১৬ বছৰ অনুৰ্ধৰ বাবে নিষিদ্ধ হ’ব ছ’চিয়েল মিডিয়া; বাজেটত এই ঘোষণা কৰ্ণাটকৰ মুখ্যমন্ত্ৰী সিদ্ধাৰামাইয়াৰ

১৬ বছৰৰ তলৰ ল’ৰা-ছোৱালীৰ বাবে ছ’চিয়েল মিডিয়াৰ ব্যৱহাৰ সম্পূৰ্ণৰূপে নিষিদ্ধ কৰাৰ সিদ্ধান্ত লৈছে কৰ্ণাটক চৰকাৰে। শুকুৰবাৰে ৰাজ্যিক বাজেট উত্থাপন কৰি মুখ্যমন্ত্ৰী সিদ্ধাৰামাইয়াই এই ঐতিহাসিক ঘোষণা কৰে। মোবাইলৰ অতিৰিক্ত ব্যৱহাৰে শিশুৰ ওপৰত পেলোৱা বিৰূপ প্ৰভাৱ ৰোধ কৰাই এই পদক্ষেপৰ মূল লক্ষ্য বুলি চৰকাৰে জানিবলৈ দিছে। ভাৰতৰ ভিতৰত কৰ্ণাটকেই প্ৰথম ৰাজ্য হিচাপে এনে এক কঠোৰ সিদ্ধান্তৰ কথা আনুষ্ঠানিকভাৱে সদৰী কৰিছে।

এই নতুন নিয়মৰ প্ৰয়োজনীয়তা সন্দৰ্ভত মুখ্যমন্ত্ৰী সিদ্ধাৰামাইয়াই কয়, “ছ’চিয়েল মিডিয়াৰ আসক্তিয়ে আমাৰ কিশোৰ সমাজৰ মানসিক আৰু বৌদ্ধিক বিকাশত বাধা দিছে। সেয়েহে আমি ১৬ বছৰৰ তলৰ শিশুৰ বাবে ইয়াৰ ব্যৱহাৰ নিষিদ্ধ কৰিবলৈ ওলাইছোঁ।”

তেওঁ লগতে কয়, “অষ্ট্ৰেলিয়া বা ব্ৰিটেইনৰ দৰে দেশসমূহে ইতিমধ্যে এনে সুৰক্ষামূলক ব্যৱস্থাৰ ওপৰত কাম কৰি আছে। আমি আমাৰ ল’ৰা-ছোৱালীৰ শিক্ষা আৰু ভৱিষ্যত সুৰক্ষিত কৰিবলৈ এই পদক্ষেপ লৈছোঁ।”

উল্লেখ্য যে ইয়াৰ পূৰ্বে অন্ধ্ৰ প্ৰদেশ আৰু গোৱা চৰকাৰেও একেধৰণৰ নিষেধাজ্ঞা আৰোপ কৰাৰ কথা বিবেচনা কৰিছিল যদিও কৰ্ণাটকে ইয়াক কাৰ্যকৰী কৰাৰ দিশত অগ্ৰগতি লাভ কৰিছে। ৰাজ্যখনৰ স্বাস্থ্য মন্ত্ৰী দীনেশ গুণ্ডু ৰাও আৰু তথ্য-প্ৰযুক্তি মন্ত্ৰী প্ৰিয়াংক খাৰ্গেও দীৰ্ঘদিন ধৰি শিশুৰ স্ক্ৰীণ টাইম আৰু কৃত্ৰিম বুদ্ধিমত্তাৰ প্ৰভাৱক লৈ উদ্বেগ প্ৰকাশ কৰি আহিছিল। আনকি বিজেপিৰ বিধায়ক সুৰেশ কুমাৰেও ছ’চিয়েল মিডিয়াই পাৰিবাৰিক আৰু শৈক্ষিক পৰিৱেশ বিনষ্ট কৰা বুলি চৰকাৰক সতৰ্ক কৰি দিছিল।

অৱশ্যে কেৱল নিষেধাজ্ঞা জাৰি কৰিলেই এই জটিল সমস্যাৰ সমাধান হ’ব নে নাই, তাক লৈ বিশেষজ্ঞসকলৰ মাজত মিশ্ৰিত প্ৰতিক্ৰিয়াৰ সৃষ্টি হৈছে। চাইবাৰ বিশেষজ্ঞসকলে সকীয়াই দিছে যে এনে পদক্ষেপে কিশোৰ-কিশোৰীসকলক ভি পি এন বা অন্য অনিয়ন্ত্ৰিত প্লেটফৰ্ম ব্যৱহাৰ কৰিবলৈহে উৎসাহিত কৰিব পাৰে। অনলাইন গ্ৰুমিং আৰু তথ্য চুৰিৰ দৰে সমস্যাৰ মোকাবিলা কৰিবলৈ কেৱল নিষেধাজ্ঞা নহয়, বৰঞ্চ ডিজিটেল সাক্ষৰতা আৰু সচেতনতা বৃদ্ধিৰ ওপৰতো গুৰুত্ব দিয়াটো সমানেই প্ৰয়োজনীয় বুলি তেওঁলোকে মত প্ৰকাশ কৰে।