জবলপুৰত শোকাবহ দুৰ্ঘটনা; বৰগী বান্ধত ক্ৰুইজ ডুবি ৪ জনৰ মৃত্যু, ১২ জন সন্ধানহীন

মধ্যপ্ৰদেশৰ জবলপুৰ জিলাৰ বৰগী বান্ধত বৃহস্পতিবাৰে সংঘটিত হয় এক ভয়ংকৰ জল-দুৰ্ঘটনা। এখন পৰ্যটক ক্ৰুইজ হঠাত্‍ পানীত ওলোটা হৈ পৰাৰ ফলত ৪ গৰাকী যাত্ৰীয়ে কৰুণ মৃত্যুক সাৱটি লয়। জবলপুৰৰ জিলা আয়ুক্ত ৰাঘৱেন্দ্ৰ সিঙে সংবাদ প্ৰতিষ্ঠান এ এন আইক জনোৱা মতে, এতিয়ালৈকে ১৫ জন যাত্ৰীক সুৰক্ষিতভাৱে উদ্ধাৰ কৰা হৈছে। অৱশ্যে এই দুৰ্ঘটনাৰ পাছত বৰ্তমানো ১২ জন যাত্ৰী সন্ধানহীন হৈ আছে।

দুৰ্ঘটনাৰ খবৰ পোৱাৰ লগে লগে উদ্ধাৰকাৰী দল ঘটনাস্থলীত উপস্থিত হৈ উদ্ধাৰ অভিযান তীব্ৰতৰ কৰি তোলে। স্থানীয় প্ৰশাসনে সন্ধানহীন যাত্ৰীসকলক বিচাৰি উলিয়াবলৈ সকলো ধৰণৰ প্ৰচেষ্টা অব্যাহত ৰাখিছে। বান্ধটোৰ বিশাল জলৰাশিৰ মাজত ডুব যোৱা ক্ৰুইজখনৰ পৰা যাত্ৰীসকলক উদ্ধাৰ কৰিবলৈ উদ্ধাৰকাৰী বাহিনীয়ে বিশেষ সা-সজুলিৰ সহায় গ্ৰহণ কৰিছে।

বিগত কেইটামান ঘণ্টাৰ পৰা উদ্ধাৰ অভিযান চলি আছে যদিও সন্ধানহীন যাত্ৰীসকলৰ কোনো শুংসূত্ৰ এতিয়ালৈকে পোৱা যোৱা নাই। বৰগী বান্ধৰ পৰ্যটনস্থলী হিচাপে থকা জনপ্ৰিয়তাৰ বাবে এই দুৰ্ঘটনাটোৱে অঞ্চলটোত গভীৰ শোকৰ ছাঁ পেলাইছে। প্ৰশাসনে সমগ্ৰ ঘটনাটোৰ এক উচ্চস্তৰীয় তদন্তৰ নিৰ্দেশ দিয়াৰ লগতে দুৰ্ঘটনাগ্ৰস্ত পৰিয়ালসমূহলৈ সহায়ৰ হাত আগবঢ়াইছে।