১০ আগষ্টৰ পৰা পুনৰ আৰম্ভ পাঠদান; বানত ক্ষতিগ্ৰস্ত বিদ্যালয়ৰ বাবে বিকল্প ব্যৱস্থা অসম চৰকাৰৰ

দীৰ্ঘদিনীয়া বান পৰিস্থিতিৰ বাবে ব্যাহত হোৱা পাঠদান পুনৰ স্বাভাৱিক কৰিবলৈ পদক্ষেপ গ্ৰহণ কৰিছে অসম চৰকাৰে। শিৱসাগৰ, চৰাইদেউকে ধৰি বানাক্ৰান্ত জিলাসমূহৰ বিদ্যালয়ত ১০ আগষ্টৰ পৰা নিয়মীয়া শ্ৰেণী পাঠদান পুনৰ আৰম্ভ কৰাৰ সিদ্ধান্ত লোৱা হৈছে। অৱশ্যে বানৰ ক্ষতিৰ ফলত এতিয়াও পাঠদানৰ উপযোগী হৈ নুঠা বিদ্যালয়সমূহৰ বাবে বিকল্প ব্যৱস্থাও গ্ৰহণ কৰিছে চৰকাৰে।

শিক্ষামন্ত্ৰী ৰণোজ পেগুৱে এই সন্দৰ্ভত কয় যে, বানৰ ফলত বহু বিদ্যালয় এতিয়াও স্বাভাৱিক অৱস্থালৈ ঘূৰি অহা নাই যদিও শিক্ষাৰ্থীসকলৰ শিক্ষাজীৱন যাতে অধিক ক্ষতিগ্ৰস্ত নহয়, সেই লক্ষ্যৰে এই সিদ্ধান্ত গ্ৰহণ কৰা হৈছে।

বানৰ পানীত এতিয়াও ডুবি থকা অথবা বোকা-পানীৰে ভৰি থকা বিদ্যালয়সমূহত তৎক্ষণাত পাঠদান আৰম্ভ কৰা সম্ভৱ নহ’ব বুলি উল্লেখ কৰে শিক্ষামন্ত্ৰীগৰাকীয়ে। এনে বিদ্যালয়ৰ শিক্ষাৰ্থীসকলৰ বাবে সাহায্য শিবিৰতে অস্থায়ীভাৱে শ্ৰেণী পাঠদানৰ ব্যৱস্থা কৰা হ’ব বুলিও সদৰি কৰে ৰণোজ পেগুৱে।

যিবোৰ বিদ্যালয় ১০ আগষ্টৰ ভিতৰত পাঠদানৰ বাবে সাজু হৈ উঠিব, সেই বিদ্যালয়সমূহত ওচৰ-চুবুৰীয়া বানাক্ৰান্ত বিদ্যালয়ৰ শিক্ষাৰ্থীসকলকো সাময়িকভাৱে অধ্যয়নৰ সুযোগ প্ৰদান কৰা হ’ব বুলি জানিবলৈ দিয়ে শিক্ষামন্ত্ৰীগৰাকীয়ে।

শিৱসাগৰ আৰু চৰাইদেউ জিলাৰ প্ৰতিখন বিদ্যালয় ১০ আগষ্টৰ ভিতৰত পুনৰ মুকলি কৰা সম্ভৱ নহ’ব বুলিও স্বীকাৰ কৰে ৰণোজ পেগুৱে। বহু বিদ্যালয়ত এতিয়াও পৰিষ্কাৰ-পৰিচ্ছন্নতা আৰু মেৰামতিৰ কাম চলি থকাত পৰ্যায়ক্ৰমে সকলো শিক্ষানুষ্ঠান পাঠদানৰ উপযোগী কৰি তোলা হ’ব বুলি উল্লেখ কৰে শিক্ষামন্ত্ৰীগৰাকীয়ে।

চৰকাৰৰ এই পদক্ষেপৰ জৰিয়তে বিদ্যালয়সমূহত পুনৰ শ্ৰেণী পাঠদান স্বাভাৱিক কৰাৰ লগতে অধিক ক্ষতিগ্ৰস্ত অঞ্চলৰ শিক্ষাৰ্থীসকলৰ শিক্ষাজীৱন যাতে ব্যাহত নহয়, তাৰ বাবেও অস্থায়ী বিকল্প ব্যৱস্থা অব্যাহত ৰখা হ’ব।