ৰে’লৱেত ১৪.৭শতাংশ ৰে’ল চালকৰ পদ খালি

ৰে’লৱেত লোকো পাইলট আৰু সহকাৰী লোকো পাইলটৰ মুঠ ১,২৭,৬৪৪ টা পদ আছে, যাৰ ভিতৰত ১ মাৰ্চ, ২০২৪ তাৰিখলৈকে ১৮,৭৬৬ টা পদ (১৪.৭শতাংশ) পূৰণ নোহোৱাকৈ আছে। তথ্যৰ অধিকাৰ (আৰটিআই)ৰ অধীনত কৰা আবেদনৰ উত্তৰত ৰে’লৱে ব’ৰ্ডে এই তথ্য প্ৰদান কৰিছে।

এক আৰটিআই উত্তৰত ৰে’লৱে ব’ৰ্ডে কয় যে সহকাৰী লোকো পাইলটতকৈ লোকো পাইলটৰ (ৰে’ল চালক) অধিক পদ খালী আছে। প্ৰদান কৰা তথ্য অনুসৰি, লোকো পাইলটৰ ৭০,০৯৩ টা পদ মঞ্জুৰ কৰা হৈছে, যাৰ ভিতৰত ১৪,৪২৯ টা (প্ৰায় ২০.৫ শতাংশ) খালী আছে।

আনহাতে সহকাৰী লোকো পাইলটৰ ৫৭,৫৫১ টা পদ অনুমোদিত, যাৰ ভিতৰত ৪,৩৩৭ টা (প্ৰায় ৭.৫ শতাংশ) খালী আছে।