এতিয়াৰে পৰা বিদ্যালয়ৰ মধ্যাহ্ন ভোজনত প্ৰদান কৰা হ’ব চিকেন বিৰিয়ানী, চৰকাৰৰ ডাঙৰ সিদ্ধান্ত

পুষ্টিহীনতা দূৰীকৰণ আৰু শিক্ষাৰ্থীৰ উপস্থিতি নিশ্চিত কৰাৰ লক্ষ্যৰে বিদ্যালয়ৰ মধ্যাহ্ন ভোজনত এক অভূতপূৰ্ব পৰিৱৰ্তন আনিবলৈ সাজু হ’ল তামিলনাডু চৰকাৰ।

চৰকাৰী বিদ্যালয়সমূহৰ মধ্যাহ্ন ভোজন আঁচনিত এইবাৰ ছাত্ৰ-ছাত্ৰীৰ বাবে সুস্বাদু ‘চিকেন বিৰিয়ানি’ অন্তৰ্ভুক্ত কৰাৰ অভিলাষী পৰিকল্পনাৰ কথা পুনৰ স্পষ্ট কৰিছে ৰাজ্য চৰকাৰে।

তামিলনাডুৰ বিদ্যালয় শিক্ষা মন্ত্ৰী ৰাজ মোহনে এই যুগান্তকাৰী পদক্ষেপৰ কথা ঘোষণা কৰি কয় যে খাদ্য সুৰক্ষা আৰু পৰিষ্কাৰ-পৰিচ্ছন্নতাৰ দিশটোক সৰ্বাধিক অগ্ৰাধিকাৰ দি সমগ্ৰ ৰাজ্যতে এই ব্যৱস্থা পৰ্যায়ক্ৰমে ৰূপায়ণ কৰা হ’ব।

বিদ্যালয়ত আমিষ খাদ্যৰ এই বিশেষ সংযোজনৰ কাৰণ ব্যাখ্যা কৰি মন্ত্ৰীগৰাকীয়ে ৰাজ্যৰ বৰ্তমানৰ কল্যাণমূলক মানদণ্ডৰ এক তুলনামূলক যুক্তি দাঙি ধৰে।

পুঝাল কেন্দ্ৰীয় কাৰাগাৰৰ বন্দীসকলকো নিয়মীয়াকৈ চিকেন বিৰিয়ানি যোগান ধৰা হয় বুলি উল্লেখ কৰি শিক্ষা মন্ত্ৰীয়ে প্ৰশ্ন উত্থাপন কৰে যে তেনেস্থলত দেশৰ ভৱিষ্যৎ নিৰ্মাতা বিদ্যালয়ৰ কণ-কণ ছাত্ৰ-ছাত্ৰীসকলে এই পুষ্টিকৰ খাদ্য লাভৰ পৰা বঞ্চিত হ’ব কিয়?

বিশেষজ্ঞসকলৰ মতে, বৃদ্ধিৰ সময়ছোৱাত শিশুসকলৰ বাবে প্ৰটিনৰ অত্যন্ত প্ৰয়োজন। সেয়ে তামিলনাডুত চলি থকা পুষ্টি বিপ্লৱৰ এক প্ৰাকৃতিক ধাৰাবাহিকতা হিচাপে শিক্ষাৰ্থীৰ বাবে এই খাদ্য ব্যৱস্থা যুগান্তকাৰী বিবেচিত হ’ব পাৰে।

অৱশ্যে সমগ্ৰ ৰাজ্যজুৰি একেলগে এই আঁচনি আৰম্ভ নকৰি প্ৰথম পৰ্যায়ত কিছু নিৰ্দিষ্ট এলেকাত পৰীক্ষামূলকভাৱে পাইলট প্ৰকল্প হিচাপে ইয়াক প্ৰযোজ্য কৰা হ’ব। খাদ্য প্ৰস্তুতকৰণৰ মানদণ্ড, যোগান শৃংখল আৰু পৰিষ্কাৰ খাদ্য বিতৰণৰ ব্যৱস্থা সূচাৰুৰূপে নিৰীক্ষণ কৰাৰ পিছতহে পৰৱৰ্তী পদক্ষেপ লোৱা হ’ব বুলি বিভাগীয় সূত্ৰে প্ৰকাশ।

প্ৰাথমিক বিদ্যালয়সমূহত ব্ৰেকফাষ্ট আৰু পৰম্পৰাগত মধ্যাহ্ন ভোজনৰ সফল ৰূপায়ণৰ পাছত তামিলনাডু চৰকাৰৰ এই অভিনৱ পদক্ষেপে শিক্ষাৰ্থীৰ পুষ্টি আৰু স্বাস্থ্য সুৰক্ষাৰ ক্ষেত্ৰত এক নতুন মাত্ৰা যোগ কৰিব বুলি আশা প্ৰকাশ কৰা হৈছে।