মনোনয়ন পত্ৰৰ পৰীক্ষণ সম্পূৰ্ণ: অসম বিধানসভা নিৰ্বাচনৰ বাবে ৭৮৯ গৰাকী প্ৰাৰ্থীৰ আবেদন বৈধ হিচাপে ঘোষণা

অসম বিধানসভা নিৰ্বাচনৰ বাবে দাখিল কৰা মনোনয়ন পত্ৰসমূহৰ পৰীক্ষণ প্ৰক্ৰিয়া সকলো ১২৬ টা সমষ্টিতে শেহতীয়াভাৱে সম্পূৰ্ণ হৈছে। এই প্ৰক্ৰিয়াৰ অন্তত ৰাজ্যজুৰি মুঠ ৭৮৯ গৰাকী প্ৰাৰ্থীৰ আবেদন নিৰ্বাচনত প্ৰতিদ্বন্দ্বিতা কৰিবলৈ বৈধ বুলি ঘোষণা কৰা হয়। যোৱা ২৪ মাৰ্চৰ পৰা আৰম্ভ হোৱা এই গুৰুত্বপূৰ্ণ পৰীক্ষণ কাৰ্যসূচী মঙলবাৰে বৰপেটা আৰু ঢেকীয়াজুলি সমষ্টিৰ শুনানিৰ পাছত চূড়ান্ত কৰা হয়।

ৰাজ্যৰ নিৰ্বাচনী যুঁজত অৱতীৰ্ণ হ’বলৈ মুঠ ৮১৫ গৰাকী প্ৰাৰ্থীয়ে ১৩৮৯ খন মনোনয়ন পত্ৰ দাখিল কৰিছিল। যাৱতীয় পৰীক্ষা-নিৰীক্ষাৰ অন্তত ইয়াৰে ৭৮৯ খন মনোনয়ন বৈধ হিচাপে গ্ৰহণ কৰি প্ৰাৰ্থীসকলক নিৰ্বাচনী ৰণত নামিবলৈ অনুমতি প্ৰদান কৰা হৈছে। এই পৰীক্ষণৰ পাছতে এতিয়া ৰাজ্যৰ নিৰ্বাচনী পৰিৱেশ অধিক সক্ৰিয় হৈ পৰা পৰিলক্ষিত হৈছে।

মনোনয়ন পত্ৰৰ এই পৰীক্ষণত বৰপেটা সমষ্টিত এক বিশেষ পৰিৱৰ্তন দেখা গৈছে। সমষ্টিটোত এজন প্ৰাৰ্থীৰ মনোনয়ন নাকচ হোৱাৰ ফলত এতিয়া মাত্ৰ তিনিগৰাকী বৈধ প্ৰাৰ্থীহে প্ৰতিদ্বন্দ্বিতাত অৱশিষ্ট আছে। বিশেষকৈ কংগ্ৰেছ প্ৰাৰ্থী মহানন্দ সৰকাৰৰ মনোনয়ন পত্ৰ অবৈধ বুলি ঘোষণা কৰাত সমষ্টিটোৰ নিৰ্বাচনী সমীকৰণ সলনি হৈ পৰিছে। ইয়াৰ ফলত অগপ প্ৰাৰ্থী দীপক কুমাৰ দাসে এতিয়া মাত্ৰ দুজন স্বতন্ত্ৰ প্ৰাৰ্থীৰ মুখামুখি হ’ব লাগিব।

আনহাতে ঢেকীয়াজুলি সমষ্টিত দাখিল কৰা সকলো ১০ খন মনোনয়ন পত্ৰই বৈধ বুলি বিবেচিত হৈছে। নিৰ্বাচন আয়োগে প্ৰাৰ্থিত্ব প্ৰত্যাহাৰৰ বাবে ২৬ মাৰ্চ দিনটো অন্তিম তাৰিখ হিচাপে নিৰ্ধাৰণ কৰিছে। ইতিমধ্যে তিনিগৰাকী স্বতন্ত্ৰ প্ৰাৰ্থীয়ে নিজৰ মনোনয়ন প্ৰত্যাহাৰ কৰিছে বুলি জানিব পৰা গৈছে। প্ৰাৰ্থিত্ব প্ৰত্যাহাৰৰ সময়সীমা পাৰ হোৱাৰ পিছতহে নিৰ্বাচনত অৱতীৰ্ণ হ’বলগীয়া প্ৰাৰ্থীৰ চূড়ান্ত তালিকাখন স্পষ্ট হৈ পৰিব।