সম্পূৰ্ণ নতুন ডাষ্টাৰ বাহনৰ গোলকীয় ৰপ্তানি আৰম্ভ কৰিলে ৰেন’ ইণ্ডিয়াই

ফৰাচী গাড়ী নিৰ্মাতা প্ৰতিষ্ঠান ৰেন’ গ্ৰুপ-ৰ সম্পূৰ্ণ মালিকানাধীন সহায়ক প্ৰতিষ্ঠান ৰেন’ ইণ্ডিয়াই সম্পূৰ্ণ নতুন ডাষ্টাৰ বাহনৰ ৰপ্তানি আৰম্ভ কৰিছে। প্ৰথম পৰ্যায়ত চেন্নাইৰ পৰা দক্ষিণ আফ্ৰিকালৈ ৭৫০খন বাহন প্ৰেৰণ কৰা হৈছে। এই ৰপ্তানিয়ে নতুন ডাষ্টাৰৰ বাবে ৰেন’ ইণ্ডিয়াৰ ৰপ্তানি কাৰ্যসূচীৰ শুভাৰম্ভণি ঘটোৱাৰ লগতে অনাগত মাহবোৰত আন কেইবাখনো আন্তঃৰাষ্ট্ৰীয় বজাৰলৈ এই গাড়ী ৰপ্তানি কৰাৰ পৰিকল্পনা কৰা হৈছে। এই গুৰুত্বপূৰ্ণ মাইলৰ খুঁটিয়ে ৰেন’ গ্ৰুপৰ গোলকীয় উৎপাদন আৰু ৰপ্তানি নেটৱৰ্কৰ ভিতৰত ভাৰতৰ ক্ৰমবৰ্ধমান ভূমিকাক প্ৰতিষ্ঠা কৰিছে। ইয়াৰ উপৰিও উৎপাদন, অভিযান্ত্ৰিক আৰু ৰপ্তানিৰ এক প্ৰধান কেন্দ্ৰ হিচাপে ভাৰতৰ স্থিতিক শক্তিশালী কৰিবলৈ কোম্পানীটোৱে গ্ৰহণ কৰা ভৱিষ্যতৰ বাবে প্ৰস্তুত ৰণনীতিকো প্ৰতিফলিত কৰে। ৰেন’ গ্ৰুপ ইণ্ডিয়াৰ মুখ্য কাৰ্যবাহী বিষয়া ষ্টেফান ডেব্লাইছে এই বিশেষ ক্ষণত মন্তব্য কৰি কয় যে, “সম্পূৰ্ণ নতুন ডাষ্টাৰ বাহনৰ ৰপ্তানি ৰেন’ ইণ্ডিয়াৰ বাবে এক অত্যন্ত গুৰুত্বপূৰ্ণ মুহূৰ্ত। চেন্নাইত থকা আমাৰ কাৰখানাৰ উৎপাদন ক্ষমতা, গুণগত মানদণ্ড আৰু প্ৰতিযোগিতামূলক দক্ষতাৰ ই এক শক্তিশালী প্ৰমাণ।

ৰেন’ৰ গোলকীয় উদ্যোগিক পৰিসৰৰ এক অবিচ্ছেদ্য অংগ হিচাপে ভাৰতক গঢ়ি তোলাৰ ক্ষেত্ৰত আমি কৰা অগ্ৰগতিকে ই প্ৰতিফলিত কৰিছে।”   ষ্টেফান ডেব্লাইছে লগতে কয় যে, “এক আগশাৰীৰ অটোম’টিভ ৰপ্তানি কেন্দ্ৰ হিচাপে আত্মপ্ৰকাশ কৰিবলৈ ভাৰতৰ ওচৰত সকলো প্ৰাথমিক ভেটি মজুত আছে: বিশ্বমানৰ উৎপাদন সামৰ্থ্য, অভিযান্ত্ৰিক প্ৰতিভা, বৃহৎ পৰিসৰ আৰু দ্ৰুতগতিত বিকশিত হোৱা লজিষ্টিক ইক’চিষ্টেম। ৰেন’ই যিদৰে নিজৰ আন্তঃৰাষ্ট্ৰীয় পৰিসৰ সম্প্ৰসাৰণ অব্যাহত ৰাখিছে, আমাৰ ভৱিষ্যতৰ পৰিকল্পনাত ভাৰতে ক্ৰমান্বয়ে এক গুৰুত্বপূৰ্ণ কৌশলগত ভূমিকা পালন কৰিব। আমি দেশখনৰ উৎপাদনমুখী লক্ষ্যত অৰিহণা যোগাবলৈ প্ৰতিশ্ৰুতিবদ্ধ আৰু ২০৩০ৰ ভিতৰত ভাৰতৰ পৰা বছৰি ২ বিলিয়ন ইউৰো মূল্যৰ সামগ্ৰী ৰপ্তানি কৰাৰ লক্ষ্যৰে আমি কাম কৰি আছোঁ।”

নতুন ডাষ্টাৰ বাহনখন হৈছে ভাৰতৰ প্ৰথমখন ৰেন’ বাহন, যিখন ৰেন’ গ্ৰুপ মডুলাৰ প্লেটফৰ্ম-ৰ আধাৰত নিৰ্মাণ কৰা হৈছে। ই হৈছে এক নমনীয় গাঁথনি, যাৰ জৰিয়তে একাধিক পাৱাৰট্ৰেইন প্ৰযুক্তি ব্যৱহাৰ কৰিব পাৰি। বাহনখনে নিজৰ সকলো মডেল আৰু পাৱাৰট্ৰেইনৰ বাবে ভাৰত এনচিএপি-ৰ ৫-ষ্টাৰ সুৰক্ষা ৰেটিং লাভ কৰিবলৈ সক্ষম হৈছে, যাৰ ফলত ঘৰুৱা আৰু গোলকীয়— দুয়োখন বজাৰৰে বাবে নিজৰ উপযুক্ততা পুনৰ প্ৰমাণিত হৈছে।