সীমান্তত কৰ্তব্যৰত অৱস্থাতে প্ৰাণ হেৰুৱালে জোৱান প্ৰগত সিঙে!

দেশৰ হকে কৰ্তব্য সম্পাদন কৰি থকাৰ সময়তে সীমান্তত প্ৰাণ হেৰুৱালে এগৰাকী বীৰ জোৱানে। জম্মু-কাশ্মীৰৰ অনন্তনাগ জিলাত নিয়োজিত ভাৰতীয় সেনাৰ ১৯ ৰাষ্ট্ৰীয় ৰাইফলছৰ নায়ব চুবেদাৰ প্ৰগত সিঙে কৰ্তব্যৰত অৱস্থাতে মৃত্যুক সাবটি লয়। পঞ্জাৱৰ অমৃতসৰ জিলাৰ ৰামদাস গাঁৱৰ নিবাসী ৩১ বছৰীয়া এই জোৱানগৰাকী সক্ৰিয়ভাৱে জড়িত আছিল সন্ত্ৰাসবাদ বিৰোধী অভিযানৰ সৈতে। ২০১৫ চনৰ ২৩ ডিচেম্বৰত ভাৰতীয় সেনাত যোগদান কৰা প্ৰগত সিঙে অত্যন্ত নিষ্ঠাৰে দেশসেৱা আগবঢ়াই আহিছিল।

শ্বহীদ জোৱানগৰাকীৰ নশ্বৰ দেহ আজি সন্ধিয়া তেওঁৰ গৃহ চহৰত উপস্থিত হোৱাৰ সম্ভাৱনা আছে। কাইলৈ সম্পূৰ্ণ সামৰিক মৰ্যাদাৰে তেওঁৰ শেষকৃত্য সম্পন্ন কৰিবলৈ যাৱতীয় প্ৰস্তুতি সম্পূৰ্ণ কৰা হৈছে। এই অন্তিম বিদায় অনুষ্ঠানত তেওঁৰ পৰিয়ালৰ লগতে সমাজৰ বিশিষ্ট ব্যক্তি আৰু সেনাৰ প্ৰতিনিধিসকল উপস্থিত থাকিব।

নায়ব চুবেদাৰ প্ৰগত সিঙে মৃত্যুকালত বৃদ্ধ পিতৃ-মাতৃৰ লগতে পত্নী আৰু দুটি সন্তানক এৰি থৈ যায়। তেওঁৰ বিয়োগৰ বাতৰি বিয়পি পৰাৰ লগে লগে সমগ্ৰ ৰামদাস গাঁও এতিয়া ম্ৰিয়মাণ হৈ পৰিছে। এগৰাকী অনুশাসিত সৈনিক আৰু এগৰাকী যত্নশীল পিতৃ হিচাপে তেওঁৰ ত্যাগক গাঁৱৰ ৰাইজে শ্ৰদ্ধাৰে স্মৰণ কৰিছে।

ভাৰতীয় সেনাৰ লগতে সমগ্ৰ দেশবাসীয়ে নায়ব চুবেদাৰ প্ৰগত সিঙৰ অদম্য সাহস আৰু চৰম বলিদানক গভীৰ শ্ৰদ্ধাঞ্জলি জনাইছে। সেনাৰ তৰফৰ পৰা শোকসন্তপ্ত পৰিয়ালবৰ্গৰ প্ৰতি সমবেদনা জ্ঞাপন কৰাৰ লগতে এই সংকটৰ সময়ত পৰিয়ালটোৰ কাষত থকাৰ আশ্বাস প্ৰদান কৰা হৈছে।