ইৰাণৰ আক্ৰমণৰ পাছতে ডুবাইত হাহাকাৰ; আৱদ্ধ দুলীয়াজানৰ ১৮ জনীয়া পৰ্যটকৰ দল

পশ্চিম এছিয়াত ইৰাণে চলোৱা শেহতীয়া আক্ৰমণৰ পাছত সৃষ্টি হোৱা যুদ্ধসদৃশ পৰিৱেশৰ প্ৰত্যক্ষ প্ৰভাৱ এতিয়া অসমৰ পৰ্যটকৰ ওপৰতো পৰিছে। ইৰাণৰ এই আক্ৰমণৰ পৰিপ্ৰেক্ষিতত আন্তঃৰাষ্ট্ৰীয় বিমান সেৱা ব্যাহত হোৱাৰ ফলত ডুবাইত আৱদ্ধ হৈ পৰিছে দুলীয়াজানৰ ১৮ জনীয়া এটা পৰ্যটকৰ দল। ৩ মাৰ্চত ভাৰতলৈ উভতি অহাৰ কথা আছিল যদিও ডুবাই বিমানবন্দৰ কৰ্তৃপক্ষই নিৰাপত্তাজনিত কাৰণত বিমান বাতিল কৰাত তেওঁলোক এতিয়া অনিশ্চয়তাৰ মাজত দিন কটাবলগীয়া হৈছে।

দলটোৰ সদস্যসকলে জনোৱা মতে, যোৱা নিশা তেওঁলোকে ডুবাইৰ বুৰ্জ খলিফা দৰ্শন কৰি থকাৰ সময়তে হঠাতে ইৰাণৰ আক্ৰমণৰ খবৰ বিয়পি পৰে। ইয়াৰ পাছতে সমগ্ৰ ডুবাইতে নিৰাপত্তা ব্যৱস্থা কটকটীয়া কৰি তোলা হয় আৰু বহুতো আন্তঃৰাষ্ট্ৰীয় বিমানৰ উৰণ স্থগিত ৰখা হয়। ফলত দুলীয়াজানৰ এই দলটোৱে নিৰ্ধাৰিত সময়ত ভাৰতলৈ উৰা মৰিবলৈ সক্ষম নহ’ল।

অৱশ্যে বৰ্তমান তেওঁলোক সুৰক্ষিত ঠাইত আছে বুলি জানিবলৈ দিছে। দুলীয়াজানত থকা তেওঁলোকৰ পৰিয়ালৰ সদস্যসকলৰ সৈতেও দলটোৱে যোগাযোগ অব্যাহত ৰাখিছে। পৰিস্থিতি স্বাভাৱিক হ’লে আৰু বিমান সেৱা পুনৰ আৰম্ভ হ’লে যিমান পাৰি সোনকালে তেওঁলোক অসমলৈ উভতি আহিব পাৰিব বুলি আশাপ্ৰকাশ কৰিছে।

যুদ্ধৰ এই পৰিস্থিতিয়ে কেৱল মধ্য-প্ৰাচ্যতে নহয়, বিদেশ ভ্ৰমণলৈ যোৱা অসমীয়া পৰ্যটকৰ মাজতো এতিয়া গভীৰ উদ্বেগৰ সৃষ্টি কৰিছে। বিমান সেৱা কেতিয়া স্বাভাৱিক হয়, তালৈকে এতিয়া অধীৰ আগ্ৰহেৰে বাট চাইছে আৱদ্ধ হৈ পৰা ১৮ গৰাকী অসমীয়া লোকে।