অসমত ভয়াবহ বান পৰিস্থিতি: এদিনতে ২১ জনৰ মৃ*ত্যু, সৰ্বমুঠ মৃ*ত্যু ৩১ লৈ বৃদ্ধি

​অসমত বান পৰিস্থিতি অত্যন্ত জটিল হৈ পৰিছে। ২১ জুলাইৰ দিনটোত ৰাজ্যখনৰ বিভিন্ন স্থানত বানৰ কবলত পৰি ২১ জন লোকে প্ৰাণ হেৰুৱাইছে। ইয়াৰ লগে লগে চলিত বানত সৰ্বমুঠ মৃতকৰ সংখ্যা ৩১ জনলৈ বৃদ্ধি পাইছে।অসম ৰাজ্যিক দুৰ্যোগ ব্যৱস্থাপনা প্ৰাধিকৰণ (ASDMA)ৰ শেহতীয়া তথ্য অনুসৰি, ৰাজ্যখনৰ ১৬ খন জিলাৰ ৮৭২ খন গাঁও বানৰ পানীত ডুব গৈছে আৰু প্ৰায় ৫.৬৫ লাখ লোক প্ৰভাৱিত হৈছে।

উজনি অসমৰ শিৱসাগৰ, চৰাইদেউ, যোৰহাট আৰু গোলাঘাট জিলা আটাইতকৈ বেছি ক্ষতিগ্রস্ত হৈছে। ২১ জন মৃতকৰ ভিতৰত শিৱসাগৰত ১৩ জন, চৰাইদেউত ৫ জন, গোলাঘাটত ২ জন আৰু যোৰহাটত ১ জন লোকৰ মৃত্যু হৈছে। প্ৰায় ২৪,২১০.৩৫ হেক্টৰ কৃষিভূমি পানীৰ তলত আছে, যিয়ে কৃষকসকলৰ ব্যাপক ক্ষতি সাধন কৰিছে। দিখৌ আৰু দিচাং নদীৰ পানী বিপদসীমাৰ ওপৰেৰে বৈ আছে।

ইয়াৰ উপৰিও ব্ৰহ্মপুত্ৰ আৰু ধানসিৰি নদীও বিপদসীমাৰ ওপৰেৰে প্ৰৱাহিত হৈছে। ১২২৮ৰো অধিক লোকে ৭১ টা ৰাজহুৱা সাহায্য শিবিৰত আশ্ৰয় লৈছে। ইয়াৰ উপৰিও ১ লাখৰো অধিক লোকে ২০২ টা সাহায্য বিতৰণ কেন্দ্ৰৰ পৰা জৰুৰী সামগ্ৰী লাভ কৰিছে। উদ্ধাৰ কাৰ্যত সেনা বাহিনীয়ো সহায় কৰি আছে। বানৰ ফলত ৩৩ টা পথ, ১ টা দলং আৰু ৬ টা মঠাউৰি ক্ষতিগ্রস্ত হৈছে।