জুবিন গাৰ্গৰ ৯.৬৩ লাখৰ সম্পত্তিৰ উত্তৰাধিকাৰী পত্নী গৰিমা; আদালতে প্ৰমাণপত্ৰ প্ৰদান

কামৰূপ (মেট্ৰ’) জিলা আৰু সত্ৰ ন্যায়াধীশ আদালতে অসমৰ জনপ্ৰিয় কণ্ঠশিল্পী জুবিন গাৰ্গৰ পত্নী গৰিমা শইকীয়া গাৰ্গৰ অনুকূলে উত্তৰাধিকাৰী প্ৰমাণপত্ৰ জাৰি কৰিছে। ইয়াৰ জৰিয়তে তেওঁক জুবিন গাৰ্গৰ বিত্তীয় সম্পত্তি আৰু বেংক একাউণ্টৰ ওপৰত আইনী অধিকাৰ প্ৰদান কৰা হৈছে।

বুধবাৰে জিলা আৰু সত্ৰ ন্যায়াধীশৰ কাৰ্যালয়ৰ পৰা গৰিমাই প্ৰমাণপত্ৰখন সংগ্ৰহ কৰে। নথিখন লাভ কৰাৰ পিছতেই আদালত চৌহদত তেওঁ আবেগিক হৈ পৰে।

সংবাদ মাধ্যমৰ আগত গৰিমাই কয় যে এনে পৰিস্থিতিত তেওঁ কেতিয়াও উত্তৰাধিকাৰী প্ৰমাণপত্ৰ ল’বলগীয়া হ’ব বুলি কল্পনা কৰা নাছিল।

“যি কৰিছিলোঁ, আমি সদায় একেলগে থাকিম বুলি ভাবিয়েই কৰিছিলোঁ। জীৱনত এনেদৰে উত্তৰাধিকাৰী প্ৰমাণপত্ৰ ল’বলগীয়া হ’ব বুলি কেতিয়াও বিচৰা নাছিলোঁ। আজি পোৱাৰ পিছতো মই শান্তি পোৱা নাই,” তেওঁ কয়।

গৰিমাই জুবিন গাৰ্গৰ সম্পত্তিৰ উত্তৰাধিকাৰী হিচাপে আইনী স্বীকৃতি বিচাৰি জিলা আৰু সত্ৰ আদালতৰ দ্বাৰস্থ হৈছিল। তেওঁৰ আবেদনৰ ভিত্তিত আদালতে ১৮ জুনত দিয়া আদেশত তেওঁক জুবিন গাৰ্গৰ স্থাৱৰ সম্পত্তিৰ বৈধ উত্তৰাধিকাৰী হিচাপে স্বীকৃতি দিয়ে। বুধবাৰে তেওঁ আনুষ্ঠানিকভাৱে উত্তৰাধিকাৰী প্ৰমাণপত্ৰখন লাভ কৰে।

আদালতৰ আদেশত প্ৰকাশ কৰা তথ্য অনুসৰি, জুবিন গাৰ্গৰ বিত্তীয় সম্পত্তিৰ পৰিমাণ প্ৰায় ৯.৬৩ লাখ টকা। মুম্বাইৰ জুহু শাখাৰ ষ্টেণ্ডাৰ্ড চাৰ্টাৰ্ড বেংকত তেওঁৰ দুটা একাউণ্ট আছিল, য’ত ক্ৰমে ২.৬৪ লাখ আৰু ১.৮৭ লাখ টকা জমা আছে।

ইয়াৰ উপৰি, গুৱাহাটীৰ ফেন্সী বজাৰস্থিত আইচিআইচিআই বেংকৰ একাউণ্টত তেওঁৰ প্ৰতিষ্ঠান “আই ক্ৰিয়েচন”ৰ নামত ১.৬৭ লাখ টকা জমা আছে, আনহাতে মিউচুৱেল ফাণ্ডত ৩.৪৫ লাখ টকাৰ বিনিয়োগ আছে।

উত্তৰাধিকাৰী প্ৰমাণপত্ৰ জাৰি হোৱাৰ লগে লগে গৰিমা শইকীয়া গাৰ্গে এতিয়া আইনীভাৱে এই সম্পত্তিসমূহ ব্যৱহাৰ আৰু পৰিচালনা কৰাৰ অধিকাৰ লাভ কৰিছে। অধিবক্তা প্ৰদীপ্ত তালুকদাৰে আদালতত তেওঁৰ হৈ প্ৰতিনিধিত্ব কৰিছিল।