অসমৰ মুখ্যমন্ত্ৰীয়ে ভূটানলৈ পুৰাবি আইচক্ৰিমৰ প্ৰথম ৰপ্তানিৰ শুভাৰম্ভ কৰে

অসমৰ দুগ্ধ খণ্ডৰ সম্প্ৰসাৰণৰ দিশত এক গুৰুত্বপূৰ্ণ পদক্ষেপ হিচাপে মুখ্যমন্ত্ৰী ড° হিমন্ত বিশ্ব শৰ্মাই আজি দিছপুৰ জনতা ভৱনত অনুষ্ঠিত এক অনুষ্ঠানত ৰাজ্যৰ প্ৰথমখন দুগ্ধজাত সামগ্ৰী ৰপ্তানিৰ শুভাৰম্ভ কৰে। এইবাৰ ভূটানলৈ ৫,৬২৭ লিটাৰ পুৰাবি প্ৰিমিয়াম আইচক্ৰিম ৰপ্তানি কৰা হৈছে।

পশ্চিম অসম মিল্ক উদ্যোগ লিমিটেডে (WAMUL) স্থানীয় দুগ্ধ উৎপাদনকাৰী কৃষকৰ পৰা সংগ্ৰহ কৰা আৰু কৃষি আৰু প্ৰক্ৰিয়াকৃত খাদ্য সামগ্ৰী ৰপ্তানি উন্নয়ন কৰ্তৃপক্ষই (APEDA) সুবিধা প্ৰদান কৰা এই পদক্ষেপে অসমৰ দুগ্ধ খণ্ড আৰু দুগ্ধ কৃষকসকলৰ বাবে নতুন আন্তঃৰাষ্ট্ৰীয় বজাৰৰ সুযোগ মুকলি কৰিব বুলি বিশ্বাস কৰা হৈছে।

উল্লেখযোগ্য যে, এইখনেই ৰাজ্যৰ পৰা বিদেশলৈ দুগ্ধজাত সামগ্ৰীৰ প্ৰথমটো বাণিজ্যিক ৰপ্তানি।

আন্তঃৰাষ্ট্ৰীয় বজাৰক লক্ষ্য কৰি এই ৰপ্তানিৰ চালানত বাটাৰস্কচ, চকলেট, চকো চিপচ, ষ্ট্ৰবেৰী, আম আৰু ভেনিলা আদি বিভিন্ন স্বাদৰ আইচক্ৰিম অন্তৰ্ভুক্ত কৰা হৈছে।

এই বাণিজ্যিক চালানৰ জৰিয়তে পুৰাবি আইচক্ৰিম ভূটানৰ প্ৰধান বজাৰসমূহ, বিশেষকৈ থিম্পু, পাৰো, ফুৱেণ্টছোলিং আদিত উপলব্ধ হ’ব। এই ঐতিহাসিক পদক্ষেপে কেৱল স্থানীয় দুগ্ধ উৎপাদনকাৰীসকলক সবলীকৰণ কৰাই নহয়, উত্তৰ-পূৰ্বাঞ্চলৰ পৰা মূল্যবৰ্ধিত দুগ্ধজাত সামগ্ৰী বিশ্ব বজাৰলৈ সম্প্ৰসাৰিত কৰাৰ এক নতুন অধ্যায়ৰো আৰম্ভণি কৰিব।

পশ্চিম অসম মিল্ক প্ৰডিউচাৰ্ছ কো-অপাৰেটিভ ইউনিয়ন লিমিটেডে (WAMUL) উৎপাদন কৰা পুৰাবি আইচক্ৰিমৰ বিপণনৰ দায়িত্বত আছে নৰ্থ ইষ্ট ডেইৰী এণ্ড ফুডছ লিমিটেডে (NEDFL)। আইচক্ৰিম নিৰ্মাণত ব্যৱহাৰ কৰা গাখীৰ পুৰাবি ডেইৰীৰ সহযোগী নেটৱৰ্কৰ জৰিয়তে অসমৰ বিভিন্ন প্ৰান্তৰ দুগ্ধ উৎপাদনকাৰীৰ পৰা সংগ্ৰহ কৰা হয়। ফলত ৰাজ্যৰ হাজাৰ হাজাৰ দুগ্ধ কৃষক এই ৰপ্তানি পদক্ষেপৰ সৈতে প্ৰত্যক্ষভাৱে জড়িত।

