আজিৰে পৰা নতুন শাসনকালঃ প্ৰধানমন্ত্ৰী হিচাপে শপত গ্ৰহণ কৰিব তাৰিক ৰহমানে

বাংলাদেশৰ অস্থিৰ ৰাজনৈতিক প্ৰেক্ষাপটত এক ঐতিহাসিক পৰিৱৰ্তনৰ সূচনা কৰি আজি প্ৰধানমন্ত্ৰী হিচাপে শপত গ্ৰহণ কৰিব তাৰিক ৰহমানে। ২০২৪ চনত শ্বেখ হাছিনাৰ চৰকাৰৰ পতনৰ পাছত এয়া দেশখনৰ ক্ষমতা হস্তান্তৰৰ আটাইতকৈ গুৰুত্বপূৰ্ণ মুহূৰ্ত হিচাপে বিবেচিত হৈছে। শেহতীয়া সাধাৰণ নিৰ্বাচনত বাংলাদেশ নেশ্যনেলিষ্ট পাৰ্টিয়ে লাভ কৰা বিপুল বিজয়ৰ পাছত ৰহমানৰ নেতৃত্বত নতুন চৰকাৰে কাৰ্যভাৰ গ্ৰহণ কৰিবলৈ সাজু হৈছে।

প্ৰাক্তন প্ৰধানমন্ত্ৰী খালেদা জিয়াৰ পুত্ৰ তাৰিক ৰহমানে প্ৰায় ১৭ বছৰীয়া নিৰ্বাসনৰ অন্তত দেশলৈ ঘূৰি আহি বিএনপিৰ নিৰ্বাচনী প্ৰচাৰৰ নেতৃত্ব দিছিল। আজি পুৱা ৯:৩০ বজাত জাতীয় সংসদ ভৱনত নৱনিৰ্বাচিত সাংসদসকলে শপত গ্ৰহণ কৰাৰ পাছত আবেলি ৪ বজাত মন্ত্ৰী পৰিষদৰ শপত গ্ৰহণ অনুষ্ঠান অনুষ্ঠিত হ’ব। এই অনুষ্ঠানত কেইবাজনো বিদেশী বিশিষ্ট অতিথি উপস্থিত থাকিব যদিও ভাৰত বা পাকিস্তানৰ প্ৰধানমন্ত্ৰী উপস্থিত নাথাকে বুলি দলীয় সূত্ৰই নিশ্চিত কৰিছে।

প্ৰধানমন্ত্ৰী নৰেন্দ্ৰ মোদীৰ পৰিৱৰ্তে ভাৰতক প্ৰতিনিধিত্ব কৰিব লোকসভাৰ অধ্যক্ষ ওম বিৰলাই। বৈদেশিক পৰিক্ৰমা মন্ত্ৰালয়ে জনোৱা মতে, বিৰলাৰ অংশগ্ৰহণে ভাৰত আৰু বাংলাদেশৰ মাজৰ গভীৰ বন্ধুত্ব আৰু গণতান্ত্ৰিক মূল্যবোধৰ প্ৰতি নতুন দিল্লীৰ প্ৰতিশ্ৰুতিক পুনৰ দৃঢ় কৰি তুলিব। অৱশ্যে নতুন চৰকাৰে শপত ল’বলৈ সাজু হ’লেও দেশখনৰ সংবিধান সংশোধন প্ৰক্ৰিয়াক লৈ এতিয়াও কিছু অনিশ্চয়তাই বিৰাজ কৰিছে।

‘প্ৰথম আলো’ৰ বাতৰি অনুসৰি, জুলাই মাহৰ ৰাষ্ট্ৰীয় চনদত উল্লেখ কৰা প্ৰস্তাৱসমূহ ৰূপায়ণৰ বাবে সাংসদসকলে পুনৰ শপত ল’ব লাগিব নেকি, সেই লৈ প্ৰশ্ন উত্থাপন হৈছে। অস্পষ্ট ৰাজনীতিৰ মাজত তাৰিক ৰহমানৰ চৰকাৰে সংস্কাৰৰ প্ৰতিশ্ৰুতি আৰু শাসনৰ সুস্থিৰতা কেনেদৰে বজায় ৰাখে, তাৰ ওপৰতে এতিয়া সকলোৰে চকু নিৱদ্ধ হৈছে। এই ক্ষমতা হস্তান্তৰে বাংলাদেশৰ ভৱিষ্যতৰ ৰাজনৈতিক দিশ নিৰ্ণয়ত এক নিৰ্ণায়ক ভূমিকা ল’ব বুলি ধাৰণা কৰা হৈছে।