মণিপুৰৰ ট্ৰংলোবি বিস্ফোৰণ কাণ্ডঃ এনআইএ-ৰ জালত ৫ উগ্ৰপন্থী

মণিপুৰৰ ট্ৰংলোবিত অলপতে সংঘটিত ভয়ংকৰ বোমা বিস্ফোৰণৰ তদন্ত চলাই কেন্দ্ৰীয় তদন্তকাৰী সংস্থা এনআইএ-য়ে আজি পাঁচজন সন্দেহযুক্ত উগ্ৰপন্থীক গ্ৰেপ্তাৰ কৰিছে। ৰাজ্যখনৰ শেহতীয়া অশান্ত পৰিৱেশৰ মাজত কূটাঘাতমূলক কাৰ্যৰ সৈতে জড়িত শক্তিসমূহক উৎখাত কৰিবলৈ তদন্তকাৰী সংস্থাটোৱে বৰ্তমান অভিযান তীব্ৰতৰ কৰি তুলিছে।

গৃহ মন্ত্ৰী গোবিন্দাস কোন্থৌজামে মন্ত্ৰীপুখুৰীস্থিত সচিবালয়ত এক সংবাদমেল সম্বোধন কৰি এই কথা জানিবলৈ দিয়ে। মণিপুৰৰ ট্ৰংলোবি বিস্ফোৰণৰ অগ্ৰগতিৰ সন্দৰ্ভত গৃহ মন্ত্ৰী গোবিন্দাস কোন্থৌজামে কয়, “এই ঘটনাত জড়িত থকাৰ সন্দেহত এতিয়ালৈকে ‘ইউনাইটেড কুকি নেশ্যনেল আৰ্মী’ৰ পাঁচজন কেডাৰক এনআইএ-য়ে কৰায়ত্ত কৰিছে।” তদন্ত যিমানেই আগবাঢ়িব সিমানেই বিস্ফোৰণৰ আঁৰৰ ৰহস্য পোহৰলৈ আহিব বুলিও তেওঁ জানিবলৈ দিয়ে।

আনহাতে বিষ্ণুপুৰৰ থিনুংগেইত শেহতীয়াকৈ হোৱা ৰাইজ আৰু নিৰাপত্তা বাহিনীৰ সংঘাতৰ বাবে গৃহ মন্ত্ৰী গোবিন্দাস কোন্থৌজামে এটা অমূলক উৰাবাতৰিক জগৰীয়া কৰে। এই উত্তেজনাৰ সময়ত একাংশ লোকে নিৰাপত্তা বাহিনীৰ পৰা আঠটাকৈ আগ্নেয়াস্ত্ৰ কাঢ়ি লৈছিল যদিও পাছত জোৱানসকলে সেইসমূহ উদ্ধাৰ কৰিবলৈ সক্ষম হোৱা বুলিও তেওঁ জানিবলৈ দিয়ে।

বৰ্তমান মণিপুৰত শান্তি বৰ্তাই ৰাখিবলৈ ৩৪,০০০ তকৈও অধিক নিৰাপত্তা কৰ্মী নিয়োজিত হৈ আছে। গৃহ মন্ত্ৰী গোবিন্দাস কোন্থৌজামে কয় যে ৰাজ্যখনত থকা ৭,০০০ জোৱানৰ নাটনি দূৰ কৰিবলৈ চৰকাৰে অতি সোনকালে এক নিযুক্তি প্ৰক্ৰিয়া আৰম্ভ কৰিব আৰু ইয়াত মহিলাসকলক অগ্ৰাধিকাৰ দিয়া হ’ব। ইয়াৰ উপৰি আইন-শৃংখলা পৰিস্থিতিৰ অধিক উন্নতি হ’লেহে বন্ধ হৈ থকা শিক্ষানুষ্ঠানসমূহ পুনৰ খোলাৰ লক্ষ্য চৰকাৰে লৈছে বুলিও তেওঁ সংবাদমেলত অৱগত কৰে।