অনুপ্ৰৱেশ ৰোধ, ILP কটকটীয়া কৰিবলৈ অৰুণাচলত চাৰি উচ্চক্ষমতাসম্পন্ন কমিটি গঠন

অৰুণাচল প্ৰদেশৰ মুখ্যমন্ত্ৰী পেমা খাণ্ডুৱে শুকুৰবাৰে ঘোষণা কৰে যে ৰাজ্যত অনুপ্ৰৱেশ ৰোধ, ইনাৰ লাইন পাৰ্মিট (ILP) ব্যৱস্থা অধিক শক্তিশালী কৰা, অৰুণাচল প্ৰদেশ অনুসূচিত জনজাতি (APST) প্ৰমাণপত্ৰ পুনৰ যাচাই আৰু খিলঞ্জীয়া জনগোষ্ঠীৰ অধিকাৰ সুৰক্ষাৰ লক্ষ্যৰে চাৰিখন উচ্চক্ষমতাসম্পন্ন কমিটি গঠন কৰা হৈছে।

খাণ্ডুৰ মতে, কমিটিসমূহত অৰুণাচল ইণ্ডিজেনাছ ট্ৰাইবছ ফ’ৰাম, অল অৰুণাচল প্ৰদেশ ষ্টুডেণ্টছ ইউনিয়ন, অৰুণাচল ST বচাও আন্দোলন কমিটি, আইন বিশেষজ্ঞ, গৱেষক আৰু চৰকাৰী বিষয়াক অন্তৰ্ভুক্ত কৰা হৈছে, যাতে অংশগ্ৰহণমূলক আৰু বহল দৃষ্টিভংগীৰে বিষয়সমূহ সমাধান কৰিব পৰা যায়।

অনুপ্ৰৱেশ আৰু অবৈধ প্ৰব্ৰজন সম্পৰ্কীয় উদ্বেগ সমাধানৰ বাবে পৰিৱেশ আৰু বন মন্ত্ৰী ৱাংকি লোৱাঙৰ নেতৃত্বত এখন কমিটি গঠন কৰা হৈছে। এই কমিটিয়ে ৰাজ্যত অনুপ্ৰৱেশ আৰু প্ৰব্ৰজনৰ পৰিস্থিতি পৰ্যালোচনা কৰি সীমান্ত নিয়ন্ত্ৰণ কটকটীয়া কৰা, বায়’মেট্ৰিক আৰু ডিজিটেল যাচাইকৰণ ব্যৱস্থা প্ৰৱৰ্তন আৰু জাল পৰিচয়পত্ৰ ও অবৈধ বসতিৰ বিৰুদ্ধে ব্যৱস্থা গ্ৰহণৰ পৰামৰ্শ দিব। লগতে অবৈধ প্ৰব্ৰজন ৰোধৰ বাবে আইনী আৰু প্ৰশাসনিক পদক্ষেপো প্ৰস্তাৱ কৰিব।

ILP ব্যৱস্থাক অধিক শক্তিশালী কৰিবলৈ কৃষি আৰু উদ্যানপালন মন্ত্ৰী গেব্ৰিয়েল ডি. ৱাংচুৰ নেতৃত্বত আন এখন কমিটি গঠন কৰা হৈছে। এই কমিটিয়ে বৰ্তমানৰ ILP সম্পৰ্কীয় সমস্যাসমূহ নিৰীক্ষণ আৰু যাচাইকৰণ ব্যৱস্থা পৰ্যালোচনা কৰিব, ২০২৬ চনৰ নিৰ্দেশিকা পৰীক্ষা কৰিব আৰু প্ৰযুক্তিনিৰ্ভৰ নিৰীক্ষণ ও উন্নত যাচাইকৰণ ব্যৱস্থাকে ধৰি বিভিন্ন সংস্কাৰৰ পৰামৰ্শ দিব।

শিক্ষামন্ত্ৰী পাচাং দৰ্জি চনাৰ নেতৃত্বত গঠিত তৃতীয় কমিটিয়ে APST প্ৰমাণপত্ৰ প্ৰদান আৰু যাচাইকৰণ ব্যৱস্থা পৰ্যালোচনা কৰিব। কমিটিয়ে শক্তিশালী যাচাইকৰণ পদ্ধতি, উন্নত সুৰক্ষা ব্যৱস্থা, বায়’মেট্ৰিক যাচাইকৰণৰ বিষয়ে আলোচনা কৰিব। লগতে জাল প্ৰমাণপত্ৰ আৰু ভুৱা জনজাতীয় দাবীৰ বিৰুদ্ধে কঠোৰ ব্যৱস্থা গ্ৰহণৰ পৰামৰ্শ দিব।

আইনমন্ত্ৰী কেনটো জিনিৰ নেতৃত্বত গঠিত চতুৰ্থ কমিটিয়ে APST নহয় এনে ব্যক্তিৰ বংশপৰিচয়ৰ দাবী আৰু খিলঞ্জীয়া অধিকাৰ সুৰক্ষা সম্পৰ্কীয় বিষয়সমূহ পৰীক্ষা কৰিব। এই কমিটিয়ে জনজাতীয় পৰিচয়, উত্তৰাধিকাৰ, ভূমি সুৰক্ষা, বংশপৰিচয় যাচাই আৰু সংৰক্ষণৰ সুবিধা সম্পৰ্কীয় বৰ্তমানৰ ব্যৱস্থাৰ দুৰ্বলতা চিনাক্ত কৰিব আৰু প্ৰয়োজনীয় আইনী ও প্ৰশাসনিক সুৰক্ষা ব্যৱস্থাৰ পৰামৰ্শ দিব। ইয়াৰ উপৰি ভুৱা নথিপত্ৰৰ জৰিয়তে জনজাতীয় অধিকাৰ ভোগৰ অপচেষ্টা ৰোধৰ বাবে পদক্ষেপৰো পৰামৰ্শ দিব।

চৰকাৰী নিৰ্দেশ অনুসৰি, চাৰিওখন কমিটিয়ে বিভিন্ন চৰকাৰী বিভাগ আৰু জিলা প্ৰশাসনৰ পৰা তথ্য আৰু প্ৰতিবেদন সংগ্ৰহ কৰিব পাৰিব আৰু প্ৰথম বৈঠকৰ ছয় মাহৰ ভিতৰত তেওঁলোকৰ পৰামৰ্শ চৰকাৰক দাখিল কৰিব লাগিব।