বিজেপিৰ ৰাষ্ট্ৰীয় কাৰ্যকৰী সভাপতি পদ লাভ কৰি কি ক’লে নীতিন নবীনে?

বিহাৰৰ মন্ত্ৰী নীতিন নবীনক বিজেপিয়ে ৰাষ্ট্ৰীয় কাৰ্যকৰী সভাপতি হিচাপে নিযুক্তি দিয়াৰ পিছতে সোমবাৰে তেওঁ এক গুৰুত্বপূৰ্ণ মন্তব্য কৰে। তেওঁ কয় যে এই নতুন সুযোগ দলটোৰ আশীৰ্বাদ আৰু ইয়াৰ বাবে তেওঁ বৰ্তমানৰ নেতৃত্বৰ ওচৰত কৃতজ্ঞতা প্ৰকাশ কৰে।

দেওবাৰে পাটনাৰ এখন উদ্যানত তেওঁৰ স্বৰ্গীয় পিতৃ আৰু প্ৰাক্তন বিধায়ক নবীন কিশোৰ প্ৰসাদ সিনহাৰ প্ৰতিমূৰ্তিত শ্ৰদ্ধাঞ্জলি জনোৱাৰ পিছতে সাংবাদিকৰ সৈতে হোৱা কথাবাৰ্তাত নীতিন নবীনে এই কথা সদৰি কৰে। তেওঁ লগতে পিতৃয়ে আৰম্ভ কৰা কামসমূহ আগুৱাই লৈ যোৱাৰ প্ৰতিশ্ৰুতি দিয়ে।

নবীনে কয়, “মই সদায় মোৰ পিতৃৰ আদৰ্শক লৈ কাম কৰি আহিছো, যিয়ে দলটোক মাতৃ বুলি গণ্য কৰিছিল আৰু ৰাষ্ট্ৰক সকলোতকৈ অধিক গুৰুত্ব দিছিল। মই ভাবো সেইবাবেই দলটোৱে মোক বিজেপি কৰ্মীসকলৰ সৈতে কাম কৰি থাকিবলৈ এই সুযোগ দি আশীৰ্বাদ কৰিছে।”

বিহাৰৰ কেবিনেট মন্ত্ৰী নবীনে প্ৰধানমন্ত্ৰী নৰেন্দ্ৰ মোদীৰ নেতৃত্বৰ শলাগ লয় আৰু তেওঁৰ প্ৰতি কৃতজ্ঞতা প্ৰকাশ কৰে। তেওঁ কয় যে প্ৰধানমন্ত্ৰীৰ নেতৃত্বত দেশে উন্নয়ন লাভ কৰিছে আৰু বিজেপিও আজি দুখীয়াৰ দল হিচাপে থিয় দিছে। ইয়াৰোপৰি তেওঁ পশ্চিম বংগ নিৰ্বাচনৰ সন্দৰ্ভত কয় যে বিজেপি কৰ্মীসকল ২৪ ঘণ্টাই কাম কৰিবলৈ সাজু থাকে, আনহাতে আন দলে কেৱল নিৰ্বাচনৰ সময়তহে কাম কৰে।