বিহাৰৰ লক্ষীচৰাইৰ অশোকধাম মন্দিৰত পদপিষ্ট হৈ ৭ ভক্তৰ কৰুণ মৃত্যু! আহত বহুতো

পবিত্ৰ শাওণ মাহৰ সোমবাৰে ভগৱান শিৱৰ আৰাধনা কৰিবলৈ ওলাই অহা ভক্তৰ সমাগম পৰিণত হ’ল এক হৃদয়বিদাৰক দুৰ্ঘটনাত। বিহাৰৰ লক্ষীচৰাই জিলাৰ প্ৰসিদ্ধ অশোকধাম মন্দিৰ চৌহদত পুৱাই সংঘটিত হ’ল এই অপ্ৰত্যাশিত পদপিষ্টৰ ঘটনা। শাওণৰ সোমবাৰ উপলক্ষে মন্দিৰ প্ৰাংগণত পুৱাৰ ভাগতেই সমবেত হোৱা অগণন ভক্তৰ ভিৰৰ মাজত পদপিষ্ট হৈ মৃত্যুক সাৱটে কমেও ৭ জন লোকে।

জিলা প্ৰশাসনৰ তথ্য অনুসৰি, পুৱা প্ৰায় ৬:৩০ বজাৰ পৰা ৬:৪৫ বজাৰ ভিতৰত ওচৰৰ ষ্টেচনত দুখনকৈ যাত্ৰীবাহী ৰে’ল উপস্থিত হোৱাৰ পাছতে মন্দিৰ চৌহদত ভক্তৰ সংখ্যা অভাৱনীয়ভাৱে বৃদ্ধি পায়। মানুহৰ প্ৰচণ্ড হেঁচাত মন্দিৰৰ একাষৰ নিৰাপত্তা বেৰিকেড ভাঙি পৰে আৰু ভক্তসকল ইজনৰ গাত সিজন বাগৰি পৰে। স্থানীয় মহকুমা আৰক্ষী বিষয়া শিৱম কুমাৰে প্ৰকাশ কৰে যে দুৰ্ঘটনাৰ সময়ত এটা বিদ্যুতৰ খুঁটা খহি পৰাৰ ফলত বিদ্যুৎস্পৃষ্ট হোৱাৰ আতংকতো এনে হুৰামূৰাৰ সৃষ্টি হয়।

লখীসৰাইৰ জিলা উপায়ুক্ত শৈলেন্দ্ৰ কুমাৰে জানিবলৈ দিয়ে যে ঘটনাস্থলীৰ পৰা আহতসকলক ততাতৈয়াকৈ উদ্ধাৰ কৰি স্থানীয় চিকিৎসালয়লৈ প্ৰেৰণ কৰা হৈছে। এই দুৰ্ভাগ্যজনক ঘটনাত নিহত হোৱা লোকসকলৰ ভিতৰত অধিকাংশই মহিলা বুলি জানিব পৰা গৈছে। চৰকাৰৰ তৰফৰ পৰা শোকসন্তপ্ত পৰিয়াললৈ চাৰি লাখ টকাকৈ এককালীন আৰ্থিক সাহায্য ঘোষণা কৰা হৈছে। বৰ্তমান মন্দিৰ চৌহদত আৰক্ষী আৰু প্ৰশাসনিক বিষয়া মোতায়েন থাকি পৰিস্থিতি নিয়ন্ত্ৰণত ৰাখিছে।