ড্ৰাগছ বিৰোধী অভিযানত গোৱালপাৰা আৰক্ষীৰ সফলতা, ৮৬ গ্ৰাম হেৰ’ইনসহ দুই সৰবৰাহকাৰী গ্ৰেপ্তাৰ

ৰাজ্যত অব্যাহত থকা নিচাযুক্ত দ্ৰব্য বিৰোধী অভিযানৰ অংশ হিচাপে বুধবাৰৰ সন্ধিয়া গোৱালপাৰাৰ কৃষ্ণাইত ৮৬ গ্ৰাম সন্দেহযুক্ত হেৰ’ইন জব্দ কৰে আৰক্ষীয়ে। এই অভিযানৰ সময়ত ড্ৰাগছ সৰবৰাহৰ সৈতে জড়িত দুজন অভিযুক্তক গ্ৰেপ্তাৰ কৰে কৃষ্ণাই আৰক্ষীৰ এটা দলে। ধৃত অভিযুক্ত দুজনক ক্ৰমে শাহিদুল ইছলাম আৰু মনোৱাৰ হুছেইন বুলি চিনাক্ত কৰা হৈছে।

আৰক্ষীৰ সূত্ৰই জনোৱা অনুসৰি, সন্ধিয়া প্ৰায় ৭ বজাত চলোৱা এই তালাচীৰ সময়ত অভিযুক্ত দুজনৰ পৰা ড্ৰাগছখিনি উদ্ধাৰ কৰা হয়। ইয়াৰ উপৰিও ড্ৰাগছ সৰবৰাহৰ কামত ব্যৱহাৰ কৰা এখন মটৰচাইকেল আৰু দুটা মোবাইল ফোনো আৰক্ষীয়ে নিজৰ জিম্মাত লয়।

বৰ্তমান দুয়ো অভিযুক্তক অধিক সোধা-পোছাৰ বাবে জিম্মাত লোৱাৰ লগতে অঞ্চলটোত সক্ৰিয় হৈ থকা ড্ৰাগছৰ নেটৱৰ্কৰ সৈতে তেওঁলোকৰ সম্পৰ্কৰ বিষয়ে তদন্ত চলাইছে আৰক্ষীয়ে। সমগ্ৰ ৰাজ্যতে অবৈধ ড্ৰাগছ নেটৱৰ্কৰ বিৰুদ্ধে অসম আৰক্ষীয়ে চলোৱা এই ধাৰাবাহিক অভিযান অধিক ক্ষিপ্ৰ কৰা হৈছে বুলি বিভাগীয় সূত্ৰই প্ৰকাশ কৰে।