কঠোৰভাৱে পৌৰ গোটা আৱৰ্জনা ব্যৱস্থাপনা বিধি, ২০২৬ ৰূপায়ণৰ বাবে অসমত বহুমুখী সংস্থাৰ ব্যাপক কৌশল আৰম্ভ

অসমত পৌৰ গোটা আৱৰ্জনা ব্যৱস্থাপনা বিধি, ২০২৬ কাৰ্যকৰী কৰাৰ বাবে এক ব্যাপক বহুমুখী সংস্থাৰ কৌশল আৰম্ভ কৰা হৈছে। আজি গুৱাহাটীত অসম প্ৰদূষণ নিয়ন্ত্ৰণ পৰিষদ, স্বচ্ছ ভাৰত অভিযান (নগৰীয়া) আৰু স্বচ্ছ ভাৰত অভিযান (গ্ৰামীণ), অসমৰ এক যুটীয়া সংবাদমেলত এই কথা প্ৰকাশ কৰা হয়। কেন্দ্ৰীয় পৰিৱেশ, বন আৰু জলবায়ু পৰিৱৰ্তন মন্ত্ৰালয়ে পৰিৱেশ (সুৰক্ষা) আইন, ১৯৮৬-ৰ অধীনত পৌৰ গোটা আৱৰ্জনা ব্যৱস্থাপনা (SWM) বিধি, ২০২৬ অধিসূচিত কৰাৰ পিছত এই নতুন কৌশল গ্ৰহণ কৰা হৈছে, যি ২০২৬ চনৰ ১ এপ্ৰিলৰ পৰা কাৰ্যকৰী হৈছে।

স্বচ্ছ ভাৰত অভিযান (নগৰীয়া)ৰ মিছন সঞ্চালক সব্যসাচী কাশ্যপে অসমৰ নগৰীয়া কেন্দ্ৰসমূহত গ্ৰহণ কৰা নিৰ্দিষ্ট পদক্ষেপসমূহৰ সবিশেষ দাঙি ধৰে। তেওঁ হ্ৰাস (Reduce), পুনৰ ব্যৱহাৰ (Reuse) আৰু পুনৰ চক্ৰীকৰণ (Recycle)-ৰ নীতিৰ ওপৰত আধাৰিত এক বৃত্তাকাৰ অৰ্থনীতিৰ প্ৰসাৰৰ ওপৰত গুৰুত্ব আৰোপ কৰে। ইয়াৰ লগতে আৱৰ্জনাৰ পৰা স্বচ্ছ শক্তি উৎপাদনৰ বাবে অইল ইণ্ডিয়া লিমিটেডৰ সৈতে ৰাজহুৱা-ব্যক্তিগত অংশীদাৰিত্বৰ জৰিয়তে অসমৰ ৫খন মুখ্য চহৰত কম্প্ৰেছড বায়’-গেছ প্লাণ্ট স্থাপনৰ কথাও তেওঁ উল্লেখ কৰে। উচ্চতম ন্যায়ালয়ৰ নিৰ্দেশনা অনুসৰি সকলো ৯৬খন পৌৰ নিকায়ত আন্তঃগাঁথনি অডিট কৰা হৈছে আৰু নগৰ তথা গাঁও পৰিকল্পনা কৰ্তৃপক্ষই নতুন নিৰ্মাণৰ অনুমতিৰ ক্ষেত্ৰত আৱৰ্জনা ব্যৱস্থাপনাৰ নিৰ্দিষ্ট ব্যৱস্থা আৰু কম্পোজিট পিট বাধ্যতামূলক কৰিছে।

