হৃদয়বিদাৰক! লোভনীয় চাকৰি ত্যাগ কৰি খেতিত ধৰিছিল ৰোশন বালাকৃষ্ণ! কিন্তু বজ্ৰপাতে কাঢ়িলে প্ৰাণ

প্ৰতিষ্ঠিত কোম্পানীৰ লোভনীয় চাকৰি ত্যাগ কৰি কৃষি কাৰ্যত লাগিছিল ৰোশন। কিন্তু পথাৰৰ মাজত কাম কৰি থাকোতেই ভয়ংকৰ বজ্ৰপাতত হেৰুৱাবলগীয়া হ’ল প্ৰাণ। কৰ্ণাটকৰ মহীশূৰ জিলাত সংঘটিত বজ্ৰপাতত ছফ্টৱেৰ ইঞ্জিনিয়াৰ হোচকলু ৰোশন বালকৃষ্ণৰ লগতে প্ৰাণ হেৰুৱায় মুঠ ৩ জন লোকে।

পৰিয়ালৰ লোকে জানিবলৈ দিয়া মতে, তথ্য প্ৰযুক্তি খণ্ডৰ এক মোটা অংকৰ দৰমহাৰ চাকৰি এৰি নতুন কৃষি প্ৰযুক্তি আৰু আধুনিক যন্ত্ৰপাতিৰ ব্যৱসায় কৰাৰ উদ্দেশ্যে এজন সতীৰ্থৰ সৈতে পথাৰত নামিছিল ৰোশন। ঘটনাৰ দিনা তেওঁ নিজৰ পত্নী আৰু সন্তানৰ সৈতে মহীশূৰৰ য়েলৱালা অঞ্চলত থকা নিজৰ মাটি এডোখৰ চাবলৈ গৈছিল। তাতে এজোপা গছৰ পৰা আম পাৰিবলৈ যাওঁতেই হঠাতে তেওঁৰ ওপৰত বজ্ৰপাত পৰে আৰু তেওঁ মাটিত বাগৰি পৰে। তেওঁৰ সৈতে থকা আন এজন লোকো এই ঘটনাত সামান্য পৰিমাণে আহত হয়।

ঠিক একেধৰণৰে আন এটা কৰুণ ঘটনা সংঘটিত হয় জিলাখনৰে হুনচুৰ মহকুমাৰ হালেপুৰা গাঁৱতো। নিজৰ আধা একৰ মাটিত কাম কৰি থকা অৱস্থাতে বজ্ৰপাতৰ ফলত থিতাতে মৃত্যু ঘটে যশোদা নামৰ এগৰাকী মহিলাৰ।

আনহাতে, জিলাখনৰে এইচ ডি ক’টে মহকুমাৰ মালাদাহাল্লী গাঁৱতো আন এক অনুৰূপ ঘটনা পোহৰলৈ আহে। দিনৰ প্ৰায় ১ বজাত খেতি পথাৰৰ মাজৰ এজোপা গছৰ তলত আশ্ৰয় লৈ থকা অৱস্থাতে বজ্ৰপাত পৰি আপ্পায়া নামৰ এজন খেতিয়কৰ থিতাতে মৃত্যু ঘটে। ইয়াৰ কিছু সময়ৰ পাছতে সেই একেটা অঞ্চলতে বজ্ৰপাতে আন এজন লোকৰ এটা গৰুও কাঢ়ি নিয়ে। এজাক খৰাং বতৰৰ পাছত অহা এই আকস্মিক প্ৰাকৃতিক দুৰ্যোগে এতিয়া সমগ্ৰ অঞ্চলটোতে এক গভীৰ শোকাকুল পৰিৱেশৰ সৃষ্টি কৰিছে।