শীঘ্ৰে টি-২০ দলৰ সঞ্জু চেমছন হ’ব নতুন অধিনায়ক

টি-২০ ফৰ্মেটত সূৰ্যকুমাৰ যাদৱৰ ঠাইত নতুন অধিনায়কৰ কথা চিন্তা কৰিছে বিচিচিআইয়ে। শেহতীয়াকৈ প্ৰকাশিত এক প্ৰতিবেদনত দাবী কৰা হৈছে যে সঞ্জু চেমছনক নতুন টি-২০ অধিনায়ক হিচাপে নিযুক্তি দিয়া হ’ব পাৰে। ইয়াৰ পূৰ্বে বাতৰি প্ৰকাশ পাইছিল যে বিচিচিআইয়ে শ্ৰেয়াছ আয়াৰক নতুন অধিনায়কৰূপে নিযুক্তি দিব পাৰে। শ্ৰেয়াছ আয়াৰে কেকেআৰক চেম্পিয়নশ্বিপৰ খিতাপ দখল কৰিছিল আৰু দিল্লী আৰু পঞ্জাব দুয়োখনকে ফাইনেললৈ লৈ গৈছিল। উল্লেখ্য যে ২০২৪ চনৰ টি-২০ বিশ্বকাপৰ পাছত ৰোহিত শৰ্মাই খেলৰ চুটি ফৰ্মেটৰ পৰা অৱসৰ গ্ৰহণ কৰে। ইয়াৰ পিছতে বিচিচিআইয়ে সূৰ্য্যকুমাৰ যাদৱক অধিনায়ক হিচাপে নিযুক্তি দিয়ে; তাৰ পিছত তেওঁ টি-২০ আন্তঃৰাষ্ট্ৰীয় ক্ৰিকেটত ভাৰতৰ সফল অধিনায়ক হিচাপে আত্মপ্ৰকাশ কৰে। ৫০খনতকৈও অধিক মেচত টিম ইণ্ডিয়াৰ নেতৃত্ব দিয়া সকলো অধিনায়কৰ ভিতৰত (ধোনী, ৰোহিত, আৰু কোহলী) সূৰ্য্যৰ জয়ৰ শতাংশ সৰ্বাধিক।

তেওঁৰ অধিনায়কত্বত ভাৰতে এইবাৰ টি-২০ বিশ্বকাপতো জয়লাভ কৰে; কিন্তু ভৱিষ্যতৰ প্ৰতি দৃষ্টি ৰাখি ব’ৰ্ডে নতুন অধিনায়কৰ নাম অতি সোনকালে ঘোষণা কৰিব পাৰে। ভাৰতীয় ক্ৰিকেট দলৰ পৰৱৰ্তী টি-২০ শৃংখলা জুন মাহত অনুষ্ঠিত হ’ব। আয়াৰলেণ্ড ভ্ৰমণৰ সময়ত টিম ইণ্ডিয়াই দুখন মেচৰ টি-২০ শৃংখলা খেলিব, তাৰ পিছত ইংলেণ্ডৰ বিৰুদ্ধে পাঁচখন খেলৰ টি-২০ শৃংখলা খেলিব। খবৰ অনুসৰি আয়াৰলেণ্ড ভ্ৰমণৰ বাবে সূৰ্য্য অধিনায়ক হৈ থকাৰ সম্ভাৱনা আছে যদিও তাৰ পিছত তেওঁক অধিনায়কৰ পদৰ পৰা আঁতৰাই দিয়া হ’ব পাৰে। যদিও ২০২৬ চনৰ টি-২০ বিশ্বকাপৰ সময়ত সঞ্জু চেমছনে প্ৰতিখন মেচ খেলা নাছিল, তথাপিও তেওঁক প্ৰতিযোগিতাখনৰ শ্ৰেষ্ঠ খেলুৱৈ হিচাপে নিৰ্বাচিত কৰা হৈছিল। ৫ ইনিংছত ৩২১ ৰান সংগ্ৰহ কৰি টিম ইণ্ডিয়াৰ হৈ তেওঁ আছিল অগ্ৰণী ৰান সংগ্ৰহকাৰী।

ফাইনেলত সঞ্জুৱেও ৮৯ ৰানৰ সুন্দৰ ইনিংছ খেলিছিল। তদুপৰি ২০২৪ চনত চেম্পিয়নশ্বিপ লাভ কৰা দলটোৰ এটা গুৰুত্বপূৰ্ণ অংশ আছিল সঞ্জু। সঞ্জুৱে আই পি এলত কেইবাবছৰ ধৰি ৰাজস্থান ৰয়েলছৰ অধিনায়কত্ব কৰিছিল, তাৰ পিছত চি এছ কেয়ে তেওঁক ট্ৰেড যোগে অধিগ্ৰহণ কৰিছিল। তেওঁৰ প্ৰমাণিত নেতৃত্বৰ দক্ষতাৰ প্ৰতি লক্ষ্য ৰাখি বৰ্তমান বিচিচিআইয়ে তেওঁক নতুন অধিনায়কৰ ভূমিকাৰ সম্ভাৱ্য প্ৰাৰ্থী হিচাপে বিবেচনা কৰি আছে। তেওঁ উইকেটকীপাৰৰ দৰেও খেলে – যিটো পজিচনে খেলখন ফলপ্ৰসূভাৱে পৰিচালনা কৰাৰ বাবে কৌশলগত সুবিধা প্ৰদান কৰে।