যোৱা চাৰি-পাঁচ বছৰত পুৰাবিৰ অবিৰত সম্প্ৰসাৰণেও এই সাফল্যত গুৰুত্বপূৰ্ণ ভূমিকা পালন কৰিছে। বিশ্ব বেংকৰ দ্বাৰা পুঁজি যোগান ধৰা APART প্ৰকল্পই এই অগ্ৰগতিৰ যাত্ৰাক আৰু শক্তিশালী কৰিছে। APART-ৰ বিত্তীয় সহায়ত পুৰাবিৰ দৈনিক প্ৰক্ৰিয়াকৰণ ক্ষমতা ৬০,০০ লিটাৰৰ পৰা ১,৫০,০০০ লিটাৰলৈ বৃদ্ধি কৰা হৈছে।

এই আন্তঃৰাষ্ট্ৰীয় ৰপ্তানি ৰূপায়ণত ভাৰত চৰকাৰ বাণিজ্য আৰু উদ্যোগ মন্ত্ৰণালয়ৰ অধীনৰ APEDA-ই গুৰুত্বপূৰ্ণ ভূমিকা পালন কৰিছে। NEDFL-ক প্ৰয়োজনীয় ৰপ্তানি প্ৰক্ৰিয়া সম্পূৰ্ণ কৰা, নথিপত্ৰ প্ৰস্তুত কৰা আৰু সকলো নিয়ন্ত্ৰক আনুষ্ঠানিকতা চূড়ান্ত কৰাত APEDA-ই প্ৰয়োজনীয় সহায় আগবঢ়াইছে।

আজিৰ শুভাৰম্ভ অনুষ্ঠানত উপস্থিত থকা সংবাদ মাধ্যমক সম্বোধন কৰি মুখ্যমন্ত্ৰীয়ে কয় যে যোৱা বছৰবোৰত, বিশেষকৈ যোৱা পাঁচ বছৰত ৰাজ্য চৰকাৰে অসমৰ দুগ্ধ খণ্ডৰ উন্নয়নৰ বাবে বহু পদক্ষেপ গ্ৰহণ কৰিছে, যাৰ সুফল এতিয়া ক্ৰমে দেখা পোৱা গৈছে।

তেওঁ কয় যে বৰ্তমান অসমত প্ৰতিদিনে ২,৫০,০ লিটাৰ পৰ্যন্ত গাখীৰ প্ৰক্ৰিয়াকৰণ কৰি বিভিন্ন দুগ্ধজাত সামগ্ৰী উৎপাদন কৰা হৈছে।

পুৰাবি ডেইৰীৰ দ্বাৰা ভূটানলৈ আজিৰ এই বৃহৎ পৰিমাণৰ দুগ্ধজাত সামগ্ৰী ৰপ্তানিক অসমৰ দুগ্ধ খণ্ডৰ বাবে এক উৎসাহজনক বিকাশ বুলি অভিহিত কৰি শৰ্মাই কয় যে ভৱিষ্যতে ভূটানলৈ আইচক্ৰিম আৰু অন্যান্য দুগ্ধজাত সামগ্ৰীৰ নিয়মীয়া ৰপ্তানি অব্যাহত থাকিব। এই গুৰুত্বপূৰ্ণ পদক্ষেপৰ বাবে তেওঁ পুৰাবি ডেইৰী, NEDFL, NDDB আৰু APEDA-ৰ কৰ্তৃপক্ষক কৃতজ্ঞতা আৰু প্ৰশংসা জ্ঞাপন কৰে।