উচ্চতম ন্যায়ালয়ৰ ৰায়ত মুখ ঠেকেচা খালে অসমৰ মুখ্যমন্ত্ৰীয়েঃ আগতীয়া জামিন লাভ কৰি মন্তব্য পৱন খেৰাৰ

ৰাজনৈতিক প্ৰতিশোধৰ বাবে ব্যক্তিগত স্বাধীনতা বলি দিব নোৱাৰি। উচ্চতম ন্যায়ালয়ৰ পৰা আগতীয়া জামিন লাভ কৰি এইদৰে চৰকাৰক তীব্ৰ কটাক্ষ কৰে কংগ্ৰেছ নেতা পৱন খেৰাই। অসমৰ মুখ্যমন্ত্ৰী হিমন্ত বিশ্ব শৰ্মাৰ পত্নীৰ বিৰুদ্ধে কৰা এক মন্তব্যক কেন্দ্ৰ কৰি ৰুজু হোৱা গোচৰত শুকুৰবাৰে শীৰ্ষ আদালতে খেৰাক এই সকাহ প্ৰদান কৰে। আদালতৰ এই ৰায়ক ৰাজ্য চৰকাৰ তথা মুখ্যমন্ত্ৰীৰ বাবে এক ডাঙৰ প্ৰত্যাহ্বান হিচাপে গণ্য কৰা হৈছে।

নিজৰ মুক্তিৰ পাছতে ছ’চিয়েল মিডিয়াত এক পোষ্ট দি পৱন খেৰাই অসমৰ মুখ্যমন্ত্ৰীৰ বিৰুদ্ধে ভয়-ভাবুকি আৰু ব্যক্তিগত আক্ৰমণৰ গুৰুতৰ অভিযোগ উত্থাপন কৰে। তেওঁ কয়, “যিসকলে ৰাষ্ট্ৰীয় ক্ষমতাৰ অপব্যৱহাৰ কৰিছে, তেওঁলোকৰ বাবে উচ্চতম ন্যায়ালয়ৰ এই ৰায় এক সকীয়নী। যিমান দিনলৈকে আমাৰ দেশত সাংবিধানিক গণতন্ত্ৰ বৰ্তি থাকিব, সিমান দিনলৈকে মিছাৰ ওপৰত সত্যৰ জয় সুনিশ্চিত।” কংগ্ৰেছ নেতৃত্বৰ লগতে জ্যেষ্ঠ অধিবক্তা অভিষেক মনু সিংভীকো তেওঁৰ আইনী যুঁজৰ বাবে কৃতজ্ঞতা জ্ঞাপন কৰে খেৰাই।

উচ্চতম ন্যায়ালয়ে নিজৰ ৰায়দানত স্পষ্ট কৰি দিয়ে যে ব্যক্তিগত স্বাধীনতা এক মৌলিক অধিকাৰ আৰু ইয়াক খৰ্ব কৰিবলৈ হ’লে গুৰুতৰ কাৰণ থকাটো প্ৰয়োজনীয়। বিশেষকৈ ৰাজনৈতিক বৈৰিতাৰ গোন্ধ থকা গোচৰৰ ক্ষেত্ৰত আদালত অধিক সতৰ্ক হোৱা উচিত বুলি ন্যায়াধীশ জে কে মহেশ্বৰী আৰু এ এছ চান্দুৰকাৰৰ বিচাৰপীঠে মন্তব্য কৰে। ইফালে, কংগ্ৰেছে এই ৰায়ক আদৰণি জনাই মুখ্যমন্ত্ৰী শৰ্মাক তেওঁৰ “অশোভনীয়” মন্তব্যৰ বাবে আত্মপৰ্যালোচনা কৰিবলৈ পৰামৰ্শ আগবঢ়ায়।

আনহাতে, উচ্চতম ন্যায়ালয়ৰ এই ৰায়ৰ পাছতো নিজৰ স্থিতিত অটল আছে মুখ্যমন্ত্ৰী হিমন্ত বিশ্ব শৰ্মা। সংবাদ মাধ্যমৰ আগত তেওঁ স্পষ্ট কৰি দিয়ে যে তেওঁক আনৰ পৰা গণতন্ত্ৰ বা সৌজন্যতাৰ পাঠ শিকাৰ প্ৰয়োজন নাই। তেওঁৰ মতে, এই আইনী যুঁজখন কেৱল আৰম্ভণিহে আৰু ইয়াৰ অন্ত এতিয়াই পৰা নাই। চৰকাৰৰ এনে আক্ৰমণাত্মক স্থিতিৰ পাছত আগন্তুক দিনত পৱন খেৰা আৰু অসম চৰকাৰৰ মাজৰ এই আইনী যুঁজে কি মোৰ লয়, সেয়া লক্ষণীয় হ’ব।