নতুন চৰকাৰ গঠনৰ ক্ষণগণনা, হিমন্ত বিশ্ব শৰ্মাৰ লগতে শপত ল’ব চাৰি জ্যেষ্ঠ নেতা

অসমত নতুন চৰকাৰ গঠনৰ প্ৰক্ৰিয়া ক্ষিপ্ৰতৰ কৰি তুলিছে বিজেপি নেতৃত্বাধীন মিত্ৰজোঁটে। আজি অৰ্থাৎ ১২ মে’ত প্ৰধানমন্ত্ৰী নৰেন্দ্ৰ মোদীৰ উপস্থিতিত অনুষ্ঠিত হ’বলগীয়া ভব্য শপত গ্ৰহণ অনুষ্ঠানত ড° হিমন্ত বিশ্ব শৰ্মাৰ সৈতে আন চাৰিজন জ্যেষ্ঠ নেতাই মন্ত্ৰী হিচাপে শপত গ্ৰহণ কৰিব। সোমবাৰে নিশা মুখ্যমন্ত্ৰী হিচাপে মনোনীত শৰ্মাই এই কথা ঘোষণা কৰে। ৰাজ্যখনৰ উন্নয়নৰ যাত্ৰাক অধিক গতিশীল কৰাৰ লক্ষ্যৰে এই নতুন দলটোৱে কাম কৰিব বুলিও তেওঁ আশাপ্ৰকাশ কৰে।

অসম মন্ত্ৰীপৰিষদত অন্তৰ্ভুক্ত হ’বলগীয়া এই চাৰিজন নেতা হ’ল ক্ৰমে ৰামেশ্বৰ তেলী, অতুল বৰা, চৰণ বড়ো আৰু অজন্তা নেওগ। ইয়াৰ উপৰিও শৰ্মাই ঘোষণা কৰে যে বিজেপি বিধায়ক ৰঞ্জিত দাস হ’ব শাসকীয় মিত্ৰজোঁটৰ বিধানসভাৰ অধ্যক্ষ পদৰ প্ৰাৰ্থী। শপত গ্ৰহণ অনুষ্ঠানৰ পূৰ্বে দিয়া এক বিবৃতিত তেওঁ নৱনিযুক্ত মন্ত্ৰীসকল আৰু অধ্যক্ষৰ প্ৰাৰ্থীগৰাকীক অভিনন্দন তথা শুভেচ্ছা জ্ঞাপন কৰে।

অসমক শক্তিশালী কৰাৰ লগতে ৰাজ্যখনৰ সমৃদ্ধি আৰু বিকাশৰ বাবে এই নতুন দলে একাগ্ৰতাৰে কাম কৰিব বুলিও মন্তব্য কৰে ড° শৰ্মাই। আজিৰ এই ঐতিহাসিক শপত গ্ৰহণ সমাৰোহত প্ৰধানমন্ত্ৰী নৰেন্দ্ৰ মোদীৰ লগতে বিজেপি আৰু এন ডি এৰ কেইবাজনো কেন্দ্ৰীয় নেতা উপস্থিত থাকিব। ইয়াৰ উপৰিও সমগ্ৰ ৰাজ্যৰ পৰা অহা হাজাৰ হাজাৰ দলীয় কৰ্মী আৰু সমৰ্থকেও এই অনুষ্ঠানত অংশগ্ৰহণ কৰিব।