গুৱাহাটীত দ্বিতীয় সংস্কৰণৰ চেখোঁ ইণ্ডিয়ান এয়াৰ ফৰ্চ মাৰাথন ২০২৬ অনুষ্ঠিত

দেওবাৰে গুৱাহাটীত দ্বিতীয় সংস্কৰণৰ ‘চেখোঁ ইণ্ডিয়ান এয়াৰ ফৰ্চ মাৰাথন ২০২৬’ (SIM-26) অনুষ্ঠিত হৈ যায়। শাৰীৰিক সক্ষমতা, বীৰত্ব আৰু ৰাষ্ট্ৰীয় গৌৰৱৰ এই বিশেষ অনুষ্ঠানটোত উত্তৰ-পূবৰ বিভিন্ন প্ৰান্তৰ দৌৰ অনুৰাগী, বায়ু সেনাৰ জোৱান, প্ৰাক্তন সৈনিক, তেওঁলোকৰ পৰিয়াল আৰু সাধাৰণ নাগৰিকে অংশগ্ৰহণ কৰে।

এই মাৰাথনখন ১৯৭১ চনৰ ভাৰত-পাক যুদ্ধৰ কিংবদন্তি পৰম বীৰ চক্ৰ বিজয়ী ফ্লাইং অফিচাৰ নিৰ্মল জিৎ সিং চেখোঁৰ প্ৰতি এক শ্ৰদ্ধাঞ্জলি। তেওঁৰ অতুলনীয় সাহস আৰু সৰ্বোচ্চ বলিদান আজিও অনুপ্ৰেৰণাৰ এক চিৰস্থায়ী উৎস হৈ আছে। এজন চৰকাৰী বিষয়াই কয়, “তেওঁৰ বীৰত্ব, দৃঢ়তা আৰু কৰ্তব্যৰ প্ৰতি থকা নিষ্ঠাই প্ৰজন্মৰ পিছত প্ৰজন্মক অনুপ্ৰেৰণা যোগাই আহিছে আৰু ভাৰতীয় বায়ু সেনাৰ উচ্চ পৰম্পৰাক প্ৰতিফলিত কৰিছে।”

পূব বায়ু সেনা কমাণ্ডৰ এয়াৰ অফিচাৰ কমাণ্ডিং-ইন-চিফ এয়াৰ মাৰ্শ্বাল আই এছ ৱালিয়াই গুৱাহাটীত এই SIM-26 মাৰাথনৰ ফ্লেগ অফ কৰে। ২১.১ কিলোমিটাৰ, ১০ কিলোমিটাৰ আৰু ৫ কিলোমিটাৰ— এই তিনিটা শিতানত ৩৫০০ৰো অধিক দৌৰবিদে অংশগ্ৰহণ কৰে। এই বিপুল সঁহাৰিয়ে অঞ্চলটোৰ জনসাধাৰণৰ মাজত স্বাস্থ্যসন্মত জীৱনশৈলী আৰু শাৰীৰিক সক্ষমতাৰ প্ৰতি থকা উৎসাহক প্ৰতিফলিত কৰিছে।

মাৰাথনৰ আৰম্ভণিতে এক জুম্বা ৱাৰ্ম-আপ চেচন অনুষ্ঠিত হয়। ইয়াৰ পিছতে ভাৰতীয় বায়ু সেনা বেণ্ডৰ অনুপ্ৰেৰণামূলক পৰিৱেশন আৰু এয়াৰ ৱাৰিয়ৰ ড্ৰিল টিমৰ এক সুন্দৰ প্ৰদৰ্শনে দৰ্শকক মোহিত কৰে।

গুৱাহাটী সংস্কৰণৰ এই মাৰাথনখন বিশেষভাৱে গুৰুত্বপূৰ্ণ, কাৰণ ই উত্তৰ-পূব অঞ্চলৰ সৈতে ভাৰতীয় বায়ু সেনাৰ সম্পৰ্ক অধিক দৃঢ় কৰি তুলিছে। এই অনুষ্ঠানে সাধাৰণ নাগৰিকক বায়ু সেনাৰ জোৱান আৰু প্ৰাক্তন সৈনিকসকলৰ সৈতে একেলগে দৌৰাৰ এক অনন্য সুযোগ প্ৰদান কৰে, য’ত অনুশাসন, একাগ্ৰতা আৰু দেশসেৱাৰ দৰে মূল্যবোধসমূহ উদযাপন কৰা হয়।