ফিট ইণ্ডিয়া অভিযানৰ প্ৰসাৰৰ বাবে সেনা আৰু SAI-ৰ যৌথ চাইকেল সমদল

শাৰীৰিক সুস্থতাৰ সজাগতা আৰু অসামৰিক-সামৰিক সহযোগিতাৰ এক উৎসাহজনক নিদৰ্শন দাঙি ধৰি ভাৰতীয় সেনাই স্পৰ্টছ অথৰিটি অৱ ইণ্ডিয়া (SAI) ৰ সৈতে মিলি দেওবাৰে তিনিচুকীয়াত আয়োজিত ‘দেওবাৰে চাইকেলত’ (Sunday on Cycle) সমদলত অংশগ্ৰহণ কৰে। দেশজোৰা ‘ফিট ইণ্ডিয়া’ আন্দোলনৰ পদক্ষেপৰ অধীনত এই সমদলৰ আয়োজন কৰা হৈছিল।
পুৱা ৬.৩০ বজাত ফ্লেগ অফ কৰা এই চাইকেল সমদলত সেনা জোৱান, SAI-ৰ প্ৰশিক্ষাৰ্থী, ক্ৰীড়াপ্ৰেমী আৰু স্থানীয় ৰাইজৰ অংশগ্ৰহণ পৰিলক্ষিত হয়। এই অনুষ্ঠানত ভাৰতীয় সেনাৰ সক্ৰিয় অংশগ্ৰহণে পৰম্পৰাগত ভূমিকাৰ ঊৰ্ধ্বত গৈ সামূহিক নিয়োজিতকৰণ আৰু ৰাষ্ট্ৰ গঠনৰ কাৰ্যসূচীৰ প্ৰতি তেওঁলোকৰ নিৰন্তৰ প্ৰতিশ্ৰুতি প্ৰতিফলিত কৰে। সেনা জোৱানসকলে যুৱক-যুৱতী আৰু প্ৰশিক্ষাৰ্থীসকলৰ সৈতে চাইকেল চলাই অনুশাসন, সুস্থতা আৰু পাৰিপাৰ্শ্বিক দায়িত্ববোধৰ বাৰ্তাৰে অংশগ্ৰহণকাৰীসকলক অনুপ্ৰাণিত কৰে।
ভাৰতীয় সেনা আৰু স্পৰ্টছ অথৰিটি অৱ ইণ্ডিয়াৰ সমন্বয়ত আয়োজিত এই সমদলৰ লক্ষ্য আছিল ক্ৰীড়া আৰু সুস্থতাৰ জৰিয়তে সশস্ত্ৰ বাহিনী আৰু সাধাৰণ নাগৰিকৰ মাজত সম্পৰ্ক সুদৃঢ় কৰা।
অংশগ্ৰহণকাৰীসকলে এই পদক্ষেপৰ শলাগ লয় আৰু বৰ্তমানৰ ক্ষিপ্ৰ জীৱনশৈলীত পৰিৱেশ অনুকূল তথা স্বাস্থ্যসন্মত অভ্যাস হিচাপে চাইকেল চলোৱাৰ বৰ্ধিত গুৰুত্বৰ ওপৰত জোৰ দিয়ে। নিয়মিত স্বাস্থ্যসন্মত দিনচৰ্যা গ্ৰহণ কৰি এক স্বাস্থ্যৱান আৰু সেউজ ৰাষ্ট্ৰ গঠনত অৰিহণা যোগাবলৈ নাগৰিকসকলক জনোৱা এক সামূহিক আহ্বানৰ সৈতে কাৰ্যসূচীটোৰ সামৰণি পৰে।