অসম-বংগৰ সম্পৰ্ক অধিক সুদৃঢ় কৰাৰ পোষকতা পশ্চিম বংগৰ নৱনিযুক্ত মন্ত্ৰী আনন্দময় বৰ্মনৰ

ইতিহাস, ভাষা, সংস্কৃতি আৰু পাৰস্পৰিক ভাতৃত্ববোধেৰে গঢ়ি উঠা অসম আৰু পশ্চিম বংগৰ ঐতিহাসিক সম্পৰ্কক আগন্তুক দিনত অধিক শক্তিশালী কৰা হ’ব। সোমবাৰে এই গুৰুত্বপূৰ্ণ মন্তব্য কৰে পশ্চিম বংগৰ নৱনিযুক্ত ৰাজ্যিক মন্ত্ৰী আনন্দময় বৰ্মনে।

শিলচৰস্থিত অসম বিশ্ববিদ্যালয়ৰ প্ৰাক্তন ছাত্ৰ তথা শুভেন্দু অধিকাৰী নেতৃত্বাধীন নতুন চৰকাৰখনৰ মন্ত্ৰী হিচাপে শপত লোৱাৰ পিছতে বৰ্মনে দুই ৰাজ্যৰ গভীৰ সামাজিক আৰু ভাষিক সম্পৰ্কৰ কথা দোহাৰে। সংবাদ মাধ্যমৰ সৈতে হোৱা এক বিশেষ বাৰ্তালাপত তেওঁ কয় যে অসম আৰু বংগৰ মাজত সদায় এক সুমধুৰ সম্পৰ্ক আছিল। ইয়াৰ লগতে এই বান্ধোন সদায় অটুট থাকিব বুলিও তেওঁ আশা প্ৰকাশ কৰে। অসমত বহু বঙালীভাষী লোক থকাৰ বিপৰীতে ৰাজবংশীসহ কেইবাটাও সম্পৰ্কীয় জনগোষ্ঠীৰ অসম তথা উত্তৰ-পূৰ্বাঞ্চলৰ সৈতে ঘনিষ্ঠ যোগাযোগ থকাৰ কথা তেওঁ উল্লেখ কৰে।

শেহতীয়াকৈ দুই ৰাজ্যৰ মাজত বৃদ্ধি পোৱা ৰাজনৈতিক সৌহাৰ্দ্যৰ পটভূমিত নৱনিযুক্ত মন্ত্ৰীগৰাকীৰ এই মন্তব্যই বিশেষ তাৎপৰ্য বহন কৰিছে। উল্লেখ্য যে, পশ্চিম বংগৰ মুখ্যমন্ত্ৰী শুভেন্দু অধিকাৰীৰ শপতগ্ৰহণ অনুষ্ঠানত অসমৰ মুখ্যমন্ত্ৰী ড০ হিমন্ত বিশ্ব শৰ্মা উপস্থিত থকাৰ বিপৰীতে গুৱাহাটীত অনুষ্ঠিত অসম চৰকাৰৰ শপতগ্ৰহণ কাৰ্যসূচীত অধিকাৰীয়েও অংশগ্ৰহণ কৰিছিল। মন্ত্ৰী আনন্দময় বৰ্মনে এনে সদিচ্ছাক চুবুৰীয়া ৰাজ্যৰ মাজত সহযোগিতা আৰু পাৰস্পৰিক বুজাবুজি বৃদ্ধিৰ বাবে এক ইতিবাচক পদক্ষেপ বুলি অভিহিত কৰে।

ইফালে, ২০১৩ বৰ্ষত অসম বিশ্ববিদ্যালয়ৰ শিক্ষা বিভাগৰ পৰা স্নাতকোত্তৰ ডিগ্ৰী লাভ কৰা বৰ্মনৰ এই সফলতাই বিশ্ববিদ্যালয়খনলৈও গৌৰৱ কঢ়িয়াই আনিছে। বিভাগটোৰ সহযোগী অধ্যাপিকা ড০ শ্ৰীপৰ্ণা ভট্টাচাৰ্যই আনন্দময় বৰ্মনক এগৰাকী মূল্যবোধসম্পন্ন আৰু সমাজলৈ দায়বদ্ধ জননেতা হৈ উঠাৰ আশা প্ৰকাশ কৰে। শিক্ষাগুৰুসকলৰ এই মৰম আৰু শুভেচ্ছাৰ প্ৰতি সঁহাৰি জনাই মন্ত্ৰী বৰ্মনে শপতগ্ৰহণৰ পিছতে ব্যক্তিগতভাৱে তেওঁলোকেই সৈতে যোগাযোগ কৰি আশীৰ্বাদ গ্ৰহণ কৰা বুলি জানিবলৈ দিয়ে।