কাশ্যপে লগতে জনায় যে ৫৯খন পৌৰ নিকায়ত পুৰণি আৱৰ্জনাৰ স্থানসমূহ চিনাক্ত কৰা হৈছে, ৬৫১টা আৱৰ্জনা প্ৰৱণ স্থানৰ ভিতৰত ৫৬১টা স্থানৰ ৰূপান্তৰ কৰা হৈছে আৰু ১৯৮টা পৰ্যটন তথা তীৰ্থস্থানত বিশেষ পৰিষ্কাৰ-পৰিচ্ছন্নতাৰ ব্যৱস্থা কৰা হৈছে। ‘স্বচ্ছতম’ ডিজিটেল প্লেটফৰ্মৰ জৰিয়তে নাগৰিকৰ অভিযোগসমূহ সক্ৰিয়ভাৱে সমাধান কৰা হৈছে বুলিও তেওঁ জানিবলৈ দিয়ে।

নগৰীয়া কৌশলৰ সমান্তৰালভাৱে স্বচ্ছ ভাৰত অভিযান (গ্ৰামীণ)ৰ জ্যেষ্ঠ বিষয়াসকলে গ্ৰাম্য অঞ্চলৰ বাবে প্ৰস্তুত কৰা কাৰ্যকৰী পৰিকাঠামোৰ ওপৰত আলোকপাত কৰে। তেওঁলোকে গাঁওসমূহত স্থাপন কৰা সামূহিক কম্পোষ্ট পিটৰ জৰিয়তে পচনশীল আৰু অপচনশীল আৱৰ্জনাৰ বিকেন্দ্ৰীকৃত সংসাধনৰ পৰিকল্পনা দাঙি ধৰে। তৃণমূল পৰ্যায়ত এই ব্যৱস্থা সুদৃঢ় কৰিবলৈ অহা ২ অক্টোবৰত প্ৰতিখন গাঁৱত এক আনুষ্ঠানিক ‘গাঁও পঞ্চায়ত নিৰ্দেশ’ জাৰি কৰা হ’ব। তদুপৰি, গ্ৰাম্য অঞ্চলত ঘৰে ঘৰে আৱৰ্জনা সংগ্ৰহৰ স্বচ্ছতা নিশ্চিত কৰিবলৈ বাহনসমূহৰ বাবে ডিজিটেল ট্ৰেকিং ব্যৱস্থা মোতায়েন কৰা হৈছে।

অসম প্ৰদূষণ নিয়ন্ত্ৰণ পৰিষদৰ অধ্যক্ষ ড° অৰূপ কুমাৰ মিশ্ৰই কয় যে আৱৰ্জনা ব্যৱস্থাপনা এতিয়া কেৱল প্ৰদূষণ নিয়ন্ত্ৰণ পৰিষদৰ দায়িত্ব নহয়, বৰঞ্চ ই সকলো স্থানীয় সংস্থা, প্ৰতিষ্ঠান আৰু নাগৰিকৰ এক সামূহিক কৰ্তব্য। তেওঁ বুজাই দিয়ে যে ২০২৬ চনৰ এই নতুন পৰিকাঠামোত লেণ্ডফিল (আৱৰ্জনা পোতা স্থান) পৰিহাৰ কৰা আৰু জৈৱিক পচনশীল আৱৰ্জনাৰ সঠিক ব্যৱহাৰৰ ওপৰত কঠোৰ গুৰুত্ব দিয়া হৈছে।

ড° মিশ্ৰই উৎসতে আৱৰ্জনা পৃথকীকৰণৰ (Four-stream waste segregation) প্ৰয়োজনীয়তাৰ ওপৰত গুৰুত্ব আৰোপ কৰে। ইয়াৰ অধীনত প্ৰতিটো পৰিয়াল আৰু প্ৰতিষ্ঠানে তিতা পচনশীল আৱৰ্জনা, শুকান পুনৰ ব্যৱহাৰযোগ্য আৱৰ্জনা, চেনিটেৰী আৱৰ্জনা আৰু বিশেষ যত্ন ল’বলগীয়া আৱৰ্জনা (যেনে— CFL বাল্ব, ম্যাদ উকলি যোৱা ঔষধ, বেটাৰী, চিৰিঞ্জ আদি) পৃথক পাত্ৰত জমা কৰি কৰ্তৃত্বপ্ৰাপ্ত সংগ্ৰাহকক হস্তান্তৰ কৰিব লাগিব।