উৎপাদন খণ্ডৰ কৰ্মক্ষেত্ৰত এলজিবিটিকিউআইএ+ অন্তৰ্ভুক্তিক প্ৰসাৰিত কৰিবলৈ টুলকিট মুকলি গড্ৰেজৰ

গড্ৰেজ কনজিউমাৰ প্ৰডাক্টছ লিমিটেড(জিচিপিএল)-এ ভাৰতৰ উৎপাদন খণ্ডত এলজিবিটিকিউআইএ+ৰ অন্তৰ্ভুক্তিক প্ৰসাৰিত কৰাৰ উদ্দেশ্যে প্ৰাইড ইন মেনুফেকচাৰিং নামৰ এক অভিনৱ আৰু প্ৰথমবাৰৰ বাবে প্ৰস্তুত কৰা টুলকিট মুকলি কৰিছে। সাধাৰণতে এই খণ্ডটোত কৰ্মক্ষেত্ৰৰ বৈচিত্ৰ্যতাক লৈ চৰ্চা যথেষ্ট সীমিত হৈ থাকে।
এই টুলকিট জিপিচিএলৰ জ্যেষ্ঠ নেতৃত্বই মুম্বাইস্থিত মুখ্য কাৰ্যালয় আৰু তামিলনাডুত থকা উৎপাদন কেন্দ্ৰত একেলগে উন্মোচন কৰে। ট্ৰান্সফৰ্মিছ নামৰ এক ইনক্লুজন এণ্ড ডাইভাৰ্ছিটি কনচাল্টিং প্ৰতিষ্ঠান আৰু অশোকা বিশ্ববিদ্যালয়ৰ ছাত্ৰী অন্তৰা ৰয় চৌধুৰীৰ সহযোগত এই টুলকিটটো প্ৰস্তুত কৰা হৈছে। ইয়াৰ উদ্দেশ্য হৈছে সংস্থাসমূহক এলজিবিটিকিউআইএ+ কৰ্মচাৰীসকলৰ বাবে অধিক সুৰক্ষিত, সমতাপূৰ্ণ আৰু অন্তৰ্ভুক্তিমূলক কৰ্মক্ষেত্ৰ গঢ়ি তোলাত সহায় কৰা।
জিচিপিএলৰ মতে, ভাৰতত প্ৰায় ৪৫.৪ মিলিয়ন লোকে নিজক এলজিবিটিকিউএ+ হিচাপে চিনাক্ত কৰে, তথাপিও কৰ্মক্ষেত্ৰত অন্তৰ্ভুক্তি এক প্ৰত্যাহ্বান হৈয়েই আছে। ইয়াৰে ৩৪ শতাংশ লোকে কৰ্মক্ষেত্ৰত নিজৰ পৰিচয় মুকলিকৈ প্ৰকাশ কৰাৰ ক্ষেত্ৰত ব্যক্তিগত সুৰক্ষাৰ চিন্তাক এক অন্তৰায় বা বাধা হিচাপে উল্লেখ কৰিছে। এই টুলকিটত আইনী নিৰ্দেশনা, উদ্যোগৰ অন্তৰ্দৃষ্টি, কৰ্মক্ষেত্ৰৰ নিয়ম-নীতি আৰু বাস্তৱ জীৱনৰ বিভিন্ন দৃশ্যপটৰ সংমিশ্ৰণ ঘটোৱা হৈছে, যাতে ই নেতা, পৰিচালক আৰু কৰ্মচাৰীসকলক মৰ্যাদা, সন্মান আৰু আপোনত্বৰ সংস্কৃতি গঢ়ি তোলাত সহায় কৰিব পাৰে।
জিচিপিএলৰ এমডি তথা চিইঅ’ সুধীৰ সীতাপতীয়ে এই বিষয়ে সদৰি কৰি কয় যে, অন্তৰ্ভুক্তি কেৱল এক কাৰ্যসূচী নহয়, বৰঞ্চ ই হৈছে মৰ্যাদা, সন্মান আৰু সমান অধিকাৰৰ ওপৰত প্ৰতিষ্ঠিত এক বিশ্বাস ব্যৱস্থা। আনহাতে জিচিপিএলৰ গ্লবেল হেড-এইচআৰ বৈভৱ ৰামে কয় যে, কোম্পানীটোৰ চেংগলপট্টু প্ৰকল্পত বৰ্তমান ৩ শতাংশ এলজিবিটিকিউআইএ+ প্ৰতিনিধিত্ব আছে আৰু এইসকলে নিজৰ অন্তৰ্ভুক্তিমূলক প্ৰচেষ্টা অধিক শক্তিশালী কৰি ৰাখিছে।
গুৱাহাটী মহানগৰীত এই পদক্ষেপে মহানগৰীৰ কৰ্পৰেট কাৰ্যালয়সমূহৰ সীমা পাৰ হৈ ভাৰতীয় প্ৰতিষ্ঠানসমূহৰ মাজত কৰ্মক্ষেত্ৰৰ বৈচিত্ৰ্যৰ প্ৰতি ক্ৰমবৰ্ধমান মনোযোগক প্ৰতিফলিত কৰিছে। উত্তৰ-পূৰ্বাঞ্চলত উৎপাদন আৰু ঔদ্যোগিক কাৰ্যকলাপ সম্প্ৰসাৰিত হোৱাৰ সমান্তৰালভাৱে বিশেষজ্ঞসকলে বিশ্বাস কৰে যে এনে অন্তৰ্ভুক্তিমূলক কৰ্মচাৰী নীতিয়ে কোম্পানীসমূহক এক বৃহৎ প্ৰতিভাৰ ভাণ্ডাৰ আকৰ্ষণ কৰা, কৰ্মচাৰী ধৰি ৰখা আৰু ক্ৰমবিকাশমান সামাজিক তথা কৰ্পৰেট প্ৰশাসন মানদণ্ডৰ সৈতে সংগতি ৰখাত সহায় কৰিব পাৰে। এই টুলকিটে অঞ্চলটোৰ উৎপাদকসকলক অধিক সুসংগঠিত বৈচিত্ৰ্য আৰু অন্তৰ্ভুক্তিৰ নীতি গ্ৰহণ কৰিবলৈও উৎসাহিত কৰিব পাৰে।
এই টুলকিট মুকলি কাৰ্যসূচী জিচিপিএল-ৰ এক ব্যাপক বৈচিত্ৰ্য, সমতা আৰু অন্তৰ্ভুক্তি (ডিইআই) কৌশলৰ অংশ, যাৰ উদ্দেশ্য হৈছে এনে এক কৰ্মক্ষেত্ৰৰ সংস্কৃতি গঢ়ি তোলা য’ত প্ৰতিগৰাকী ব্যক্তিয়ে অংশগ্ৰহণ কৰিব, অৱদান আগবঢ়াব আৰু আগবাঢ়ি যাব পাৰে।