আৰএছএছক ‘বিষাক্ত সাপ’ৰ সৈতে তুলনা! দিছপুৰ আৰু শিলচৰত মল্লিকাৰ্জুন খাৰ্গেৰ বিৰুদ্ধে এজাহাৰ দাখিল

আৰএছএছক ‘বিষাক্ত সাপ’ৰ সৈতে তুলনা কৰি এতিয়া আইনী মেৰপেচত আৱদ্ধ হৈছে কংগ্ৰেছ সভাপতি মল্লিকাৰ্জুন খাৰ্গে। সংগঠনটোৰ বিৰুদ্ধে কৰা বিস্ফোৰক মন্তব্যৰ বাবে খাৰ্গেৰ বিৰুদ্ধে বুধবাৰে দিছপুৰ আৰু শিলচৰ আৰক্ষী থানাত দাখিল কৰিছে দুখনকৈ এজাহাৰ। ১৯৫১ চনৰ লোকপ্ৰতিনিধিত্ব আইনৰ অধীনত কংগ্ৰেছ সভাপতিগৰাকীৰ এই কাৰ্যক এক ‘ভ্ৰষ্ট নিৰ্বাচনী আচৰণ’ বুলি অভিহিত কৰিছে আৰএছএছৰ নেতৃবৰ্গই।

উল্লেখ্য যে, যোৱা ৬ এপ্ৰিলত ৰাজ্যৰ এক নিৰ্বাচনী জনসভাত খাৰ্গেয়ে এই বিতৰ্কিত মন্তব্য আগবঢ়াইছিল। এক ধৰ্মীয় উদাহৰণ দি তেওঁ উল্লেখ কৰে যে প্ৰাৰ্থনাৰ সময়তো যদি কোনো বিষাক্ত সাপ ওলায়, তেন্তে তাক মৰা উচিত। ইয়াৰ পাছতে আৰএছএছ আৰু বিজেপিক তেনে বিষাক্ত সাপৰ সৈতে তুলনা কৰি এই দুই সংগঠনৰ আদৰ্শক নির্মূল কৰাৰ আহ্বান জনায় খাৰ্গেয়ে। আৰএছএছৰ সদস্যসকলৰ মতে খাৰ্গেৰ এই মন্তব্যই সমাজত বিভেদৰ সৃষ্টি কৰাৰ লগতে সামাজিক পৰিৱেশ বিনষ্ট কৰাৰো এক ষড়যন্ত্ৰ।

বিজেপিৰ জ্যেষ্ঠ নেতা ৰবি শংকৰ প্ৰসাদে খাৰ্গেৰ এই স্থিতিৰ বিৰুদ্ধে তীব্ৰ প্ৰতিক্ৰিয়া প্ৰকাশ কৰিছে। আৰএছএছ আৰু বিজেপিৰ দৰে দেশপ্ৰেমী সংগঠনক এনেদৰে তুচ্ছজ্ঞান কৰি খাৰ্গেয়ে ভদ্ৰতাৰ সকলো সীমা অতিক্ৰম কৰা বুলি তেওঁ অভিযোগ কৰে। এই সন্দৰ্ভত বিজেপি নেতাগৰাকীয়ে কংগ্ৰেছ সভাপতিগৰাকীৰ পৰা ৰাজহুৱা ক্ষমাৰো দাবী জনায়। নিৰ্বাচনৰ ঠিক পূৰ্বে হোৱা এই বাকযুদ্ধে এতিয়া অসমৰ ৰাজনৈতিক বতাহ অধিক উত্তপ্ত কৰি তুলিছে।