চাঞ্চল্যকৰ! নিজ বাসগৃহৰ সন্মুখত আক্ৰমণৰ চেষ্টা মমতা বেনাৰ্জীক, মহিলাক গ্ৰেপ্তাৰ

দুৰ্গা পূজাৰ উছাহ-উদ্দীপনাৰ মাজতে খোদ নিজৰ বাসগৃহৰ সন্মুখতে আক্ৰমণৰ সন্মুখীন হ’ল তৃণমূল কংগ্ৰেছৰ সৰ্বোচ্চ নেত্ৰী মমতা বেনাৰ্জী। বুধবাৰে বিয়লি কালীঘাটৰ নিজা বাসভৱনৰ পৰা ওলাই এটা পূজা মণ্ডপ উদ্বোধন কৰিবলৈ যোৱাৰ সময়তে এই অপ্ৰত্যাশিত ঘটনা ঘটে। দলীয় নেত্ৰীগৰাকীৰ ওপৰত হোৱা এনে নিৰাপত্তাহীন কাণ্ডৰ পিছতে তীব্ৰ আলোড়নৰ সৃষ্টি হৈছে সমগ্ৰ ৰাজনৈতিক মহলত।

টিএমচি নেতৃত্বই প্ৰকাশ কৰা অনুসৰি, সমীপৰ এক দুৰ্গা পূজা মণ্ডপ উদ্বোধনৰ বাবে ওলাই আহিছিল মমতা বেনাৰ্জী। ঠিক সেই মুহূৰ্ততে এগৰাকী মহিলাই বাধা প্ৰদান কৰি হঠাতে নেত্ৰীগৰাকীৰ শাৰীত থাপ মাৰি ধৰে। আক্ৰমণকাৰী মহিলাগৰাকীৰ হাতত এখন গোপন ছুৰী আছিল বুলিও দাবী কৰিছে দলীয় নেতৃত্বই। ঘটনাস্থলীত থকা নিৰাপত্তাৰক্ষী আৰু স্থানীয় আৰক্ষীয়ে তৎপৰতা দেখুৱাই লগে লগে কৰায়ত্ত কৰে মহিলাগৰাকীক।

ইফালে, জ্যেষ্ঠ নেত্ৰীগৰাকীৰ এনে গুৰুতৰ নিৰাপত্তা ভংগৰ ঘটনাক লৈ স্থানীয় আৰক্ষী থানাত এক এজাহাৰ দাখিল কৰে তৃণমূলৰ সাংসদ ডোলা সেনে। দাখিল কৰা অভিযোগ অনুসৰি, আক্ৰমণকাৰী মহিলাগৰাকীয়ে মদ্যপান কৰি আছিল আৰু অশ্লীল গালি-গালাজ পাৰি নেত্ৰীগৰাকীক লক্ষ্য কৰি জঁপিয়াই পৰিছিল। ঘটনাৰ পিছতে আটক কৰি মহিলাগৰাকীক জেৰা অব্যাহত ৰাখিছে আৰক্ষীয়ে। মহিলাগৰাকীৰ প্ৰকৃত উদ্দেশ্য কি আছিল আৰু তেওঁৰ হাতত কোনো মাৰণাস্ত্ৰ আছিল নেকি, সেই দিশৰ ওপৰত তদন্ত চলাইছে প্ৰশাসনে।

দুৰ্গা পূজাৰ সময়ত এনেধৰণৰ নিৰাপত্তাৰ গাফিলতিয়ে তৃণমূল কংগ্ৰেছৰ মাজত তীব্ৰ অসন্তুষ্টিৰ সৃষ্টি কৰিছে। সম্প্ৰতি কলকাতাত শীৰ্ষ ৰাজনৈতিক ব্যক্তিত্বসকলৰ বাসগৃহ আৰু পূজা অঞ্চলসমূহত নিৰাপত্তা ব্যৱস্থা অধিক কটকটীয়া কৰি তুলিছে মহানগৰ আৰক্ষীয়ে।