্বপূৰ্ণ পৰীক্ষা ক্ৰমে নিট, চি ইউ ই টি, চি বি এছ ই আৰু এছ এছ চিৰ পৰীক্ষাত হোৱা অনিয়মৰ বিৰুদ্ধে এই প্ৰতিবাদ সাব্যস্ত কৰা হৈছে। প্ৰতিবাদকাৰীসকলে কেন্দ্ৰীয় শিক্ষা মন্ত্ৰী ধৰ্মেন্দ্ৰ প্ৰধানৰ তাৎক্ষণিক পদত্যাগৰ দাবী উত্থাপন কৰিছে। দিল্লী আৰক্ষীয়ে অৱশ্যে জন্তৰ মন্তৰত এই সমাৱেশ অনুষ্ঠিত কৰাৰ বাবে প্ৰতিবাদকাৰীক আনুষ্ঠানিক অনুমতি প্ৰদান কৰিছে।

পৰিৱেশ কৰ্মী ৱাংচুকে জানিবলৈ দিয়া অনুসৰি, তেওঁ নিজেই দিল্লীৰ এই প্ৰতিবাদস্থলীত উপস্থিত হৈ কাৰ্যসূচীত অংশগ্ৰহণ কৰিব। ইয়াৰ লগতে তেওঁ কৰ্তৃপক্ষক এই শান্তিপূৰ্ণ প্ৰতিবাদত বাধা প্ৰদান নকৰিবলৈ আহ্বান জনায়। পৰীক্ষাৰ বিতৰ্ক, বৰ্ধিত নিবনুৱা সমস্যা আৰু শিক্ষা খণ্ডৰ সংস্কাৰৰ দৰে স্পৰ্শকাতৰ বিষয়সমূহক লৈ গঢ়ি উঠা ককৰোচ জনতা পাৰ্টীৰ এই আন্দোলন বৰ্তমান দেশৰ যুৱ প্ৰজন্মৰ এক অন্যতম বৃহৎ গণ আন্দোলন হিচাপে প্ৰতিষ্ঠিত হৈছে।