বিষ্ণুপুৰত তাণ্ডৱ; সাৰ ভৰ্তি ট্ৰাক ধ্বংস কৰি পাঁচজন গ্ৰেপ্তাৰ

মণিপুৰত অব্যাহত থকা উত্তেজনাপূৰ্ণ পৰিৱেশৰ মাজতে বিষ্ণুপুৰ জিলাৰ মৈৰাং পাটলৌ অঞ্চলত সাৰ কঢ়িয়াই নিয়া এখন ট্ৰাক ভাঙি লণ্ডভণ্ড কৰাৰ অভিযোগত পাঁচজন ব্যক্তিক গ্ৰেপ্তাৰ কৰিছে মণিপুৰ আৰক্ষীয়ে। যোৱা ২৬ এপ্ৰিলত মৈৰাং আৰক্ষী থানাৰ অন্তৰ্গত অঞ্চলটোত এই কূটাঘাতমূলক কাৰ্য সংঘটিত কৰিছিল দুৰ্বৃত্তৰ দলটোৱে। ট্ৰাকখনত থকা সাৰৰ বস্তাসমূহ নষ্ট কৰাৰ অপৰাধত আৰক্ষীয়ে অভিযুক্তকেইজনক কৰায়ত্ত কৰে।

আৰক্ষীৰ সূত্ৰই জনোৱা মতে, গ্ৰেপ্তাৰ হোৱা লোককেইজনক থমনাপোকপিৰ লাইশ্ৰাম অভিজিত সিং (২৫) আৰু খ্বাইৰাকপাম ধনেশ্বৰ সিং (২৫) বুলি চিনাক্ত কৰা হৈছে। দলটোৰ আন সদস্যসকলক নগংখালাৱাইৰ এলেক্স মইৰাংথেম (২৫), কোঞ্জেনবামৰ ফৈৰেমবাম কাইজাৰ সিং (৩৬) আৰু মৈৰাং কলেজ সাহায্য শিবিৰত আশ্ৰয় লৈ থকা চনাবাম চাওবা মেইটেই (৪৮) বুলি চিনাক্ত কৰা হৈছে।

অভিযানকালত আৰক্ষীয়ে দুৰ্বৃত্তৰ দলটোৱে ব্যৱহাৰ কৰা চাৰিখন দুচকীয়া বাহন জব্দ কৰে। এই কূটাঘাতৰ নেপথ্যত থকা প্ৰকৃত কাৰণ বৰ্তমানলৈকে আনুষ্ঠানিকভাৱে প্ৰকাশ কৰা নাই প্ৰশাসনে। সমগ্ৰ ঘটনাৰ অধিক তথ্য উদ্ধাৰৰ বাবে আৰক্ষীয়ে বৰ্তমান তদন্ত অব্যাহত ৰাখিছে। অন্য কোনো অপৰাধমূলক কাৰ্যৰ সৈতে অভিযুক্তকেইজন জড়িত আছে নেকি, সেই দিশটোও পৰীক্ষা কৰি থকা হৈছে।