কেবিনেটৰ অনুমোদন লাভঃ ১৮ হাজাৰ কোটি টকাৰ আণ্ডাৰৱাটাৰ ৰেল সুৰংগত গহপুৰ–নুমলীগড় সংযোগ

ব্ৰহ্মপুত্ৰৰ তলেৰে নিৰ্মাণ হ’বলগীয়া দেশৰ প্ৰথমটো ৰেল আৰু পথ সংযোগী সুৰংগৰ বাবে শনিবাৰে ১৮,৬৬২ কোটি টকাৰ এক বৃহৎ পুঁজি অনুমোদন জনায় কেন্দ্ৰীয় কেবিনেটে। প্ৰধানমন্ত্ৰী নৰেন্দ্ৰ মোদীৰ অধ্যক্ষতাত অনুষ্ঠিত অৰ্থনৈতিক পৰিক্ৰমাৰ কেবিনেট সমিতিয়ে অসমৰ যোগাযোগ ব্যৱস্থাত বৈপ্লৱিক পৰিৱৰ্তন আনিব পৰা এই অভিলাষী প্ৰকল্পটোত চূড়ান্ত মোহৰ মাৰে। ১৫.৭৯ কিলোমিটাৰ দৈৰ্ঘ্যৰ এই আণ্ডাৰৱাটাৰ সুৰংগটোৱে গহপুৰ আৰু নুমলীগড়ৰ মাজৰ বৰ্তমানৰ ২৪০ কিলোমিটাৰ দূৰত্বক মাত্ৰ ৩৩.৭ কিলোমিটাৰলৈ হ্ৰাস কৰিব।

প্ৰায় ৩৩.৭ কিলোমিটাৰ দৈৰ্ঘ্যৰ এই সামগ্ৰিক প্ৰকল্পটোৱে ৰাজ্যৰ যোগাযোগ ব্যৱস্থাত এক নতুন মাত্ৰা প্ৰদান কৰিব। বৰ্তমান গহপুৰৰ পৰা নুমলীগড়লৈ যাবলৈ লগা ৬ ঘণ্টাৰ সময় এই সুৰংগৰ জৰিয়তে মাত্ৰ কেইমিনিটমানলৈ সংকুচিত হ’ব। ইয়াৰ ফলত কাজিৰঙা ৰাষ্ট্ৰীয় উদ্যান আৰু তেজপুৰ চহৰৰ যান-জঁটৰ পৰাও যাত্ৰীসকলে মুক্তি পাব। লক্ষণীয় যে ব্ৰহ্মপুত্ৰৰ তলেৰে নিৰ্মাণ হ’বলগীয়া এইটোৱেই হ’ব ভাৰতৰ প্ৰথম আৰু বিশ্বৰ ভিতৰত দ্বিতীয়টো এনেধৰণৰ ‘ৰোড-কাম-ৰেল’ সুৰংগ।

কৌশলগতভাৱে গুৰুত্বপূৰ্ণ এই প্ৰকল্পটোৱে ১৫ নং আৰু ৭১৫ নং ৰাষ্ট্ৰীয় ঘাইপথক সংযোগ কৰাৰ লগতে উত্তৰ-পূব সীমান্ত ৰেলৱেৰ ৰঙিয়া আৰু তিনিচুকীয়া সংমণ্ডলৰ দুটা গুৰুত্বপূৰ্ণ ৰেলপথকো সংযুক্ত কৰিব। ইয়াৰ ফলত অৰুণাচল প্ৰদেশ, নাগালেণ্ড আৰু অসমৰ মাজত সামগ্ৰী পৰিবহণ অধিক দ্ৰুত আৰু সহজলভ্য হ’ব। চৰকাৰী তথ্য অনুসৰি, এই নিৰ্মাণ কাৰ্যই প্ৰত্যক্ষ আৰু পৰোক্ষভাৱে প্ৰায় ৮০ লাখ কৰ্মদিনৰ নিযুক্তিৰ সুযোগ সৃষ্টি কৰিব।

উত্তৰ-পূৰ্বাঞ্চলৰ সামগ্ৰিক অৰ্থনৈতিক বিকাশত এই প্ৰকল্পই এক মেৰুদণ্ড হিচাপে কাম কৰিব। ইয়াৰ জৰিয়তে নুমলীগড় তেল শোধনাগাৰৰ দৰে ১১ টা উদ্যোগিক কেন্দ্ৰ, ৪ টা মুখ্য ৰেল ষ্টেচন আৰু ইটানগৰ তথা তেজপুৰৰ দৰে ২ টা বিমানবন্দৰৰ মাজত সুচল যাতায়াত সম্ভৱ হৈ উঠিব। এই ঐতিহাসিক পদক্ষেপে সমগ্ৰ অঞ্চলটোৰ পৰ্যটন আৰু বাণিজ্যিক দিশত এক নতুন দিগন্তৰ সূচনা কৰিব বুলি চৰকাৰে আশা প্ৰকাশ কৰিছে।