লোক সেৱা ভৱনত চুক্তি স্বাক্ষৰ, অসমক বিশেষ কৰ্কট যত্নৰ কেন্দ্ৰ হিচাপে গঢ়াৰ লক্ষ্য

অসম আৰু উত্তৰ-পূৰ্বাঞ্চলত কৰ্কট ৰোগৰ চিকিৎসা ৰূপান্তৰৰ দিশত এক যুগান্তকাৰী পদক্ষেপ হিচাপে অসম চৰকাৰে আজি গুৱাহাটীত প্ৰ’টন বিম থেৰাপি কেন্দ্ৰ স্থাপনৰ বাবে আই বি এ পাৰ্টিকল থেৰাপি ইণ্ডিয়া প্ৰাইভেট লিমিটেডৰ সৈতে চুক্তি স্বাক্ষৰ কৰে।

দিছপুৰৰ লোক সেৱা ভৱনত মুখ্যমন্ত্ৰী হিমন্ত বিশ্ব শৰ্মাৰ উপস্থিতিত এই চুক্তি স্বাক্ষৰিত হয়।

প্ৰায় ৬০০ কোটি টকাৰ বিনিয়োগেৰে এই কেন্দ্ৰটো ৰাজ্য চৰকাৰে স্থাপন কৰা ভাৰতৰ প্ৰথমটো প্ৰ’টন থেৰাপি সুবিধা হ’ব। ই উত্তৰ-পূৰ্বাঞ্চলৰ ৰোগীৰ বাবে বিশ্বৰ অন্যতম অত্যাধুনিক বিকিৰণ ভিত্তিক কৰ্কট ৰোগৰ চিকিৎসা কাষ চপাই আনিব, লগতে অসমক বিশেষ কৰ্কট ৰোগৰ যত্নৰ এক প্ৰধান কেন্দ্ৰ হিচাপে গঢ়ি তুলিব।

এই উপলক্ষে মুখ্যমন্ত্ৰীয়ে এই পদক্ষেপক সাধাৰণ নাগৰিকৰ বাবে উন্নত কৰ্কট ৰোগৰ চিকিৎসা সুলভ আৰু সাশ্ৰয়ী কৰি তোলাৰ বাবে ৰাজ্য চৰকাৰৰ অব্যাহত প্ৰচেষ্টাৰ এক গুৰুত্বপূৰ্ণ মাইলৰ খুঁটি বুলি অভিহিত কৰে।

তেওঁ কয়, “কৰ্কট ৰোগ অসম আৰু উত্তৰ-পূৰ্বাঞ্চলৰ সন্মুখত থকা অন্যতম প্ৰধান জনস্বাস্থ্য প্ৰত্যাহ্বান হৈয়েই আছে। আমাৰ চৰকাৰে দৃঢ়ভাৱে বিশ্বাস কৰে যে মানসম্পন্ন স্বাস্থ্যসেৱাৰ সুবিধা ৰোগীৰ বাসস্থান বা দূৰৱৰ্তী চহৰলৈ চিকিৎসাৰ বাবে যাত্ৰা কৰাৰ ক্ষমতাৰ ওপৰত নিৰ্ভৰ কৰা উচিত নহয়। প্ৰতিজন নাগৰিক সময়মতে ৰোগ নিৰ্ণয় আৰু মানসম্পন্ন চিকিৎসা সেৱাৰ যোগ্য। এই প্ৰতিশ্ৰুতিৰে আমি অসমত কৰ্কট ৰোগৰ যত্নৰ আন্তঃগাঁথনি ক্ৰমাগতভাৱে শক্তিশালী কৰি আহিছো। প্ৰ’টন বিম থেৰাপি কেন্দ্ৰ সেই দিশত আন এক গুৰুত্বপূৰ্ণ পদক্ষেপ।”

মুখ্যমন্ত্ৰীয়ে ব্যাখ্যা কৰে যে প্ৰ’টন থেৰাপি হৈছে বিকিৰণ চিকিৎসাৰ এক অত্যাধুনিক ৰূপ যিয়ে কৰ্কট কোষ ধ্বংস কৰিবলৈ নিখুঁতভাৱে লক্ষ্য কৰি প্ৰ’টন ৰশ্মি ব্যৱহাৰ কৰে আৰু লগতে চাৰিওফালৰ সুস্থ কলাত বিকিৰণৰ সংস্পৰ্শ কম কৰে। ইয়াৰ দ্বাৰা কিছুমান দীৰ্ঘম্যাদী পাৰ্শ্বক্ৰিয়া কমোৱাত সহায় কৰিব পাৰি আৰু চিকিৎসাৰ মান উন্নত কৰিব পাৰি। এই প্ৰযুক্তি মগজু, মেৰুদণ্ড, চকু, মূৰ আৰু ডিঙিৰ লগতে খাদ্যনলী, হাওঁফাওঁ, যকৃত আৰু স্তনৰ কৰ্কট ৰোগৰ চিকিৎসাৰ বাবে বিশেষভাৱে উপকাৰী। কৰ্কট ৰোগত আক্ৰান্ত শিশুৰ বাবে ইয়াৰ সম্ভাৱ্য উপকাৰিতা বিশেষভাৱে উল্লেখযোগ্য, কিয়নো তেওঁলোকৰ বিকাশশীল অংগবোৰ বিকিৰণৰ প্ৰতি অধিক সংবেদনশীল, বুলি শৰ্মাই কয়।

“প্ৰ’টন থেৰাপিয়ে কৰ্কট ৰোগৰ চিকিৎসাধীন শিশুৰ মগজু, হৃদযন্ত্ৰ আৰু মেৰুদণ্ডৰ দৰে গুৰুত্বপূৰ্ণ অংগ সুৰক্ষিত কৰাত সহায় কৰিব পাৰে। ই কিছুমান দীৰ্ঘম্যাদী জটিলতা আৰু পিছৰ জীৱনত দ্বিতীয়বাৰ কৰ্কট ৰোগ হোৱাৰ সম্ভাৱনাও হ্ৰাস কৰিব পাৰে। যেতিয়া আমি কম বয়সীয়া ৰোগীৰ চিকিৎসা কৰি আছো আৰু তৎক্ষণাৎ আৰোগ্যৰ বাহিৰেও তেওঁলোকৰ দীৰ্ঘম্যাদী জীৱনৰ মানদণ্ডৰ প্ৰতি লক্ষ্য ৰাখিছো, তেতিয়া এইটো এক গুৰুত্বপূৰ্ণ বিবেচনা,” তেওঁ কয়।