শ্ৰীভূমি কাৰাগাৰত নিষিদ্ধ সামগ্ৰী যোগানৰ অভিযোগ; দুজন সহকাৰী কাৰাধ্যক্ষসহ চাৰি কৰ্মচাৰী গ্ৰেপ্তাৰ

কাৰাবন্দীসকলক মোবাইল ফোন আৰু অন্যান্য নিষিদ্ধ সামগ্ৰী যোগান ধৰাৰ অভিযোগত শ্ৰীভূমি জিলা কাৰাগাৰৰ চাৰি কৰ্মচাৰীক গ্ৰেপ্তাৰ কৰে আৰক্ষীয়ে। গ্ৰেপ্তাৰ হোৱা লোকসকলৰ ভিতৰত দুজন সহকাৰী কাৰাধ্যক্ষ আৰু দুজন ৱাৰ্ডাৰ আছে।

আৰক্ষীৰ মতে, অভিযুক্তসকল হৈছে ৰুদ্ৰ দেউৰী, শুভাশীষ ঘোষ, মাছিদ আলী লস্কৰ আৰু বিশ্বজিৎ বৰুৱা। মঙলবাৰে তেওঁলোকক গ্ৰেপ্তাৰ কৰা হয়।

চলিত বৰ্ষৰ আৰম্ভণিতে কাৰাগাৰখনৰ পৰা বৃহৎ পৰিমাণৰ নিষিদ্ধ সামগ্ৰী উদ্ধাৰৰ ঘটনাৰ তদন্তৰ পাছতেই এই পদক্ষেপ গ্ৰহণ কৰে আৰক্ষীয়ে। ঘটনাটোৱে কাৰাগাৰখনৰ নিৰাপত্তা ব্যৱস্থা আৰু আভ্যন্তৰীণ তদাৰকক লৈ গুৰুতৰ প্ৰশ্ন উত্থাপন কৰিছে।

২ ফেব্ৰুৱাৰীত জ্যেষ্ঠ আৰক্ষী অধীক্ষক লীনা দলেৰ নেতৃত্বত আৰক্ষীয়ে কাৰাগাৰখনত আকস্মিক তালাচী অভিযান চলায়। অভিযানকালত বিভিন্ন ৱাৰ্ডৰ পৰা ২৯টা মোবাইল ফোন, চাৰ্জাৰ, চিম কাৰ্ড আৰু আন কেইবাটাও নিষিদ্ধ সামগ্ৰী উদ্ধাৰ কৰে।

আৰক্ষী সূত্ৰই জানিবলৈ দিয়ে, গোপন তথ্যৰ ভিত্তিত চলোৱা এই অভিযানৰ পূৰ্বে বন্দীসকলে কাৰাগাৰৰ ভিতৰৰ পৰা নিয়মীয়াকৈ বাহিৰৰ লোকৰ সৈতে যোগাযোগ ৰক্ষা কৰি থকা আৰু কিছু অবৈধ কাৰ্যকলাপ পৰিচালনা কৰাৰ সন্দেহ উত্থাপন হৈছিল।

উদ্ধাৰ হোৱা মোবাইল ফোনসমূহৰ কল ৰেকৰ্ড, যোগাযোগৰ ধৰণ আৰু ব্যৱহাৰ-সম্পৰ্কীয় তথ্য বিশ্লেষণ কৰাৰ লগতে একাধিক লোকক সোধা-পোছা কৰে তদন্তকাৰীসকলে। সেই তদন্ততে কাৰাগাৰৰ একাংশ কৰ্মচাৰীৰ সম্ভাৱ্য জড়িত থকাৰ তথ্য পোহৰলৈ আহে।

জিলা অপৰাধ শাখাৰ দায়িত্বত থকা অতিৰিক্ত আৰক্ষী অধীক্ষক ত্ৰিনয়ন ভূঞাই কয়, “তদন্তকালত কেইবাজনো লোকক সোধা-পোছা কৰা হয়। ইয়াৰ জৰিয়তে অভিযুক্তসকলৰ বিৰুদ্ধে ব্যৱস্থা গ্ৰহণৰ বাবে প্ৰয়োজনীয় প্ৰমাণ সংগ্ৰহ কৰাত সহায় হয়।”

তদন্ত আগবঢ়াৰ লগে লগে সন্দেহৰ কেন্দ্ৰবিন্দুলৈ আহে কেইবাজনো কাৰাগাৰ কৰ্মচাৰী। কেইবামাহ ধৰি চলা তদন্তৰ অন্তত সংগৃহীত প্ৰমাণৰ ভিত্তিত চাৰি কৰ্মচাৰীক গ্ৰেপ্তাৰ কৰে আৰক্ষীয়ে।

ভূঞাই লগতে কয় যে ভৱিষ্যতে এনে ঘটনা ৰোধৰ বাবে কাৰাগাৰৰ নিৰাপত্তা ব্যৱস্থা অধিক শক্তিশালী কৰাৰ পদক্ষেপ গ্ৰহণ কৰা হৈছে। ইয়াৰ অংশ হিচাপে অধিক কটকটীয়া নিৰীক্ষণ, নিয়মীয়া পৰিদৰ্শন আৰু উন্নত তদাৰক ব্যৱস্থা কাৰ্যকৰী কৰা হ’ব।

আৰক্ষীয়ে বৰ্তমানো অভিযুক্তসকলক জেৰা চলাই আছে। এই ঘটনাৰ সৈতে আন কোনো ব্যক্তি বা বৃহত্তৰ কোনো চক্ৰ জড়িত আছে নেকি, সেই দিশতো তদন্ত অব্যাহত আছে।