এছিয়ান গেমছ: মিক্সড মাৰ্শ্বেল আৰ্টছত ঐতিহাসিক ব্ৰঞ্জৰ পদক জয় সুচিকা তাৰিয়ালৰ

ভাৰতীয় ক্ৰীড়াবিদ সুচিকা তাৰিয়ালে ২০তম এছিয়ান গেমছৰ মিক্সড মাৰ্শ্বেল আৰ্টছ প্ৰতিযোগিতাত ব্ৰঞ্জৰ পদক অৰ্জন কৰি ইতিহাস ৰচনা কৰিছে। এছিয়ান গেমছৰ ইতিহাসত মিক্সড মাৰ্শ্বেল আৰ্টছত ভাৰতে লাভ কৰা এইটোৱেই হৈছে প্ৰথমটো পদক। মহিলাৰ ট্ৰেডিচনেল ৬০ কেজি শাখাত অনুষ্ঠিত ছেমিফাইনেল মেচখনৰ ফলাফলক লৈ এক বিতৰ্কৰ সৃষ্টি হয়। অতি প্ৰতিদ্বন্দ্বিতামূলক মেচখনৰ নিৰ্ধাৰিত সময়ৰ অন্তত ফলাফল ড্ৰ’ হোৱাৰ পিছত, ৰাতিপুৱাৰ ওজন ব্যৱধানৰ বিশেষ নিয়ম অনুসৰি ছিংগাপুৰৰ প্ৰতিদ্বন্দ্বী হুই হুন টে’ক বিজয়ী ঘোষণা কৰা হয়।

প্ৰথম ৰাউণ্ডত ছিংগাপুৰৰ হুই হুন টে’ই আধিপত্য বিস্তাৰ কৰে যদিও দ্বিতীয় ৰাউণ্ডত ৩৬ বছৰীয়া ভাৰতীয় ক্ৰীড়াবিদ তাৰিয়ালে সুন্দৰভাৱে প্ৰত্যাৱৰ্তন কৰে। নিৰ্ধাৰিত সময়ত মেচখন অসীমাংসিত হৈ ৰোৱাত এক মিনিটৰ অতিৰিক্ত ৰাউণ্ড প্ৰদান কৰা হয়।  নিয়ম অনুসৰি ৰাতিপুৱা কৰা ওজনৰ জোখৰ ওপৰত ভিত্তি কৰি ফলাফল নিৰ্ধাৰণ কৰা হয়। ছিংগাপুৰৰ খেলুৱৈগৰাকী সুচিকাতকৈ প্ৰায় ৭০০ গ্ৰাম কম ওজনৰ হোৱাৰ বাবে তেওঁক ফাইনেললৈ উন্নীত কৰা হয় আৰু সুচিকাই ব্ৰঞ্জৰ পদকতে সন্তুষ্ট থাকিবলগীয়া হয়।

বিতৰ্কিত সিদ্ধান্তৰ পিছত সুচিকা তাৰিয়াল আবেগিক হৈ পৰে যদিও তেওঁৰ এই জয়ে ভাৰতীয় ক্ৰীড়া ইতিহাসত এক নতুন অধ্যায়ৰ সূচনা কৰিলে। ইয়াৰ পূৰ্বে হৰিয়ানাৰ এইগৰাকী অভিজ্ঞ ক্ৰীড়াবিদে ২০২২ চনৰ কমনৱেলথ গেমছত জুডো আৰু ২০২৩ চনৰ এছিয়ান গেমছত কুৰাশ্ব প্ৰতিযোগিতাত ভাৰতক প্ৰতিনিধিত্ব কৰিছিল।এই ব্ৰঞ্জৰ পদকটোৰ সৈতে চলিত এছিয়ান গেমছত ভাৰতৰ মুঠ পদকৰ সংখ্যা ৬ টালৈ বৃদ্ধি পালে (৪ টা ৰূপ আৰু ২ টা ব্ৰঞ্জ)।