পশ্চিমবংগত ইতিহাস সৃষ্টি, প্ৰথম বিজেপি মুখ্যমন্ত্রী ৰূপে শুভেন্দু অধিকাৰীৰ জয়যাত্ৰা

পশ্চিমবংগত এক ঐতিহাসিক ৰাজনৈতিক পৰিৱৰ্তনৰ সূচনা কৰি ৰাজ্যখনৰ বিজেপি বিধায়িনী দলৰ নেতা হিচাপে নিৰ্বাচিত হ’ল শুভেন্দু অধিকাৰী। শুকুৰবাৰে কলকাতাত অনুষ্ঠিত দলৰ এক গুৰুত্বপূৰ্ণ বৈঠকত এই সিদ্ধান্ত গ্ৰহণ কৰা হয়। এই নিৰ্বাচনৰ জৰিয়তে শুভেন্দু অধিকাৰীয়ে পশ্চিমবংগৰ প্ৰথমগৰাকী বিজেপি মুখ্যমন্ত্রী হোৱাৰ পথ প্ৰশস্ত কৰে।

বিধায়িনী দলৰ বৈঠকৰ অন্তত শুভেন্দু অধিকাৰীৰ নাম বিধায়িনী দলৰ নেতা হিচাপে ঘোষণা কৰে কেন্দ্ৰীয় গৃহমন্ত্ৰী অমিত শ্বাহে। নতুনকৈ নিৰ্বাচিত বিধায়কসকলৰ উপস্থিতিত অধিকাৰীৰ নাম প্ৰস্তাৱ কৰা হৈছিল। পশ্চিমবংগ বিধানসভা নিৰ্বাচনত বিজেপিৰ অভূতপূৰ্ব বিজয়ৰ পাছতেই দলটোৱে এই নেতৃত্বৰ সিদ্ধান্ত গ্ৰহণ কৰে। এই বিজয়ে ৰাজ্যখনত আঞ্চলিক দলৰ কেইবা দশকজোৰা আধিপত্যৰ অৱসান ঘটায়।

বিজেপিৰ নিৰ্বাচনী প্ৰচাৰ আৰু সাংগঠনিক কৌশল নিৰ্মাণত শুভেন্দু অধিকাৰীয়ে পালন কৰিছিল গুৰুত্বপূৰ্ণ ভূমিকা। পূব ভাৰতত বিজেপিৰ বাবে এয়া এক বিশেষ ৰাজনৈতিক মুহূৰ্ত হিচাপে চিহ্নিত হৈছে। দলীয় নেতৃত্বৰ এই ঘোষণাক আদৰণি জনাই সমৰ্থকসকলে কলকাতাৰ পদপথত শ্লোগান দি উৎসৱমুখৰ পৰিৱেশৰ সৃষ্টি কৰে।

উল্লেখ্য যে, আজি কলকাতাৰ ঐতিহাসিক ব্ৰিগেড পেৰেড গ্ৰাউণ্ডত অনুষ্ঠিত হ’ব নতুন চৰকাৰৰ শপত গ্ৰহণ অনুষ্ঠান। এই অনুষ্ঠানত প্ৰধানমন্ত্ৰী নৰেন্দ্ৰ মোদীৰ লগতে কেন্দ্ৰীয় নেতৃত্ব আৰু বিজেপি শাসিত ৰাজ্যৰ মুখ্যমন্ত্ৰীসকলে অংশগ্ৰহণ কৰাৰ সম্ভাৱনা আছে।