এক্সিছ মেক্স লাইফ আইআৰআইএছ ৫.০

এক্সিছ মেক্স লাইফ ইঞ্চুৰেন্স লিমিটেড(পূৰ্বে মেক্স লাইফ ইঞ্চুৰেন্স কোম্পানী লিমিটেড নামেৰে জনাজাত)-এ কাণ্টাৰৰ সহযোগত ইণ্ডিয়া ৰিটায়াৰমেণ্ট ইণ্ডেক্স ষ্টাডী(আইআৰআইএছ ৫.০)ৰ পঞ্চম সংস্কৰণৰ পূব মণ্ডলৰ তথ্য সবিস্তাৰে প্ৰকাশ কৰিছে। প্ৰতিবেদনত দেখা গৈছে যে অৱসৰৰ প্ৰস্তুতিৰ ক্ষেত্ৰত পূব ভাৰতে ৫২ স্কোৰ লাভ কৰি দেশৰ শীৰ্ষত অৱস্থান কৰিছে, যি ৰাষ্ট্ৰীয় গড় ৪৮ৰ বহু উৰ্ধ্বত। এই অধ্যয়নত পূব ভাৰতৰ শক্তিশালী আৰ্থিক আৰু স্বাস্থ্য প্ৰস্তুতিৰ ওপৰত আলোকপাত কৰা হৈছে। বিত্তীয় প্ৰস্তুতি সূচকাংক ৫২ত স্থিৰ হৈ আছে, যিয়ে অনুশাসিত সঞ্চয় আৰু আগতীয়া পৰিকল্পনাক প্ৰতিফলিত কৰিছে, আনহাতে স্বাস্থ্য প্ৰস্তুতি সূচকাংক ৪৬ৰ পৰা ৪৯লৈ উন্নত হৈছে। কিন্তু আৱেগিক প্ৰস্তুতি সূচকাংক সামান্য হ্ৰাস পাই ৫৯ত অৱস্থান কৰিছে, যিয়ে অৱসৰৰ পিছৰ জীৱনক কেন্দ্ৰ কৰি ক্ৰমাৎ উদ্বেগ বৃদ্ধিৰ ইংগিত দিয়ে। এক্সিছ মেক্স লাইফ ইঞ্চুৰেন্সৰ সঞ্চালক তথা মুখ্য ব্যৱসায়িক বিষয়া তথা অৱসৰ বিভাগৰ মুৰব্বী অনুৰাগ গুপ্তাই কয় যে, এই ফলাফলে আগতীয়া বিনিয়োগ, অধিক বীমা গ্ৰহণ আৰু সক্ৰিয় স্বাস্থ্য আচৰণৰ দ্বাৰা চালিত পূব ভাৰতৰ নেতৃত্বক সুদৃঢ় কৰিলে, লগতে আৱেগিক সুস্থতাৰ প্ৰয়োজনীয়তাৰ ওপৰতো গুৰুত্ব আৰোপ কৰে।

অঞ্চলটোৰ প্ৰায় ৭৫% উত্তৰদাতাই অৱসৰৰ বাবে বিনিয়োগ আৰম্ভ কৰিছে, যি ভাৰতৰ ভিতৰতে সৰ্বাধিক। আনহাতে, টাৰ্ম প্লেনৰ মালিকীস্বত্ব ৬০% আৰু ইউএলআইপি গ্ৰহণ ৪৬%লৈ বৃদ্ধি পাইছে। প্ৰায় ৬৯% লোকে অৱসৰৰ ক্ষেত্ৰত নিৰাপদ অনুভৱ কৰে আৰু ৫২% লোকে বিশ্বাস কৰে যে সঞ্চয় অৱসৰৰ পিছত ১০ বছৰতকৈও অধিক সময়লৈকে থাকিব। স্বাস্থ্য সজাগতাও বৃদ্ধি পাইছে, ৫৫% লোকে বাৰ্ষিক পৰীক্ষাৰ পথ বাছি লোৱাৰ লগতে ৫৩% লোকে স্বাস্থ্য বীমাৰ অধীনত আছে।

কিন্তু আৱেগিক উদ্বেগ স্থায়ী হৈ আছে, ৭০% সন্তানৰ ওপৰত নিৰ্ভৰশীলতাক লৈ চিন্তিত আৰু ৬৯% লোকৰ নিসংগতাৰ ভয় আছে। গুৱাহাটীৰ বিত্তীয় উপদেষ্টাসকলে কয় যে, অধিক সংখ্যক ব্যক্তিয়ে বীমা আৰু দীৰ্ঘম্যাদী বিনিয়োগ সামগ্ৰী গ্ৰহণ কৰাৰ লগে লগে অৱসৰ পৰিকল্পনাৰ বিষয়ে সজাগতা ক্ৰমান্বয়ে বৃদ্ধি পাইছে। এই প্ৰৱণতা পূব ভাৰতৰ শক্তিশালী প্ৰদৰ্শনৰ সৈতে সংগতি ৰাখে, কিয়নো চহৰখনৰ বিনিয়োগকাৰীসকলে প্ৰাৰম্ভিক বিত্তীয় পৰিকল্পনা আৰু স্বাস্থ্য সুৰক্ষাৰ প্ৰতি বৰ্ধিত আগ্ৰহ দেখুৱাইছে, যদিও বিশেষজ্ঞসকলে লক্ষ্য কৰিছে যে আৱেগিক প্ৰস্তুতি এনে এক ক্ষেত্ৰ হৈ আছে য’ত অধিক মনোযোগৰ প্ৰয়োজন।