এছিয়ান গেমছৰ বক্সিঙত লাভলীনা বৰগোঁহাইৰ পদক নিশ্চিত; দক্ষিণ কোৰিয়াৰ প্ৰতিদ্বন্দ্বীক পৰাস্ত কৰি ছেমিফাইনেলত অসম কন্যা

এচিয়ান গেমছৰ ৰিঙত পুনৰ উজ্বলি উঠিল অসম কন্যা তথা অলিম্পিক পদক বিজয়ী তাৰকা বক্সাৰ লাভলীনা বৰগোহাঁই। জাপানী চহৰ নিচিঅ’ত চলি থকা এছিয়ান গেমছৰ মহিলা বক্সিং প্ৰতিযোগিতাত দক্ষিণ কোৰিয়াৰ ছিয়ং চুয়নক একপক্ষীয়ভাৱে পৰাস্ত কৰি একেৰাহে দ্বিতীয়বাৰৰ বাবে পদক নিশ্চিত কৰে লাভলীনাই। সোমবাৰে অনুষ্ঠিত ৭৫ কেজি ওজন শাখাৰ কোৱাৰ্টাৰ ফাইনেলৰ খেলখনত ভাৰতীয় তাৰকাগৰাকীয়ে ৫-০ ব্যৱধানত সহজ বিজয় সাব্যস্ত কৰি ছেমিফাইনেলত প্ৰৱেশ কৰে।

প্ৰতিযোগিতাখনৰ প্ৰথমখন ৰাউণ্ডতে সম্পূৰ্ণ আধিপত্য বিস্তাৰ কৰি খেলিছিল অসমৰ এই অভিজ্ঞ বক্সাৰগৰাকীয়ে। কোৱাৰ্টাৰ ফাইনেলত দেখুওৱা এই আক্ৰমণাত্মক প্ৰদৰ্শনৰ জৰিয়তে তেওঁ কমেও এটা ব্ৰঞ্জৰ পদক নিজৰ নামত সুনিশ্চিত কৰে।

উল্লেখ্য যে ইয়াৰ পূৰ্বৰ সংস্কৰণতো ৰূপৰ পদক অৰ্জন কৰি দেশলৈ গৌৰৱ কঢ়িয়াই আনিছিল অসমৰ খেলুৱৈগৰাকীয়ে। চলিত সংস্কৰণত দেওবাৰৰ দিনটোত ৬৫ কেজি শাখাত পাৰবীন হুডা, ৮০ কেজি শাখাত অংকুশ পাংঘাল আৰু ৯০ কেজিতকৈ অধিক ওজন শাখাত নৰেন্দ্ৰ বেৰৱালে ছেমিফাইনেলত স্থান নিশ্চিত কৰাৰ পিছত লাভলীনাই চতুৰ্থগৰাকী ভাৰতীয় হিচাপে এই সফলতা অৰ্জন কৰে। ভাৰতীয় তাৰকাগৰাকীৰ এই বিজয়ে দেশৰ ক্ৰীড়াপ্ৰেমীসকলৰ মাজত স্বৰ্ণ পদক জয়ৰ আশাক অধিক উজ্জ্বল কৰি তুলিছে।