পেৰিছ অলিম্পিকৰ উদ্বোধনী অনুষ্ঠানত অংশ ল’ব নোৱাৰিব ৰাছিয়া-বেলাৰুছৰ এথলীটে

পেৰিছ অলিম্পিকৰ উদ্বোধনী অনুষ্ঠানত ৰাছিয়া আৰু বেলাৰুছৰ খেলুৱৈসকলে পৰম্পৰাগত কুচকাৱাজত অংশগ্ৰহণ কৰিব নোৱাৰিব। আন্তৰ্জাতিক অলিম্পিক সমিতিয়ে এই কথা প্ৰকাশ কৰিছে।অলিম্পিকৰ উদ্বোধনী অনুষ্ঠান ২৬ জুলাইত অনুষ্ঠিত হ’ব, য’ত ছেইন নদীৰ পৰা আইফেল টাৱাৰ অভিমুখে হাজাৰ হাজাৰ খেলুৱৈ নাওৱে আহিব। পেৰেড সাধাৰণতে ষ্টেডিয়ামত অনুষ্ঠিত হয়।

আইঅচিয়ে কয় যে ৰাছিয়া আৰু বেলাৰুছৰ এথলীটসকলে নদীৰ দাঁতিত উপস্থিত থাকি উদ্বোধনী অনুষ্ঠানটো চাবলৈ সক্ষম হ’ব। তেওঁলোকক নিৰপেক্ষ খেলুৱৈ হিচাপে অলিম্পিকত খেলিবলৈ অনুমতি দিয়া হৈছে। ইয়াৰ পূৰ্বে, আন্তৰ্জাতিক পেৰালিম্পিক সমিতিয়ে ২৮ আগষ্টত পেৰিছ পেৰালিম্পিকৰ উদ্বোধনী অনুষ্ঠানত ৰাছিয়া আৰু বেলাৰুছৰ খেলুৱৈসকলৰ ওপৰত নিষেধাজ্ঞা ঘোষণা কৰে।

ইউক্ৰেইনত চলি থকা যুদ্ধৰ বাবে, দুয়োখন দেশক অলিম্পিকত দলীয় প্ৰতিযোগিতাত অংশগ্ৰহণ কৰিবলৈ অনুমতি দিয়া নায়। ব্যক্তিগত শ্ৰেণীত, খেলুৱৈসকলে নিৰপেক্ষভাৱে খেলিব যদিহে তেওঁলোকে ইউক্ৰেইনৰ যুদ্ধ সমৰ্থন নকৰে বা সেনা বা সুৰক্ষা বাহিনীৰ সৈতে সম্পৰ্কিত নহয়। ৰাছিয়ান পাছপোৰ্ট থকা ৩৬ জন খেলুৱৈ আৰু ২২ জন বেলাৰুছীয়ে পেৰিছ অলিম্পিকৰ বাবে যোগ্যতা অৰ্জন কৰিছে।