বিতৰ্কিত ছবি ‘দ্য কেৰালা ষ্ট’ৰী ২’ৰ মুক্তিৰ ওপৰত স্থগিতাদেশ; চেন্সৰ ব’ৰ্ডৰ কাৰ্যত অসন্তুষ্টি প্ৰকাশ কেৰালা উচ্চ ন্যায়ালয়ৰ

বিতৰ্কিত ছবি ‘দ্য কেৰালা ষ্ট’ৰী ২’ৰ মুক্তিৰ ওপৰত বৃহস্পতিবাৰে কেৰালা উচ্চ ন্যায়ালয়ে জাৰি কৰিছে অন্তৱৰ্তীকালীন স্থগিতাদেশ। ছবিখনক চেন্সৰ ব’ৰ্ডে দিয়া প্ৰমাণপত্ৰৰ ক্ষেত্ৰত ‘বিচাৰ-বুদ্ধিৰ প্ৰয়োগ নকৰাৰ’ প্ৰমাণ পোৱা বুলি গুৰুত্বপূৰ্ণ মন্তব্য কৰে ন্যায়ালয়ে। কেন্দ্ৰীয় চলচিত্ৰ প্ৰমাণীকৰণ ব’ৰ্ডৰ (চিবিএফচি) অনুমোদনক প্ৰত্যাহ্বান জনাই দাখিল কৰা কেইবাখনো আবেদনৰ শুনানি গ্ৰহণ কৰি ন্যায়াধীশ বেচু কুৰিয়ান থমাছে এই ৰায় প্ৰদান কৰে।

আবেদনকাৰীসকলে ন্যায়ালয়ত যুক্তি দৰ্শাইছিল যে এই ছবিখনত কেৰালাৰ সন্দৰ্ভত তথ্যৰ বিকৃত উপস্থাপন কৰা হৈছে। তেওঁলোকৰ মতে, এনেধৰণৰ বিষয়বস্তুৱে ৰাজ্যখনৰ সাম্প্ৰদায়িক সম্প্ৰীতিৰ ওপৰত বিৰূপ প্ৰভাৱ পেলাব পাৰে। শুনানিৰ সময়ত ন্যায়াধীশগৰাকীয়ে মৌখিকভাৱে কয় যে আবেদনকাৰীসকলে উত্থাপন কৰা শংকা এই পৰ্যায়ত যথেষ্ট যুক্তিপূৰ্ণ যেন ধৰা দিছে।

এই সন্দৰ্ভত ন্যায়াধীশ থমাছে কয়, “যুক্তি-তৰ্ক সম্পূৰ্ণ নোহোৱালৈকে এই ছবিখন মুক্তি দিয়াটো অনুচিত।” তেওঁ লগতে কয়, “আবেদনকাৰীসকলৰ অভিযোগসমূহ গুৰুত্ব সহকাৰে লৈ চেন্সৰ ব’ৰ্ডে দুসপ্তাহৰ ভিতৰত ইয়াৰ ওপৰত এক চূড়ান্ত সিদ্ধান্ত গ্ৰহণ কৰিব লাগে।”

ন্যায়ালয়ে চিবিএফচিক আবেদনকাৰীসকলৰ আৱেদন পুনৰ বিবেচনা কৰি দুই সপ্তাহৰ ভিতৰত বিষয়টো নিষ্পত্তি কৰিবলৈ নিৰ্দেশ দিছে। এই সময়ছোৱাত ছবিখনৰ মুক্তিৰ ওপৰত স্থগিতাদেশ বাহাল থাকিব। এই নিৰ্দেশে এতিয়া দেশজুৰি পুনৰ বিতৰ্কৰ সৃষ্টি কৰিছে।