ৰাহুল গান্ধীৰ নাগৰিকত্বৰ গোচৰত নতুন মোৰ; লক্ষ্ণৌ বিচাৰপীঠৰ ন্যায়াধীশ সুভাষ বিদ্যাৰ্থীৰ অব্যাহতি

লোকসভাৰ বিৰোধী দলপতি ৰাহুল গান্ধীৰ দ্বৈত নাগৰিকত্বৰ বিতৰ্কই এতিয়া এক বিশেষ নাট্যৰূপ ধাৰণ কৰিছে। এলাহাবাদ উচ্চ ন্যায়ালয়ৰ লক্ষ্ণৌ বিচাৰপীঠৰ ন্যায়াধীশ সুভাষ বিদ্যাৰ্থীয়ে সোমবাৰে এই স্পৰ্শকাতৰ গোচৰৰ পৰা নিজকে আঁতৰাই ৰখাৰ সিদ্ধান্ত গ্ৰহণ কৰে। গোচৰকাৰী বিজেপি কৰ্মীগৰাকীয়ে আদালতৰ ওপৰত আস্থা হেৰুওৱা বুলি ছ’চিয়েল মিডিয়াত কৰা মন্তব্যৰ পাছতেই বিচাৰকগৰাকীয়ে এই কঠোৰ পদক্ষেপ গ্ৰহণ কৰে।

ৰাহুল গান্ধী কেৱল ভাৰতৰে নহয়, বৰঞ্চ ব্ৰিটেইনৰো নাগৰিক বুলি অভিযোগ উত্থাপন কৰিছিল বিজেপি কৰ্মী বিঘ্নেশ শিশিৰে। এই অভিযোগৰ ভিত্তিত ন্যায়াধীশ সুভাষ বিদ্যাৰ্থীয়ে প্ৰথমে এফআইআৰ দাখিলৰ নিৰ্দেশ দিয়ে যদিও মাত্ৰ ২৪ ঘণ্টাৰ পাছতেই তেওঁ নিজৰ ৰায় সলনি কৰিবলগীয়া হয়। ন্যায়াধীশ বিদ্যাৰ্থীয়ে স্বীকাৰ কৰে যে পূৰ্বৰ ৰায়টোত পদ্ধতিগত ত্ৰুটি ৰৈ গৈছিল আৰু ৰাহুল গান্ধীক কোনো জাননী নিদিয়াকৈ এনে নিৰ্দেশ দিয়াটো অনুচিত আছিল। আদালতৰ এই আকস্মিক সিদ্ধান্ত সলনিক লৈয়েই ক্ষুব্ধ হৈ পৰা গোচৰকাৰীয়ে ছ’চিয়েল মিডিয়াত আদালতৰ বিৰুদ্ধে সোচ্চাৰ হৈ পৰে।

বিজেপি কৰ্মী বিঘ্নেশ শিশিৰে পূৰ্বে লক্ষ্ণৌৰ বিশেষ এমপি-এমএলএ আদালতৰ দ্বাৰস্থ হৈ ৰাহুল গান্ধীৰ নাগৰিকত্বৰ তথ্য উলিয়াবলৈ চিবিআই তদন্তৰ দাবী জনাইছিল। তেওঁ আদালতত দাবী কৰিছিল যে ব্ৰিটেইন চৰকাৰৰ পৰা তেওঁ ৰাহুল গান্ধীৰ নাগৰিকত্ব সম্পৰ্কীয় কিছু তথ্য লাভ কৰিছে যদিও গোপনীয়তাৰ বাবে সকলো তথ্য ৰাজহুৱা কৰা হোৱা নাই। অৱশ্যে বিশেষ আদালতে এই গোচৰটো আইনী প্ৰক্ৰিয়াৰ অপব্যৱহাৰ বুলি অভিহিত কৰি খাৰিজ কৰি দিয়ে। ইয়াৰ পাছতেই বিঘ্নেশ শিশিৰে উচ্চ ন্যায়ালয়ৰ কাষ চাপে।

বৰ্তমান ন্যায়াধীশ সুভাষ বিদ্যাৰ্থীয়ে গোচৰটোৰ পৰা অব্যাহতি লোৱাৰ পাছত ৰাহুল গান্ধীৰ নাগৰিকত্বৰ এই গোচৰটো আন এজন ন্যায়াধীশৰ বিচাৰপীঠলৈ প্ৰেৰণ কৰা হ’ব। উচ্চ ন্যায়ালয়ৰ এজন ন্যায়াধীশে নিজৰ ৰায়দান দি পুনৰ ২৪ ঘণ্টাৰ ভিতৰত সেয়া প্ৰত্যাহৰ কৰা আৰু পৰৱৰ্তী সময়ত গোচৰটোৰ পৰাই আঁতৰি যোৱা কাৰ্যই আইনী মহলত ব্যাপক চৰ্চাৰ সৃষ্টি কৰিছে। ২০২৬ বৰ্ষৰ ৰাজনৈতিক প্ৰেক্ষাপটত বিৰোধী দলপতিগৰাকীৰ বিৰুদ্ধে উত্থাপিত এই অভিযোগৰ আইনী যুঁজখনে এতিয়া কি দিশ লয়, সেয়া লক্ষণীয় হ’ব।